വീണാ ജോർജിനെ വരാനിരിക്കുന്ന നിയമസഭാ തെരഞ്ഞെടുപ്പിൽ മത്സരിപ്പിക്കരുതെന്ന ആവശ്യവുമായി ഭർത്താവ് ജോർജ് ജോസഫ്. സിപിഎം നേതൃത്വത്തിനോടാണ് ഈ ആവശ്യം അദ്ദേഹം ഉന്നയിച്ചിരിക്കുന്നത് . തിങ്കളാഴ്ച ചേർന്ന പത്തനംതിട്ട ജില്ലാ സെക്രട്ടേറിയറ്റ് യോഗത്തിലാണ് ഈ നീക്കം.

 
കുടുംബപരമായ അസൗകര്യങ്ങൾ ഉള്ളതിനാൽ വീണാ ജോർജിനെ ഇത്തവണ മത്സരരംഗത്ത് നിന്ന് ഒഴിവാക്കണമെന്നാണ് ജോർജ് ജോസഫ് പാർട്ടി നേതാക്കളോട് പറഞ്ഞിരിക്കുന്നത് . യോഗത്തിൽ പങ്കെടുത്ത കേന്ദ്ര കമ്മിറ്റി അംഗം തോമസ് ഐസക് ഈ വിഷയം സംസ്ഥാന നേതൃത്വത്തിനോട് അറിയിച്ചു.

വീണ സംസ്ഥാന കമ്മിറ്റിയിലെ ക്ഷണിതാവാണ്. അതുകൊണ്ട് തന്നെ അന്തിമ തീരുമാനം സംസ്ഥാന നേതൃത്വമാണ് എടുക്കേണ്ടത്. മുൻ ഓർത്തഡോക്‌സ് സഭ സെക്രട്ടറി കൂടിയായ ജോർജ് ജോസഫ്, ഏരിയ ജില്ലാ തലങ്ങളിലെ പ്രമുഖ നേതാക്കളോട് ഫോൺ വഴിയും നേരിട്ടും ഈ ആവശ്യം ഉന്നയിച്ചിട്ടുണ്ട് .

ആറന്മുള സിറ്റിങ് എംഎൽഎയായ വീണയെ തന്നെ വീണ്ടും മത്സരിപ്പിക്കാനായിരുന്നു സിപിഎം സംസ്ഥാന കമ്മിറ്റിയുടെ തീരുമാനം. ജില്ലാ കമ്മിറ്റി നൽകിയ ശുപാർശ പട്ടികയിലും വീണയുടെ പേര് ഉണ്ടായിരുന്നു . ഈ സാഹചര്യത്തിൽ ഭർത്താവിന്റെ ഭാഗത്തുനിന്നുണ്ടായ ഈ ആവശ്യം പാർട്ടി വൃത്തങ്ങളിൽ വലിയ ചർച്ചയായി മാറി .