രാജ്യദ്രോഹക്കുറ്റം നിര്വചിക്കുന്ന 124 എ വകുപ്പ് എടുത്തുകളയുമെന്ന് കോണ്ഗ്രസ് പത്രികയിലെ പ്രധാന പ്രഖ്യാപനം, കസ്റ്റഡി പീഡനവും മൂന്നാം മുറയും തടയുന്ന പീഡനനിരോധന നിയമം കൊണ്ടുവരും
കോണ്ഗ്രസിന്റെ തെരഞ്ഞെടുപ്പ് വാഗ്ദാനങ്ങളെന്തെല്ലാം? തെരഞ്ഞെടുപ്പ് പ്രകടന പത്രിക പുറത്ത് വിട്ടതിന് തൊട്ടുപിന്നാലെ പാര്ട്ടിയുടെ ഔദ്യോഗിക വെബ്സൈറ്റില് ജനംഇടിച്ചുകയറി. അതോടെ സൈറ്റ് പ്രവര്ത്തനരഹിതമായി. പരിധിയിലധികം ആളുകള് സൈറ്റില് കയറിയതാണ് പ്രശ്നത്തിന് കാരണമായതെന്ന് പാര്ട്ടിയുടെ ഔദ്യോഗിക അക്കൗണ്ടില് നിന്ന് ട്വീറ്റ് വന്നു. എ.ഐ.സി.സി ആസ്ഥാനത്ത് നടന്ന ചടങ്ങില് കോണ്ഗ്രസ് അധ്യക്ഷന് രാഹുല് ഗാന്ധിയാണ് പത്രിക പുറത്തിറക്കിയത്. മുന് ധനമന്ത്രി പി.ചിദംബരത്തിന്റെ നേതൃത്വത്തിലുള്ള സംഘം ആറ് മാസമെടുത്താണ് പത്രിക തയ്യാറാക്കിയത്.
https://manifesto.inc.in എന്ന വെബ്സൈറ്റിലൂടെയാണ് പ്രകടപത്രിക ജനങ്ങളിലേക്ക് എത്തിക്കാനായി കോണ്ഗ്രസ് തയ്യാറാക്കിയിരുന്നത്. അല്പ്പനേരത്തിനകം വെബ്സൈറ്റ് തകരാറുകള് പരാഹരിക്കാന് കോണ്ഗ്രസ് ഐടി വിഭാഗത്തിനായി. ജനപ്രിയ വാഗ്ദാനങ്ങളാണ് പ്രകടന പത്രികയില് ഉള്പ്പെടുത്തിയിരിക്കുന്നത്. കര്ഷക പ്രശ്നങ്ങളും തൊഴിലില്ലായ്മയും പരിഹരിക്കും. ന്യായ് പദ്ധതിക്ക് പുറമേ അഞ്ച് വര്ഷം കൊണ്ട് മൂന്നര ലക്ഷം തൊഴില് സൃഷ്ടിക്കുമെന്നും 22 ലക്ഷം സര്ക്കാര് ജോലികള് നികത്തുമെന്നും കോണ്ഗ്രസ് അധ്യക്ഷന് രാഹുല് ഗാന്ധി അറിയിച്ചു.
സമൃദ്ധിയും സാമൂഹികക്ഷേമവും എന്നതാണ് കോണ്ഗ്രസിന്റെ തെരഞ്ഞെടുപ്പ് മുദ്രാവാക്യം. കാര്ഷിക കടം കാരണം ഇനി ആരും ജയിലില് കഴിയേണ്ടിവരില്ലെന്ന് രാഹുല് ഗാന്ധി പ്രഖ്യാപിച്ചു. കാര്ഷിക കടങ്ങള് എഴുതിതള്ളും, പൊതുമേഖലയില് മാത്രം 34ലക്ഷം തൊഴിലവസരങ്ങള് സൃഷ്ടിക്കും, പാവപ്പെട്ടവരുടെ അക്കൗണ്ടില് 72000 രൂപ ഒരോവര്ഷവും നിക്ഷേപിക്കും, തൊഴിലുറപ്പ് പദ്ധതിയിലെ തൊഴില് ദിനങ്ങള് 150 ആക്കും, 12ാം ക്ലാസുവരെ നിര്ബന്ധിത സൗജന്യ വിദ്യാഭ്യാസം, കടം തിരിച്ചടക്കാത്ത കര്ഷകര്ക്കുമേല് ക്രിമിനല് കേസ് എടുക്കില്ല എന്നിവയാണ് പ്രധാന പ്രഖ്യാപനങ്ങള്.
