ആമസോണ് വഴി എറണാകുളത്തുനിന്നും കയറ്റി ഡോര് സീല്ചെയ്തയയ്ക്കുന്ന വാഹനത്തില്നിന്നും വഴിമധ്യേ ഡ്രൈവറും സഹായിയും ചേര്ന്ന് വാഹനത്തിന്റെ ലോക്കെടുത്ത് അതിവിദഗ്ദ്ധമായി ഐ ഫോണ് എടുത്ത ശേഷം സംശയം തോന്നാത്തവിധം വീണ്ടും വാഹനം ലോക്ക് ചെയ്യും; ഓണ്ലൈന് വിതരണത്തിനയച്ച മൊബൈല് ഫോണുകള് വാഹനത്തില്നിന്നും മോഷ്ടിച്ച മൂന്നുപേര് അറസ്റ്റില്
എറണാകുളം ചാപ്പ- കടപ്പുറം, എളംകുന്നപ്പുഴ മാലിപ്പുറം പെരിങ്ങോട്ട് ഗിരീഷ് (23), എറണാകുളം ഏലൂര് കുഴികണ്ടം ഭാഗത്ത് തച്ചേത്ത് ആന്റണി റെസ്റ്റോ (35), എറണാകുളം നായരമ്ബലം തേങ്ങാത്തടം മാഞ്ഞൂരാന് മിജോ (23) എന്നിവരെയാണ് അറസ്റ്റ് ചെയ്തത്. ഇതില് രണ്ടുപേര് ഡ്രൈവര്മാരും ഒരാള് സഹായിയുമാണ്. സംഘത്തിലെ മൂന്ന് പേരെ ഇനി പിടികിട്ടാനുണ്ട്. കുമളിയിലെ ഷോറും ഉടമ ടി.സി. സ്കറിയ നല്കിയ പരാതിയെത്തുടര്ന്ന് നടത്തിയ അന്വേഷണത്തിലാണ് പ്രതികള് കുടുങ്ങിയത്. ഒരു ലക്ഷം രൂപ വീതം വിലവരുന്ന 81 മൊബൈല് ഫോണുകളാണ് പലപ്പോഴായി സംഘം മോഷണം നടത്തിയത്. ആമസോണ് വഴി എറണാകുളം പാനായികുളത്തുള്ള ഓഫീസില് നിന്നും കുമളിയിലേക്ക് കയറ്റിയയ്ക്കുന്ന മൊബൈല് ഫോണ് മോഷ്ടിച്ചു വില്പ്പന നടത്തിവന്ന സംഘത്തിലെ മൂന്ന് പേരെ സ്പെഷല് ടീം അറസ്റ്റ് ചെയ്തതായി ഇടുക്കി ജില്ലാ പോലീസ് മേധാവി എസ്.പി കെ.ബി വേണുഗോപാല് പത്രസമ്മേളനത്തില് അറിയിച്ചു. എറണാകുളത്തുനിന്നും കയറ്റി ഡോര് സീല്ചെയ്തയയ്ക്കുന്ന വാഹനത്തില്നിന്നും വഴിമധ്യേ ഡ്രൈവറും സഹായിയും ചേര്ന്ന് വാഹനത്തിന്റെ ലോക്കെടുത്ത് അതിവിദഗ്ദ്ധമായി ഐ ഫോണ് എടുത്ത ശേഷം സംശയം തോന്നാത്തവിധം വീണ്ടും വാഹനം ലോക്ക് ചെയ്യും.
ഇങ്ങനെ മോഷണം നടത്തുന്ന ഫോണുകള് യഥാര്ഥ വിലയേക്കാള് കുറഞ്ഞ വിലയ്ക്ക് വാങ്ങാന് എറണാകുളത്തുതന്നെ വ്യാപാരികളുണ്ട്. ഇവര് വിറ്റ ഫോണിന്റെ കോഡുനമ്ബര് ഉപയോഗിച്ചു നടത്തിയ അന്വേഷണത്തില് ഒരാള് എറണാകുളം കാക്കനാട് ഭാഗത്ത് ഫോണ് ഉപയോഗിക്കുന്നതായി കണ്ടെത്തി. ഇയാളെ പിന്തുടര്ന്ന് നടത്തിയ അന്വേഷണത്തിലാണ് മോഷണത്തിന്റെ ചുരുളഴിഞ്ഞത്. ഇയാള് നല്കിയ വിവരമനുസരിച്ചാണ് മോഷ്ടാക്കളെ പിടികൂടിയത്. ഇവര് വില്പന നടത്തിയ 81 ഫോണുകളില് 10 എണ്ണം വിവിധ സ്ഥലങ്ങളില് നിന്ന് കണ്ടെടുത്തു.
കഴിഞ്ഞ മൂന്ന് മാസമായി നടത്തിയ അന്വേഷണത്തിനൊടുവിലാണ് എസ്.പി യുടെ നേതൃത്വത്തിലുള്ള സ്പെഷല് ടീം പ്രതികളെ കുടുക്കിയത്. മൊബൈല് ഫോണ് കൂടാതെ മറ്റു വിലപിടിപ്പുള്ള സാധനങ്ങളും ഇവര് മോഷ്ടിച്ചതായി പരാതിയുണ്ട്. ഇത് സംബന്ധിച്ചുള്ള അന്വേഷണവും നടക്കുന്നുണ്ട്.
https://www.facebook.com/Malayalivartha
