ഉള്ളൂരില്‍ മുഖ്യമന്ത്രി വി ഡി സതീശനെ വഴിയില്‍ തടഞ്ഞ കേസില്‍ ഡിസിസി മുന്‍ അംഗം ചേന്തി അനിലിന് ജാമ്യം. വഞ്ചിയൂര്‍ ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയാണ് ഉപാധികളോടെ ജാമ്യം അനുവദിച്ചത്. അന്വേഷണവുമായി സഹകരിക്കണം, അന്വേഷണ ഉദ്യോഗസ്ഥര്‍ക്ക് മുന്നില്‍ ഹാജരാകണം, സമാന കുറ്റകൃത്യങ്ങള്‍ ആവര്‍ത്തിക്കരുത് തുടങ്ങിയവയാണ് കോടതി മുന്നോട്ടുവച്ച ഉപാധികള്‍. മുഖ്യമന്ത്രിയോടൊപ്പം ഡ്യൂട്ടിയില്‍ ഉണ്ടായിരുന്നവരുടെ ഔദ്യോഗിക ചുമതല തടസപ്പെടുത്തിയതിന് വെള്ളിയാഴ്ച രാത്രിയോടെയാണ് ശ്രീകാര്യം പൊലീസ് ചേന്തി അനിലിനെ കസ്റ്റഡിയിലെടുത്തത്. പിന്നാലെ അടുത്തദിവസം രാവിലെ അറസ്റ്റ് രേഖപ്പെടുത്തി കോടതിയില്‍ ഹാജരാക്കി. കഴിഞ്ഞദിവസം തെളിവെടുപ്പിനായി അനിലിനെ പൊലീസ് കസ്റ്റഡിയില്‍ വിട്ടിരുന്നു.

28ാം തീയതി വൈകിട്ട് ഉള്ളൂരിന് സമീപം ചേന്തിയില്‍ വച്ചാണ് കേസിനാസ്പദമായ സംഭവം നടന്നത്. ചതയദിന പരിപാടിയില്‍ മുഖ്യമന്ത്രി പങ്കെടുക്കാത്തതില്‍ പ്രതിഷേധിച്ചാണ് ഇയാള്‍ വാഹനവ്യൂഹം തടഞ്ഞത്. മുതിര്‍ന്ന കോണ്‍ഗ്രസ് നേതാവ് പീതാംബരകുറുപ്പ് അടക്കമുള്ളവരെക്കണ്ട മുഖ്യമന്ത്രി വാഹനം നിറുത്തി ഇറങ്ങിയപ്പോള്‍ ചേന്തി അനിലിന്റെ നേതൃത്വത്തില്‍ മാര്‍ഗ്ഗ തടസം ഉണ്ടാക്കിയെന്നാണ് എഫ്‌ഐആറില്‍ പറയുന്നത്. 'ഏറ്റിരുന്ന പരിപാടിക്ക് വരാത്തതെന്തെന്ന് ' അനില്‍ മുഖ്യമന്ത്രിയോട് ചോദിച്ചപ്പോള്‍ 'നീ എന്തിനാണ് ദേഷ്യപ്പെടുന്നതെന്ന് ' മുഖ്യമന്ത്രി പ്രതികരിച്ചു. 'ചൂടായാല്‍ എന്തുചെയ്യുമെന്ന് ' അനില്‍ തിരിച്ചു ചോദിച്ചെന്നും എഫ്‌ഐആറിലുണ്ട്. എന്നാല്‍ പരിപാടിയില്‍ പങ്കെടുക്കരുതെന്ന് സ്‌പെഷ്യല്‍ ബ്രാഞ്ച് നിര്‍ദ്ദേശം നല്‍കിയിരുന്നെന്നാണ് മുഖ്യമന്ത്രിയുടെ ഓഫീസ് അറിയിച്ചത്.