രാജ്യദ്രോഹക്കുറ്റം നിര്വചിക്കുന്ന 124 എ വകുപ്പ് എടുത്തുകളയുമെന്നതാണ് പത്രികയിലെ മറ്റൊരു പ്രധാന പ്രഖ്യാപനം. കസ്റ്റഡി പീഡനവും മൂന്നാം മുറയും തടയുന്ന പീഡനനിരോധന നിയമം കൊണ്ടുവരും. സൈന്യത്തിന് പ്രത്യേക അധികാരങ്ങള് നല്കുന്ന സായുധസേനാ പ്രത്യേക അധികാര നിയമം പരിഷ്കരിക്കുമെന്നും ഉറപ്പ് നല്കുന്നു. വ്യക്തിസ്വാതന്ത്ര്യവും പൗരന്റെ അന്തസും ഹനിക്കുന്ന നിയമങ്ങള് റദ്ദാക്കുകയോ പരിഷ്കരിക്കുകയോ ചെയ്യും ദീര്ഘകാലമായി ഭരണകൂടം മര്ദ്ദനോപകരണങ്ങളായി ഉപയോഗിക്കുന്ന ഇത്തരം നിയമങ്ങള് വടക്കുകിഴക്കന് സംസ്ഥാനങ്ങളില് വ്യാപകമായി ദുരുപയോഗം ചെയ്യുന്നുണ്ട്. ആളുകള് അപ്രത്യക്ഷരാകുന്നതിനും ലൈംഗിക അതിക്രമങ്ങള്ക്കും പീഡനങ്ങള്ക്കും ഇത്തരം നിയമങ്ങള് വഴിവയ്ക്കുന്നുണ്ടെന്നും പ്രകടനപത്രിക ചൂണ്ടിക്കാട്ടുന്നു.
റോ, സിബിഐ, ഇന്റലിജന്സ് ബ്യൂറോ എന്നീ ഏജന്സികളെ നാഷണല് സെക്യൂരിറ്റി എന്ന ഏജന്സി രൂപീകരിച്ച് അതിന് കീഴിലാക്കുമെന്നും പത്രിക വ്യക്തമാക്കുന്നു. പുതിയ ഏജന്സി പാര്ലമെന്റിനോട് അക്കൗണ്ടബിള് ആക്കും. അന്വേഷണ ഏജന്സികളെ ഉപയോഗിച്ച് വ്യക്തികളെയും നേതാക്കളെയും വേട്ടയാടുന്ന സാഹചര്യത്തിലാണ് ഇത്തരത്തിലൊരു നീക്കം കോണ്ഗ്രസ് മുന്നോട്ട് വയ്ക്കുന്നത്. ജയില് നിയമങ്ങള് പൊളിച്ചെഴുതുമെന്നും പ്രകടനപത്രിക വാഗ്ദാനം ചെയ്യുന്നു. വിചാരണ കൂടാതെ നിരവധി പേരാണ് രാജ്യത്തെ ജയിലുകളില് കഴിയുന്നത്. അതില് ഭൂരിപക്ഷവും ന്യൂനപക്ഷങ്ങളും ദളിതരും ആദിവാസികളുമാണ്. സോണിയാ ഗാന്ധി, ഡോ. മന്മോഹന്സിങ് തുടങ്ങിയവരുടെ സാന്നിദ്യത്തിലായിരുന്നു പ്രകടനപത്രിക പുറത്തിറക്കിയത്.
https://www.facebook.com/Malayalivartha
