ലിംഗസമത്വത്തിനും ലിംഗവിവേചനത്തിനും എതിരേ നവോത്ഥാന വനിതാ മതില് തീര്ത്ത സി.പി.എമ്മിന്, നേതാക്കളുടെ സ്ത്രീത്വത്തെ അപമാനിക്കുന്ന പ്രസ്താവനകളും നിലപാടുകളും തെരഞ്ഞെടുപ്പില് തിരിച്ചടിയായേക്കും
ലിംഗസമത്വത്തിനും ലിംഗവിവേചനത്തിനും എതിരേ നവോത്ഥാന വനിതാ മതില് തീര്ത്ത സി.പി.എമ്മിന്, നേതാക്കളുടെ സ്ത്രീത്വത്തെ അപമാനിക്കുന്ന പ്രസ്താവനകളും നിലപാടുകളും തെരഞ്ഞെടുപ്പില് തിരിച്ചടിയായേക്കും. ആലത്തൂര് മണ്ഡലം യു.ഡി.എഫ് സ്ഥാനാര്ത്ഥി രമ്യ ഹരിദാസിനെതിരെ എല്.ഡി.എഫ് കണ്വീനറും സി.പി.എം സംസ്ഥാന സെക്രട്ടറിയേറ്റ് അംഗവുമായ എ.വിജയരാഘവന് നടത്തിയ പ്രസ്താവനയ്ക്കെതിരെ വ്യാപകപ്രതിഷേധം ഉയരുന്നു. പ്രതിപക്ഷ പാര്ട്ടികള് മാത്രമല്ല, എഴുത്തുകാരും സാംസ്കാരിക പ്രവര്ത്തകരും വിജയരാഘവനെതിരെ രംഗത്തെത്തിയിരിക്കുന്നത്. അതുപോലെ ആര്.എം.പി നേതാവ് കെ.കെ രമയെ പലതരത്തില് സമൂഹമാധ്യമങ്ങളിലൂടെ സി.പി.എം സൈബര് സഖാക്കള് ആക്രമിക്കുകയാണ്. പൊലീസില് കേസ് കൊടുത്താലും ഫലമില്ലാത്തതിനാല് അവരതിന് മുതിരുന്നില്ല.
താരതമ്യേന അത്ര വലിയ നേതാവല്ലാത്ത രമ്യ ഹരിദാസിനെ വളര്ത്താനും അവര്ക്ക് ജനപിന്തുണ നല്കാനും ഉതകുന്ന രീതിയിലാണ് സി.പി.എമ്മിന്റെ ഭാഗത്ത് നിന്ന് തുടക്കത്തിലേ പല കാര്യങ്ങളും ഉണ്ടായത്. ഇത് പരാജയഭീതിയില് നിന്ന് ഉടലെടുത്തതാണെന്നും ആക്ഷേപമുണ്ട്. പാട്ട് പാടി വോട്ട് ചോദിച്ച രമ്യയ്ക്കെതിരെ ഇടത് സഹയാത്രിക ദീപാ നിശാന്താണ് ആദ്യം രംഗത്തെത്തിയത്. പാട്ട് പാടിയല്ല വോട്ട് പിടിക്കേണ്ടതും ഇത് ഐഡിയ സ്റ്റാര്സിംഗറുമല്ല, അമ്പലക്കമ്മിറ്റി തെരഞ്ഞെടുപ്പുമല്ലെന്നാണ് ദീപാ നിശാന്ത് ആക്ഷേപിച്ചത്. എന്നാല് താന് പാട്ട് പാടി വോട്ട് പിടിക്കുമെന്നും ദീപ ടീച്ചറുടെ കുടുംബത്തിന്റെ വോട്ട് തനിക്കാണെന്നും ടീച്ചറുടെ വോട്ട് തനിക്ക് വേണമെന്നും രമ്യ പറഞ്ഞു. സംഭവം കൈവിട്ട് പോകുമെന്ന് ഉറപ്പായതോടെ സി.പി.എം ദീപയ്ക്ക് താക്കീത് നല്കി.
മമ്യ ഹരിദാസിനെതിരെ എ. വിജയരാഘവന് നടത്തിയ പരാമര്ശം സ്ത്രീവിരുദ്ധവും ഇടതുപക്ഷത്തിന്റെ രാഷ്ട്രീയ സംസ്കാരത്തിന് നിരക്കാത്തതുമാണെന്ന് ഇടത്ചിന്തകന് സുനില് പി.ഇളയിടം ആരോപിച്ചു. സ്ത്രീയെ കേവലശരീരമായി കാണുന്ന പൊതുബോധത്തിന്റെ പ്രകാശനമാണത്. നിശ്ചയമായും തിരുത്തപ്പെടണമെന്നും അദ്ദേഹം ഫെയിസ്ബുക്കിലൂടെ ആവശ്യപ്പെട്ടു. എഴുത്തുകാരിയും നിരൂപകയുമായ ശാരദക്കുട്ടിയും വിമര്ശനവുമായി രംഗത്തെത്തി. ഇതോടെ സി.പി.എം കൂടുതല് പ്രതിരോധത്തിലായി. വിജയരാഘവനെ പിന്തുണയ്ക്കാന് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനല്ലാതെ മറ്റ് നേതാക്കളാരും രംഗത്തെത്തിയില്ല എന്നതും ശ്രദ്ധേയമാണ്.
ശബരിമല വിഷയത്തില് സ്ത്രീകള്ക്ക് അനുകൂലമായ നിലപാട് എടുക്കുകയും വനിതാമതില് ഉള്പ്പെടെ തീര്ക്കുകയും ചെയ്തതോടെ, പൊതുവേ സ്ത്രീ സൗഹൃദ സര്ക്കാരാണെന്ന ഇമേജ് ഉണ്ടായിരുന്നു. എന്നാല് രമ്യയ്ക്കും കെ.കെ രമയ്ക്കും എതിരായ നിലപാടുകളും പി.കെ ശശി എം.എല്.എയുടെ സ്ത്രീ വിരുദ്ധനിലപാടിനെതിരെ പൊലീസിന് പരാതി നല്കാത്തതും തിരിച്ചടിയായി. തെരഞ്ഞെടുപ്പിന്റെ പടിവാതില്ക്കല് എത്തിനില്ക്കെ ഇതിനെ എങ്ങനെ മറികടക്കാനാകുമെന്ന് കാത്തിരുന്ന് കാണാം. സ്ഥാനാര്ത്ഥികള്ക്കെതിരെ സാധാരണ ഇടത്പക്ഷം വ്യക്തിഹത്യനടത്താറില്ലായിരുന്നു. കഴിഞ്ഞ ദിവസം സി.പി.എം മുഖപത്രം ദേശാഭിമാനി രാഹുല്ഗാന്ധിയെ പപ്പു സ്ട്രൈക്ക് എന്ന് പറഞ്ഞ് അധിക്ഷേപിക്കുകയും പിന്നീട് മാപ്പ് പറയുകയും ചെയ്തിരുന്നു.
https://www.facebook.com/Malayalivartha
