പുതിയ കാര്‍ വാങ്ങിയതിന്റെ ആഘോഷമായി ഹൈവേയില്‍ വാഹനങ്ങള്‍ നിര്‍ത്തി റീല്‍ ചിത്രീകരിച്ച സംഭവത്തില്‍ പൊലീസ് നടപടി. മഹീന്ദ്ര ബിഇ6 ഉള്‍പ്പെടെയുള്ള വാഹനങ്ങള്‍ ഉപയോഗിച്ച് തിരക്കേറിയ റോഡില്‍ ഗതാഗതം തടസപ്പെടുത്തി ചിത്രീകരണം നടത്തിയെന്ന പരാതിയിലാണ് പൊലീസ് കേസെടുത്തത്. സംഭവത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ വൈറലായതിന് പിന്നാലെയാണ് നടപടി. സംഭവത്തില്‍ മഹീന്ദ്ര ബിഇ6ന്റെ ഉടമയെയും അജയ് സംഭാജി യാദവ് എന്നയാളെയും ഭാവ്ധന്‍ പൊലീസ് കസ്റ്റഡിയിലെടുത്തു. ടൊയോട്ട ഫോര്‍ച്യൂണറുകളുടെ െ്രെഡവര്‍മാരെയും റീല്‍ ചിത്രീകരിക്കാന്‍ നിയോഗിച്ച ഫോട്ടോഗ്രാഫറെയും ഉള്‍പ്പെടെ മറ്റ് ചിലര്‍ക്കെതിരെയും കേസെടുത്തിട്ടുണ്ട്.

ഓഗസ്റ്റ് 27ന് വൈകിട്ട് 4.15ഓടെയാണ് സംഭവം നടന്നത്. പൂനൈ-ബംഗളൂരു ഹൈവേയില്‍ വാകഡിലെ സഹ്യാദ്രി മഹീന്ദ്ര ഷോറൂമിനും ഭുജ്ബല്‍ ചൗക്കിനുമിടയിലുള്ള തിരക്കേറിയ ഭാഗത്തായിരുന്നു വാഹനങ്ങളുടെ റീല്‍ ചിത്രീകരണം. പുതിയതായി വാങ്ങിയ കറുത്ത നിറത്തിലുള്ള . മഹീന്ദ്ര ബിഇ6നൊപ്പം ടൊയോട്ട ഫോര്‍ച്യൂണര്‍ ഉള്‍പ്പെടെയുള്ള വാഹനങ്ങളും സംഘത്തിലുണ്ടായിരുന്നു.

സമൂഹമാദ്ധ്യമങ്ങളില്‍ പ്രചരിച്ച വീഡിയോകളില്‍ മുന്‍ഭാഗത്ത് വലിയ മാല ചാര്‍ത്തിയ മഹീന്ദ്ര ബിഇ6 ഹൈവേയിലൂടെ സഞ്ചരിക്കുന്നതായി കാണാം. ടൊയോട്ട ഫോര്‍ച്യൂണറും നിരവധി എസ്‌യുവികളും മറ്റ് വാഹനങ്ങളും ഉള്‍പ്പെട്ട വാഹനവ്യൂഹമാണ് റോഡിലൂടെ സഞ്ചരിച്ചത്. റീല്‍ ചിത്രീകരിക്കാനും ഡ്രോണ്‍ ഉപയോഗിച്ച് ദൃശ്യങ്ങള്‍ പകര്‍ത്താനും വാഹനങ്ങള്‍ ഹൈവേയില്‍ മനഃപൂര്‍വം വേഗം കുറയ്ക്കുകയും ചില ഘട്ടങ്ങളില്‍ ഗതാഗതം തടസപ്പെടുത്തുകയും ചെയ്‌തെന്നാണ് പൊലീസിന് പരാതി ലഭിച്ചത്. ഇതോടെ വാഹനങ്ങളുടെ നീണ്ട നിര രൂപപ്പെടുകയും റോഡിലെ ഗതാഗതം തടസപ്പെടുകയും ചെയ്തു.