ഉത്തരേന്ത്യയില്‍ കോണ്‍ഗ്രസ് കോട്ടകളില്‍ വിള്ളല്‍ വീണതോടെ ദക്ഷിണേന്ത്യയില്‍ തരംഗമാകാന്‍ പാര്‍ട്ടി അധ്യക്ഷന്‍ വയനാട്ടില്‍ പറന്നിറങ്ങി... കേരളം, തമിഴ്‌നാട്, കര്‍ണാടക, ആന്ധ്രാപ്രദേശ്, തെലങ്കാന, പുതുച്ചേരി എന്നിവിടങ്ങളില്‍ കോണ്‍ഗ്രസ് കൊടുക്കാറ്റ് സൃഷ്ടിക്കുകയാണ് രാഹുലിന്റെ വയനാടന്‍ അങ്കത്തിന്റെ ലക്ഷ്യം. തെന്നിന്ത്യയില്‍ നിന്നൊരു പ്രധാനമന്ത്രി സ്ഥാനാര്‍ത്ഥി എന്ന് പറയുമ്പോള്‍ കോണ്‍ഗ്രസിന്റെയും അവരുടെ മുന്നണികളിലുള്ളവരുടെയും മാത്രമല്ല മറ്റ് പാര്‍ട്ടികളുടെയും മുന്നണികളുടെയും വോട്ട് സമാഹരിക്കാനാകും എന്ന ഉറച്ച വിശ്വാസത്തിലാണ് എ.ഐ.സി.സി നേതൃത്വം. എച്ച്.ഡി ദേവഗൗഡയ്ക്ക് ശേഷം തെക്കേ ഇന്ത്യയില്‍ നിന്നൊരു പ്രധാനമന്ത്രി ഉണ്ടായിട്ടില്ല. 

2009ല്‍ 444 എം.പിമാരുണ്ടായിരുന്ന കോണ്‍ഗ്രസ് 2014ല്‍ 45ലേക്ക് കൂപ്പ് കുത്തിയിരുന്നു. ആ 45ല്‍ ഭൂരിപക്ഷവും ദക്ഷിണേന്ത്യന്‍ സംസ്ഥാനങ്ങളില്‍ നിന്നാണ്. അതുകൊണ്ടാണ് രാഹുല്‍ ഇവിടെ നിന്ന് മത്സരിക്കണമെന്ന് മുതിര്‍ന്ന കോണ്‍ഗ്രസ് നേതാവ് മല്ലികാര്‍ജ്ജുന്‍ ഖാര്‍ഗെ ഉള്‍പ്പെടെ തുടക്കംമുതലേ ആവശ്യപ്പെട്ടത്. കേരളത്തില്‍ കോണ്‍ഗ്രസിനും അവരുടെ മുന്നണിയായ യു.ഡി.എഫിനും വ്യക്തമായ മുന്‍തൂക്കം തെരഞ്ഞെടുപ്പില്‍ ലഭിക്കുമെന്ന് വിവിധ സര്‍വ്വേ റിപ്പോര്‍ട്ടുകള്‍ പ്രവചിച്ചിരുന്നു. കര്‍ണാടകയില്‍ കോണ്‍ഗ്രസ് പിന്തുണയോടെയാണ് ജനതാദള്‍ ഭരിക്കുന്നത്. ബി.ജെ.പിയുടെ കോട്ടയായ ബെല്ലാരി ഉള്‍പ്പെടെ കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസിന് തിരിച്ച് പിടിക്കാനായി. അവിടെയും കോണ്‍ഗ്രസിനും മുന്നണിക്കും വ്യക്തമായ ആധിപത്യം ഉറപ്പിക്കാനാകുമെന്ന കണക്കൂട്ടലിലാണ് നേതാക്കള്‍.

