രാഹുല്‍ ഗാന്ധിയുടെ പ്രശസ്തമായ കാവല്‍ക്കാരന്‍ കള്ളനെന്ന പ്രയോഗത്തിന് കനത്ത തിരിച്ചടി. റാഫേല്‍ വിവാദത്തില്‍ ബിജെപി നല്‍കിയ കോടതി അലക്ഷ്യ ഹര്‍ജിയില്‍ രാഹുല്‍ ഗാന്ധിക്കെതിരെ സുപ്രീംകോടതി നോട്ടീസ് അയച്ചു. കാവല്‍ക്കാരന്‍ കള്ളന്‍ തന്നെയെന്ന് സുപ്രീംകോടതി കണ്ടെത്തിയെന്നായിരുന്നു രാഹുല്‍ ഗാന്ധിയുടെ വിവാദ പരാമര്‍ശം.

സുപ്രീംകോടതി നോട്ടീസ് അനുസരിച്ച് ഏപ്രില്‍ 22ന് മുമ്പ് രാഹുല്‍ മറുപടി നല്‍കണം. ഏപ്രില്‍ 22നാണ് വീണ്ടും ഹര്‍ജി പരിഗണിക്കുക. രാഹുല്‍ പറഞ്ഞ തരത്തില്‍ ഒരു പരാമര്‍ശം കോടതി നടത്തിയിട്ടില്ലെന്നും രേഖകള്‍ പരിശോധിക്കണോ എന്ന കാര്യത്തില്‍ തീരുമാനമെടുക്കുക മാത്രമാണു ചെയ്തതെന്നും ചീഫ് ജസ്റ്റീസ് വ്യക്തമാക്കി.

റാഫേല്‍ യുദ്ധവിമാന ഇടപാട് സംബന്ധിച്ച് കഴിഞ്ഞ ദിവസം സുപ്രീംകോടതി പുറപ്പെടുവിച്ച വിധി തെറ്റായി ഉപയോഗിച്ചു എന്നു ചൂണ്ടിക്കാട്ടി ബിജെപി നേതാവ് മീനാക്ഷി ലേഖി സമര്‍പ്പിച്ച ഹര്‍ജിയിലാണ് രാഹുല്‍ ഗാന്ധിയില്‍ നിന്നും വിശദീകരണം തേടാന്‍ ചീഫ് ജസ്റ്റീസ് രഞ്ജന്‍ ഗോഗോയ് അദ്ധ്യക്ഷനായ ബെഞ്ച് നിര്‍ദേശിച്ചത്. കാവല്‍ക്കാരന്‍ കള്ളന്‍ തന്നെയെന്ന് സുപ്രീംകോടതി കണ്ടെത്തിയെന്നായിരുന്നു രാഹുല്‍ ഗാന്ധിയുടെ വിവാദ പരാമര്‍ശം. 

ബി.ജെ.പി എം.പി മീനാക്ഷി ലേഖിയാണ് ഇതിനു എതിരെ കോടതിയെ സമീപിച്ചത്. പറയാത്ത കാര്യം രാഹുല്‍ കോടതിയുടെ പേരില്‍ കെട്ടി വയ്ക്കുന്നതായി മീനാക്ഷി ലേഖിയ്ക്ക് വേണ്ടി ഹാജരായ അഭിഭാഷകന്‍ മുകുള്‍ റോത്തഗി ചൂണ്ടിക്കാട്ടി. പ്രധാനമന്ത്രിക്ക് എതിരെ സുപ്രീം കോടതി പരാമര്‍ശമൊന്നും നടത്തിയിട്ടില്ലെന്ന് ചീഫ് ജസ്റ്റിസ് പറഞ്ഞു. പിന്നെ ഏതു സാഹചര്യത്തിലാണ് പ്രസംഗമെന്നു രാഹുല്‍ വിശദീകരിക്കണമെന്നും കോടതി നിര്‍ദ്ദേശിച്ചു.

