തൃശൂര്‍ എനിക്ക് വേണം തൃശൂരിനെ ഞാനിങ്ങെടുക്കുവാ..’ ഇക്കഴിഞ്ഞ തെരഞ്ഞെടുപ്പ് പ്രചാരണ സമയങ്ങളിൽ സമൂഹമാധ്യമങ്ങൾ ഏറെ ആഘോഷിച്ച ഒന്നാണ് സുരേഷ്ഗോപിയുടെ ഈ പ്രയോഗം.

'തൃശൂര്‍ എനിക്ക് വേണം. നിങ്ങളെനിക്ക് ഈ തൃശൂര്‍ തരണം, തൃശൂര്‍ ഞാനിങ്ങെടുക്കുവാ..' എന്നായിരുന്നു സ്ഥാനാര്‍ഥിയായിരുന്ന സുരേഷ് ഗോപി പ്രചാരണ യോഗത്തില്‍ പറഞ്ഞിരുന്നത്. ഇതിന്റെ ടിക് ടോക് വീഡിയോയും തൃശൂര്‍ ഇപ്പോൾ എവിടെയാണെന്നുള്ള വീഡിയോയും സമൂഹമാധ്യമങ്ങളിൽ ചിരി നിറച്ചിരുന്നു.

'ആര്‍ക്കെങ്കിലും അറിയാമെങ്കില്‍ ഒന്നു പറഞ്ഞുതരണം, ഞാന്‍ അത്യാവശ്യമായി തൃശൂര്‍ പോകാനിരിക്കുകയായിരുന്നു. അപ്പോഴാണ് അറിയുന്നത്, തൃശൂര്‍ സുരേഷ് ഗോപി കൊണ്ടുപോയെന്ന്. എങ്ങോട്ടാണ് കൊണ്ടുപോയതെന്ന് അറിയില്ല. കേരളത്തിലാണോ കേരളത്തിന്റെറ പുറത്താണോ, അതോ ഇന്ത്യയില്‍ തന്നെ ഉണ്ടോ എന്നു പോലും അറിയില്ല. ആരെങ്കിലും ഒന്നറിയിക്കണം' എന്ന് കരഞ്ഞുകൊണ്ട് പറയുന്നതാണ് ട്രോള്‍ വിഡിയോ

സുരേഷ്ഗോപിയുടെ പ്രചാരണം ഇടയ്ക്ക് ഒരു ഘട്ടത്തിൽ യുഡിഎഫ് സ്ഥാനാർഥി ടി.എൻ.പ്രതാപനെ ഭയപ്പെടുത്തിയിരുന്നു. എന്നാൽ ഇപ്പോൾ ഭയവും അസ്ഥാനത്താക്കി യുഡിഎഫ് സ്ഥാനാർഥി ടിഎൻ പ്രതാപൻ മികച്ച ഭൂരിപക്ഷത്തിലാണ് ജയിച്ചത് . 93633 വോട്ടിന്റെ ഭൂരിപക്ഷമാണ്‌ പ്രതാപന് ഉള്ളത്

വിജയമുറപ്പിച്ചശേഷം മാധ്യമങ്ങളെ കണ്ട പ്രതാപൻ സുരേഷ്ഗോപിയെ അതേ നാണയത്തിൽ തന്നെ തിരിച്ച് ട്രോളിയിരിക്കുകയാണ്
"അങ്ങനെ തൃശൂരിനെ ആർക്കും എടുക്കാൻ കൊടുക്കില്ല. തൃശൂർ തൃശൂർക്കാർക്കുള്ളത്. തൃശൂരെന്നും ജനങ്ങൾക്ക് ഇഷ്ടമുള്ളവരുടെ കയ്യിലാണ്..’ ടി.എൻ പ്രതാപൻ പറഞ്ഞു.

ചലച്ചിത്രതാരവും രാജ്യസഭാ എംപിയുമായ സുരേഷ് ഗോപിയുടെ സ്ഥാനാര്‍ത്ഥിത്വം കൊണ്ട് കൂടി ശ്രദ്ധേയമായിരുന്നു ഇത്തവണ തൃശൂരിലെ മത്സരം. വോട്ടെണ്ണലിന്‍റെ തുടക്കം മുതൽ സുരേഷ് ഗോപി മൂന്നാം സ്ഥാനത്തായിരുന്നു. ശക്തി കേന്ദ്രങ്ങളിൽ പോലും ആധിപത്യം ഉറപ്പിക്കാൻ സുരേഷ് ഗോപിക്കായില്ല. നാട്ടികയിലൊഴിച്ച് മറ്റ് ആറ് മണ്ഡലങ്ങളിലും പ്രതാപൻ തന്നെയാണ് ലീഡ് നിലനിർത്തിയത്..

ടി എൻ പ്രതാപൻ 415089 വോട്ടും, എൽഡിഎഫ‌് സ്ഥാനാർഥി സിപിഐയുടെ രാജാജി മാത്യൂ തോമസ‌് 321456 വോട്ടും നേടി. സുരേഷ‌് ഗോപിക്ക് 293822‌ വോട്ട് ലഭിച്ചു . എന്നാൽ കഴിഞ്ഞ ലോക്സഭാ തെരഞ്ഞെടുപ്പിൽ എൻഡിഎ ക്ക് ലഭിച്ചതിനേക്കാൾ രണ്ടു ലക്ഷത്തിലധികം വോട്ടുകൾ സുരേഷ് ഗോപിക്ക് മണ്ഡലത്തിൽ ലഭിച്ചു എന്ന് ആശ്വസിക്കാം .കഴിഞ്ഞതവണ എൻ ഡി എ ക്ക് 87803 വോട്ടുകളാണ് ലഭിച്ചിരുന്നത്