തമിഴ്‌നാട്ടില്‍ എഡി.എം.കെ കോണ്‍ഗ്രസിനെ എല്ലാവിധത്തിലും സഹായിക്കുകയാണ്. രാഹുല്‍പ്രധാനമന്ത്രിയാകണമെന്ന് ഡി.എം.കെ അധ്യക്ഷന്‍ സ്റ്റാലിന്‍ ആദ്യമേ ആവശ്യപ്പെട്ടു. കാര്‍ത്തി ചിദംബരത്തിനായി ശിവഗംഗ സീറ്റില്‍ വരെ അവര്‍ വീട്ട് വീഴ്ച ചെയ്തു. സര്‍ക്കാരിനെതിരായ വികാരം അവിടെ ശക്തമാണ്. 18 നിയമസഭാ സീറ്റുകളില്‍ ഉപതെരഞ്ഞെടുപ്പും തമിഴ്‌നാട്ടില്‍ നടക്കുന്നുണ്ട്. എ.ഐ.ഡി.എം.കെ സര്‍ക്കാരിന് ഭൂരിപക്ഷം ലഭിക്കണമെങ്കില്‍ 12 സീറ്റില്‍ വിജയിക്കണം. അതിനാല്‍ തമിഴ്‌നാട്ടിലേത് ഇരട്ടപ്പോരാട്ടമാണ്. വിജയിച്ചാല്‍ സംസ്ഥാന ഭരണത്തില്‍ കോണ്‍ഗ്രസിന് പങ്കാളിയാകാം. അതിനൊപ്പം കേന്ദ്രത്തില്‍ വ്യക്തമായ ഭൂരിപക്ഷത്തിനുള്ള എം.പിമാരെയും ലഭിക്കും. 39 ലോക്‌സഭാ സീറ്റുകളാണുള്ളത്. അതില്‍ 20 എണ്ണം ലഭിച്ചാല്‍ തന്നെ വലിയ നേട്ടമാണ്. 

കേരളത്തിലെ 20 സീറ്റുകളില്‍ 16 എണ്ണം വരെ യു.ഡി.എഫിന് ലഭിക്കുമെന്നാണ് സര്‍വ്വേ റിപ്പോര്‍ട്ടുകള്‍. കര്‍ണാടകത്തിലെ 28 സീറ്റുകളില്‍ പതിനഞ്ചിലധികം വിജയപ്രതീക്ഷയുളളതാണ്. തെലങ്കാനയില്‍ വലിയ പ്രതീക്ഷയില്ല. എങ്കിലും 17 സീറ്റില്‍ അഞ്ചെണ്ണെങ്കിലും കിട്ടിയാല്‍ തന്നെ വലിയ നേട്ടമാണ്. ആന്ധ്രയില്‍ 25 സീറ്റില്‍ ഒന്നുപോലും കോണ്‍ഗ്രസിന് കഴിഞ്ഞ തവണ ലഭിച്ചില്ല. എ.ഐ.സി.സി ജനറല്‍ സെക്രട്ടറി ഉമ്മന്‍ചാണ്ടിക്കാണ് ഇവിടെ ചുമതല. അതിനാല്‍ കുറച്ച് സീറ്റുകളെങ്കിലും ലഭിക്കുമെന്നാണ് കരുതുന്നത്. മാത്രമല്ല ടി.ആര്‍.എസ് കോണ്‍ഗ്രസ് അടങ്ങുന്ന വിശാല സഖ്യത്തിനൊപ്പമാണ്. പുതിച്ചേരിയിലെ ഒരു സീറ്റ് കോണ്‍ഗ്രസിന്റെ ഉറപ്പായ മണ്ഡലമാണ്. അങ്ങനെ നോക്കുമ്പോള്‍ അന്‍പതിലധികം സീറ്റ് കോണ്‍ഗ്രസിനും സഖ്യകക്ഷികള്‍ക്കും തെക്കേഇന്ത്യയില്‍ നിന്ന് നേടാനാകും. വടക്ക് വിഴക്കന്‍ സംസ്ഥാനങ്ങളില്‍ നിന്നും ഉത്തരേന്ത്യന്‍ സംസ്ഥാനങ്ങളില്‍ നിന്നും കോണ്‍ഗ്രസും സഖ്യകക്ഷികളും 250 തോളം സീറ്റുകള്‍ നേടിയാല്‍ അധികാരത്തില്‍ നിഷ്പ്രയാസം എത്താനാകുമെന്നാണ് കണക്കുകൂട്ടല്‍.