രാഹുല്‍ ഗാന്ധിയുടെ കാവല്‍ക്കാരന്‍ കള്ളനാണെന്ന പരിഹാസത്തിന് എതിരെ മുംബൈ നഗരത്തിലെ സെക്യൂരിറ്റി ഗാര്‍ഡുകളുടെ അസോസിയേഷനും പൊലീസില്‍ പരാതിനല്‍കിയിരുന്നു. പ്രധനമന്ത്രി നരേന്ദ്ര മോദിയെയാണ് രാഹുല്‍ ഗാന്ധി കാവല്‍ക്കാരന്‍ കള്ളനാണെന്ന് അര്‍ഥംവരുന്ന 'ചൗകിദാര്‍ ചോര്‍ഹെ' എന്ന് വിളിച്ചത്.

എന്നാല്‍, ഈ പ്രയോഗം കാവല്‍ക്കാരായ തങ്ങളെ അപമാനിക്കുന്നതാണെന്ന് മഹാരാഷ്ട്ര രാജ്യസുരക്ഷ രക്ഷാ യൂനിയന്‍ പരാതിപ്പെട്ടു. ബാന്ദ്രകുര്‍ള കോംപ്ലക്‌സ് പൊലീസിലാണ് പരാതി നല്‍കിയത്. ദിവസങ്ങള്‍ക്കുമുമ്ബ് മുംബൈ എം.എം.ആര്‍.ഡി.എ മൈതാനത്ത് നടന്ന കോണ്‍ഗ്രസ് റാലിയില്‍ കാവല്‍ക്കാരന്‍ കള്ളനാണെന്ന് രാഹുല്‍ ഗാന്ധി ആക്ഷേപിച്ചതായാണ് പരാതി.

പ്രധാനമന്ത്രി നരേന്ദ്ര മോദിക്കെതിരേ കാവല്‍ക്കാരന്‍ കള്ളനാണെന്ന ആരോപണം ആവര്‍ത്തിച്ച് രാഹുല്‍ഗാന്ധി പലതവണയാണ് രംഗത്തെത്തിയത്. കാവല്‍ക്കാരന്‍ നൂറുശതമാനവും കള്ളനാണ്. രാജ്യത്തെ എല്ലാ കള്ളന്‍മാരുടെയും പേര് മോദി എന്നാണെന്നും രാഹുല്‍ഗാന്ധി പരിഹസിച്ചു. കോലാറിലും ചിത്രദുര്‍ഗയിലും നടന്ന കോണ്‍ഗ്രസ് തിരഞ്ഞെടുപ്പ് റാലിയില്‍ സംസാരിക്കുകയായിരുന്നു അദ്ദേഹം.

പ്രധാനമന്ത്രിക്കും ബി.ജെ.പി.ക്കുമെതിരേ രൂക്ഷമായ വിമര്‍ശനമാണ് രാഹുല്‍ നടത്തിയത്. എനിക്കുള്ള ഒരു ചോദ്യമിതാണ്. എന്തുകൊണ്ടാണ് രാജ്യത്തെ എല്ലാ കള്ളന്‍മാര്‍ക്കും മോദി എന്ന പേരുവന്നത്. നീരവ് മോദി, ലളിത് മോദി, നരേന്ദ്ര മോദി... ഇനിയെത്ര മോദിമാര്‍ വരുമെന്ന് നമുക്കറിയില്ല എന്നുമാണ് രാഹുല്‍ഗാന്ധി പരിഹസിച്ചത്. 

റഫാല്‍ യുദ്ധവിമാന ഇടപാടില്‍നിന്ന് കാവല്‍ക്കാരന്‍ നൂറുശതമാനവും കള്ളനാണെന്ന് വ്യക്തമായിരിക്കുകയാണ്. അനില്‍ അംബാനിക്ക് 30,000 കോടി രൂപയാണ് സമ്മാനിച്ചത്. രാജ്യത്തുനിന്ന് 30,000 കോടി മോഷ്ടിച്ച് കള്ളനായ സുഹൃത്തിന് നല്‍കി.

പ്രധാനമന്ത്രി കര്‍ഷകരെക്കുറിച്ചോ തൊഴിലില്ലാത്തവരെക്കുറിച്ചോ ഒന്നും സംസാരിക്കുന്നില്ല. കള്ളം മാത്രമാണ് പറയുന്നത്. എന്നാല്‍ ഞങ്ങള്‍ കള്ളം പറയില്ലെന്നുമാണ് രാഹുല്‍ പറഞ്ഞത്.