സമ്പൂര്ണ വൈ-ഫൈ നഗരമാകാന് കൊച്ചി ഒരുങ്ങുന്നു
വയര്ലെസ് ലോക്കല് ഏരിയ നെറ്റ്വര്ക്കിലൂടെ പേഴ്സണല് കംപ്യൂട്ടര്, സ്മാര്ട്ട് ഫോണ്, ഡിജിറ്റല് കാമറ, ടാബ്ലറ്റ് കംപ്യൂട്ടര്, ഡിജിറ്റല് ഓഡിയോ പ്ലെയര്, വീഡിയോ ഗെയിം കണ്സോള് തുടങ്ങിയവ ഉപയോഗിക്കാനാവുന്ന വൈ-ഫൈ സംവിധാനം ഏപ്രില് ഒന്നു മുതല് കൊച്ചി നഗരത്തില് ലഭ്യമാകുന്നതോടെ കൊച്ചി നഗരം സമ്പൂര്ണ വൈ-ഫൈ നഗരമാകും.
ബിഎസ്എന്എല്-ന്റെ സഹകരണത്തോടെയാണു ഇവിടെ ഈ പദ്ധതി നടപ്പിലാക്കുന്നതെന്നു മേയര് ടോണി ചമ്മണി, ബിഎസ്എന്എല് എറണാകുളം പ്രിന്സിപ്പല് ജനറല് മാനേജര് ജി. മുരളീധരന് എന്നിവര് പത്രസമ്മേളനത്തില് അറിയിച്ചു.
പദ്ധതി നടപ്പിലാകുമ്പോള് ഇത്രയധികം പ്രദേശങ്ങളില് വൈ-ഫൈ സംവിധാനം ലഭിക്കുന്ന ഇന്ത്യയിലെ ആദ്യ മുനിസിപ്പല് കോര്പറേഷനാകും കൊച്ചിയെന്നു മേയര് പറഞ്ഞു. മൊബൈല് ഫോണ്, ലാന്ഡ്ലൈന് എന്നിവ വഴി ഇന്റര്നെറ്റ് ഉപയോഗിക്കുന്നതിനേക്കാള് 30 ശതമാനം കുറഞ്ഞ നിരക്കിലായിരിക്കും വൈ-ഫൈ ലഭ്യമാകുക.
ആദ്യഘട്ടത്തില് 10 പ്രദേശങ്ങളിലാണു വൈ-ഫൈ സംവിധാനം ലഭ്യമാക്കുന്നത്. ഫോര്ട്ട്കൊച്ചി, മട്ടാഞ്ചേരി, മറൈന്ഡ്രൈവ്, ഹൈക്കോര്ട്ട്, സുഭാഷ് പാര്ക്ക്, കൊച്ചി കോര്പറേഷന് മെയിന് ഓഫീസ്, ജോസ് ജംഗ്ഷന്, വൈറ്റില മൊബിലിറ്റി ഹബ്, ഇടപ്പള്ളി ജംഗ്ഷന്, കലൂര് എന്നിവയാണ് ആദ്യഘട്ടത്തില് പദ്ധതി നടപ്പാക്കുന്നതിനായി തെരഞ്ഞെടുത്തിട്ടുള്ളത്.
ഓരോ പ്രദേശത്തെയും ഹോട്ട് സ്പോട്ട് സംവിധാനത്തിനു കീഴില് 300 മീറ്റര് പരിധിക്കുള്ളില് 10 എംബി ബാന്ഡ്വിഡ്ത്തോടെയാണ് വൈ-ഫൈ സൗകര്യം ലഭിക്കുന്നത്. പദ്ധതിയുടെ ആദ്യമാസം ഓരോ ദിവസത്തേയും ആദ്യത്തെ 15 മിനിറ്റ് ഉപയോക്താക്കള്ക്കു സൗജന്യമായി വൈ-ഫൈ ഉപയോഗിക്കാം. ഉപയോക്താക്കളുടെ എണ്ണം കൂടുന്നതനുസരിച്ചു സൗജന്യ ഉപയോഗത്തിന്റെ കാലപരിധി നീട്ടും. വൈ-ഫൈ ലഭിക്കുന്നതിനു മൊബൈല് ഫോണിലൂടെ രജിസ്റ്റര്ചെയ്യണം.
ക്വാഡ്ജന് കമ്പനിക്കാണു ബില്ലിംഗ് സംവിധാനത്തിന്റെ ചുമതല. വൈ-ഫൈ ഉപയോഗിക്കുന്നതിനു വൗച്ചറുകള് വഴിയും ഓണ്ലൈന് വഴിയും റീ ചാര്ജ് ചെയ്യുന്നതിനു സംവിധാനമുണ്ട്. താരിഫ് പിന്നീടു പ്രഖ്യാപിക്കുമെന്നു മേയര് ടോണി ചമ്മണി അറിയിച്ചു.
പദ്ധതി നടപ്പിലാക്കാന് ബിഎസ്എന്എലിന് അടിസ്ഥാനസൗകര്യം ഒരുക്കി നല്കുകയാണു കൊച്ചി നഗരസഭ ചെയ്യുന്നതെന്നും സാമ്പത്തികചെലവുകളൊന്നും നഗരസഭ വഹിക്കുന്നില്ലെന്നും മേയര് പറഞ്ഞു. അടുത്ത സാമ്പത്തിക വര്ഷത്തില് കൊച്ചിയെ വൈ-ഫൈ നഗരമാക്കി മാറ്റുക എന്ന ലക്ഷ്യം മുന്നിര്ത്തി ഈ മാസം ചേരുന്ന കോര്പറേഷന് കൗണ്സില് യോഗത്തില് പദ്ധതിക്ക് അംഗീകാരം നല്കാനാണ് ഉദ്ദേശിക്കുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha
