ഇടതുവലതു മുന്നണികള്‍ കള്ളവോട്ട് ആരോപണം പരസ്പരം ആയുധമാക്കുന്ന സാഹചര്യത്തില്‍ വിഷയത്തില്‍ രൂക്ഷപ്രതികരണവുമായി മന്ത്രി എംഎം മണി. കള്ളവോട്ട് ആരോപണമുണ്ടായ ബൂത്തിലെ ഏജന്റുമാര്‍ ആ സമയം എന്തുണ്ടാക്കുകയായിരുന്നുവെന്ന് എംഎം മണി ചോദിച്ചു. ‘ഒരു മാതിരി തട്ടിപ്പ് ഏര്‍പ്പാടാണ് ഇപ്പോള്‍ നടക്കുന്നത്. ആണത്തമുണ്ടെങ്കില്‍ അപ്പോള്‍ത്തന്നെ പരാതി കൊടുക്കണമായിരുന്നു. ചലഞ്ച് ചെയ്യണമായിരുന്നു. പാര്‍ട്ടി സെക്രട്ടറിയേറ്റ് കൂടി മോശമല്ലാത്ത പ്രകടനം നടത്തിയ ശേഷമാണ് ഈ പരാതി ഉയര്‍ന്നത്. അതങ്ങ് മനസ്സില്‍ വെച്ചാല്‍ മതി. ഒന്നും ഞങ്ങളുടെ അടുത്ത് നടക്കില്ല’. മന്ത്രി എംഎം മണി പറഞ്ഞു. ‘ഈ ടിക്കാറാം മീണ ആരാ? ഇവിടെ കോടതി ഉണ്ട്. തോല്‍ക്കും എന്ന് വന്നപ്പോള്‍ കാണുന്ന പച്ച തട്ടിപ്പാണ്’ ഇതെന്നും എംഎം മണി ആരോപിച്ചു.

സിപിഐഎം വ്യാപകമായി കള്ളവോട്ട് ചെയതെന്ന ആരോപണവുമായി കോണ്‍ഗ്രസാണ് ആദ്യം രംഗത്തെത്തിയത് ഇത് വ്യക്തമാക്കുന്ന സിസിടിവി ദൃശ്യങ്ങളും കോണ്‍ഗ്രസ് പുറത്തുവിട്ടു. ഇതോടെ യുഡിഎഫ്, മുസ്‌ലിം ലീഗ് ശക്തികേന്ദ്രങ്ങളില്‍ കള്ളവോട്ട് നടന്നിട്ടുണ്ടെന്ന മറുവാദവുമായി സിപിഐഎം രംഗത്തെത്തുകയായിരുന്നു. ഇതോടെയാണ് കള്ളവോട്ട് ആരോപണം ഇരുമുന്നണികളും പരസ്പരം ശക്തമായ ആരോപണമാക്കിയത്.