സഹപ്രവര്ത്തകയെ കുറിച്ച് മോശം 'വോയ്സ് ക്ലിപ്' പ്രചരിപ്പിച്ച എക്സൈസ് ഉദ്യോഗസ്ഥരെ സസ്പെന്ഡ് ചെയ്തു
സംഭാഷണത്തിനിടെ സഹപ്രവര്ത്തകയെ കുറിച്ച് മോശമായി സംസാരിച്ച രണ്ട് എക്സൈസ് ഉദ്യോഗസ്ഥര്ക്ക് സസ്പെന്ഷന്. ഈ സംഭാഷണത്തിന്റെ ഓഡിയോ വാട്സ്ആപ്പ് വഴി പ്രചരിപ്പിച്ച മറ്റൊരു ഉദ്യോഗസ്ഥനെയും സസ്പെന്റ് ചെയ്തിട്ടുണ്ട്.
എക്സൈസ് പ്രിവന്റീവ് ഓഫീസര് എസ്. ഷാജി, സിവില് എക്സൈസ് ഓഫീസര് ആര്.ജി. ഗിരീഷ് കുമാര്, സിവില് എക്സൈസ് ഓഫീസര് ആര്.എസ്.ആശ എന്നിവരെയാണ് എക്സൈസ് കമ്മിഷണര് ഋഷിരാജ് സിങ് സസ്പെന്റ് ചെയ്തത്.കേസിന് ആസ്പദമായ സംഭാഷണം നടന്നത് ആശയും ഗിരീഷ് കുമാറും തമ്മിലാണ്.
ഇവര് ഹീനമായ ഭാഷയില് അധിക്ഷേപിച്ച് സംസാരിച്ചത് വാമനപുരം എക്സൈസ് റേഞ്ച് ഓഫീസിലെ ഉദ്യോഗസ്ഥയെ കുറിച്ചാണ്. ആക്ഷേപിക്കപ്പെട്ട വനിതാ ഉദ്യോഗസ്ഥ ഇരുവര്ക്കുമെതിരെ എക്സൈസ് കമ്മിഷണര്ക്ക് നേരിട്ട് പരാതി നല്കി. തെളിവിനായി സംഭാഷണത്തിന്റെ ഓഡിയോ സിഡിയും കമ്മിഷണര്ക്ക് മുന്നില് സമര്പ്പിച്ചു.
ദക്ഷിണ മേഖലാ ജോയിന്റ് എക്സൈസ് കമ്മിഷണറാണ് കേസ് അന്വേഷിച്ചത്. തങ്ങളാണ് സംഭാഷണം നടത്തിയതെന്ന് ആശയും ഗിരീഷ് കുമാറും സമ്മതിച്ചു. സ്വകാര്യ സംഭാഷണത്തില് പോലും സഹപ്രവര്ത്തകയുടെ അഭിമാനത്തെ അവമതിക്കുന്നതും, സ്ത്രീത്വത്തെ ആക്ഷേപിക്കുന്നതുമായ ആരോപണങ്ങള് അനുവദിക്കാനാവില്ലെന്നാണ് കമ്മിഷണര് സസ്പെന്ഷന് ഉത്തരവില് വ്യക്തമാക്കിയത്.
സംഭാഷണത്തില് മുതിര്ന്ന ഉദ്യോഗസ്ഥരെ കുറിച്ചും ഇരുവരും മോശമായി സംസാരിച്ചിരുന്നു. പരിഹാസത്തോടെയും പുച്ഛത്തോടെയുമായിരുന്നു ഇരുവരും സംസാരിച്ചതെന്ന് ആരോപണമുണ്ട്. സംഭാഷണം ഗിരീഷ് കുമാറാണ് റെക്കോര്ഡ് ചെയ്തത്. ഇതില് ആറ്റിങ്ങല് ബിവറേജസ് കോര്പ്പറേഷനിലെ പ്രിവന്റീവ് ഓഫീസര് ഷാജിയുടെ സര്വ്വീസ് ബുക്ക് കീറിയതുമായി ബന്ധപ്പെട്ട് സംസാരിച്ചിരുന്നു. ഗിരീഷ് കുമാര് അയച്ചുകൊടുത്ത ഓഡിയോ ഷാജി വാട്സ്ആപ്പിലൂടെ പ്രചരിപ്പിച്ചു. ഇതിനാണ് ഷാജിയെയും സസ്പെന്റ് ചെയ്തത്.
മൂന്ന് ഉദ്യോഗസ്ഥരുടെയും പ്രവര്ത്തി ഇവരുടെ ഭാഗത്ത് നിന്ന് ഉണ്ടാകാന് പാടില്ലാത്തതാണെന്നാണ് കമ്മിഷണര് സസ്പെന്ഷന് ഉത്തരവില് പറയുന്നത്. ഇത് കടുത്ത അച്ചടക്ക ലംഘനമായി കണ്ടാണ് സസ്പെന്ഷന് നല്കാന് തീരുമാനിച്ചത്.
https://www.facebook.com/Malayalivartha
