യുദ്ധംമൂലം താൽക്കാലികമായി നിർത്തിയ കോഴിക്കോട് – ദോഹ വിമാന സർവീസ് ഖത്തർ എയർവേയ്സ് പുനരാരംഭിച്ചു. എയർ ഇന്ത്യ എക്സ്പ്രസിന്റെ കോഴിക്കോട് – മസ്കത്ത് വിമാന സർവീസ് ഈ മാസം ആറിനു പുനരാരംഭിക്കും.

ഖത്തർ എയർവേയ്സ് വിമാനം പുലർച്ചെ 2.35ന് കോഴിക്കോട് എത്തി 3.35നു ദോഹയിലേക്കു മടങ്ങുന്ന രീതിയിലാണു സമയക്രമം. എല്ലാ ദിവസവും സർവീസ് ഉണ്ടാകും. യുദ്ധം തുടങ്ങിയ ദിവസം നിർത്തിയതാണ് ദോഹ – കോഴിക്കോട് വിമാന സർവീസ്.

ദോഹയിൽനിന്നു മറ്റു വിവിധ രാജ്യങ്ങളിലേക്കു കണക്‌ഷൻ വിമാന സർവീസുകളും ഉണ്ടാകും. എയർ ഇന്ത്യ എക്സ്പ്രസിന്റെ കോഴിക്കോട് – മസ്കത്ത് വിമാന സർവീസ് ആഴ്ചയിൽ മൂന്നു വീതം ഈ മാസം 31 വരെയാണു ഷെഡ്യൂൾ ചെയ്തിട്ടുള്ളത്. ബുധൻ, വെള്ളി, ഞായർ ദിവസങ്ങളിലായിരിക്കും സർവീസ്.