ഇനിയല്ലോ പൂരം... മുഖ്യമന്ത്രി പിണറായിയുടെ പ്രവര്ത്തനങ്ങളാണ് തോല്വിക്ക് കാരണമെന്ന് നേരിട്ട് പറയാന് നേതാക്കള്ക്ക് ഇപ്പോഴും വിമുഖത; സംസ്ഥാന സെക്രട്ടേറിയറ്റില് ആദ്യ വെടി പൊട്ടിയോടെ ഇനിയുള്ള സംസ്ഥാന കമ്മിറ്റി നിര്ണായകമാകും
ദയനീയ തോല്വിക്ക് കാരണം മുഖ്യമന്ത്രി പിണറായി വിജയന്റെ ശൈലിയാണെന്നെ ആരോപണം പരോക്ഷമായി ഉന്നയിച്ച് സിപിഎം സംസ്ഥാന സെക്രട്ടേറിയറ്റില് ആദ്യ വെടി വെള്ളിയാഴ്ച പൊട്ടി. സംസ്ഥാനസമിതി ശൈലീമാറ്റവും തീരുമാനങ്ങളുടെ പുന:പരിശോധനയും പരസ്യമായി ആവശ്യപ്പെടുന്നത് ആദ്യത്തെ സംഭവമാണ്.
മുഖ്യമന്ത്രിക്കെതിരെ പരസ്യമായ പ്രസ്താവന നടത്താന് സംസ്ഥാന സമിതി അംഗങ്ങള് തയ്യാറായിരുന്നില്ല. എന്നാല് ഓരോരുത്തരുടെയും മനസില് നിറഞ്ഞത് ഇതേ വികാരമാണ്. സംസ്ഥാനത്ത് മത്സരിച്ച 20 ഇടതുമുന്നണി സ്ഥാനാര്ത്ഥികളുടെയും ഉള്ളിലെ വേദനയാണ് പിണറായിയുടെ ശൈലി. വളരെ മുമ്പേ ഇത്തരം നീക്കങ്ങള് പാര്ട്ടിക്ക് അപകടകരമാകുമെന്ന് കേടിയേരി ബാലകൃഷണന് പിണറായിക്ക് മുന്നറിയിപ്പ് നല്കിയിരുന്നതാണ്. എന്നാല് നവോത്ഥാന നായകനാവാനുള്ള വെപ്രാളത്തില് പിണറായി അതെല്ലാം മറന്നു. ചരിത്രത്തില് ഇടം നേടാനുള്ള ശ്രമമാണ് പിണറായി നടത്തിയത്. എന്നാല് ചരിത്രത്തില് നിന്നും തന്റെ പാര്ട്ടിയെ ഇല്ലാതാക്കിയതിന്റെ ക്രെഡിറ്റാണ് പിണറായിക്ക് ഇപ്പോള് ലഭിച്ചുകൊണ്ടിരിക്കുന്നത്.
ലോകസഭാ തെരഞ്ഞെടുപ്പിലുണ്ടായ തോല്വി ഇടതുപക്ഷത്തിനുണ്ടായ താത്ക്കാലികമായ തിരിച്ചടിയാണെന്നാണ് പാര്ട്ടി സംസ്ഥാന സെക്രട്ടേറിയറ്റ് വിലയിരുത്തിയത് . സംസ്ഥാനകമ്മിറ്റി മുതല് യൂത്ത് കമ്മിറ്റി വരെ പരിശോധന നടത്തി കുറവുകള് കണ്ടെത്തി ആവശ്യമായ തിരുത്തലുകള് വരുത്തി നഷ്ടപ്പെട്ട ജനവിശ്വാസം തിരിച്ചുപിടിക്കും. ബി.ജെ.പിയെ പരാജയപ്പെടുത്തുക, മതനിരപേക്ഷ സര്ക്കാര് രൂപീകരിക്കുക, ഇടതുപക്ഷത്തിന്റെയും സി.പി.ഐ (എം)ന്റെയും അംഗബലം വര്ധിപ്പിക്കുക എന്ന നയത്തിന്റെ അടിസ്ഥാനത്തിലാണ് തെരഞ്ഞടുപ്പില് സി.പി.ഐ (എം) ജനങ്ങള സമീപിച്ചത്.
നരേന്ദ്രമോദി സര്ക്കാര് അധികാരത്തില് തുടര്ന്നാലുണ്ടാകുന്ന അപകടം സമൂഹത്തില് ശരിയായി പ്രചരിപ്പിക്കുന്നതില് ഇടതുപക്ഷം വിജയിച്ചു. എന്നാല് ഇതിന്റെ നേട്ടം യു.ഡി.എഫിനാണുണ്ടായത്. ഒരു മതനിരപേക്ഷ സര്ക്കാര് രൂപീകരിക്കുന്നതിന് കോണ്ഗ്രസിന് കഴിയുമെന്ന ചിന്തയിലാണ് വിവിധ ജനവിഭാഗങ്ങള് യു.ഡി.എഫിന് അനുകൂലമായി വോട്ട് ചെയ്തത്. ദേശീയ രാഷ്ട്രീയത്തിന്റെ ഭാഗമായി സ്വീകരിച്ച ഈ സമീപനമാണ് ജനവിധിയില് സ്വാധീനിച്ചതെന്ന് പാര്ട്ടി സംസ്ഥാന കമ്മിറ്റി വിലയിരുത്തി.
ഇടതുപക്ഷത്തിന് സ്ഥിരമായി ലഭിച്ചുകൊണ്ടിരുന്ന പരമ്പരാഗത വോട്ടുകളിലും നഷ്ടമുണ്ടായിട്ടുണ്ടെന്നാണ് പ്രാഥമിക വിലയിരുത്തല്. വിശ്വാസികളില് ഒരു വിഭാഗത്തെ തെറ്റിദ്ധരിപ്പിക്കുന്നതില് വലതുപക്ഷ ശക്തികള് വിജയിച്ചിട്ടുണ്ടെന്നാണ് കണക്കുകള് വ്യക്തമാക്കുന്നത്. ഇതിലേക്ക് നയിച്ച കാരണങ്ങളെക്കുറിച്ച് പാര്ടി പരിശോധിക്കും. ഗൗരവമായ പരിശോധനയിലൂടെ കുറവുകള് തിരുത്തി നഷ്ടപ്പെട്ട ജനപിന്തുണ ആര്ജ്ജിക്കുന്നതിനും എല്ലാ തലങ്ങളിലും പാര്ടി ഒറ്റക്കെട്ടായി ശ്രമിക്കുമെന്നും പാര്ട്ടി പ്രസ്താവനയില് പറഞ്ഞു.
വരും ദിവസങ്ങളില് പിണറായിക്കെതിരെ കൂടുതല് രൂക്ഷമായ പ്രതികരണങ്ങള് ഉണ്ടാകാന് സാധ്യതയുണ്ട്. കോടിയേരിയുടെയും വി എസിന്റെയും നേതൃത്വത്തില് ഇതിനെ പ്രോത്സാഹിപ്പിക്കുന്ന നടപടികളും ഉണ്ടാകും. 2004 ല് സമാനമായ അവസ്ഥയാണ് കോണ്ഗ്രസില് ഉണ്ടായത്. ആര്ക്കും പ്രതിരോധിക്കാന് കഴിയാതിരുന്ന എ.കെ. ആന്റണിക്കെതിരെ നിഗൂഢ നീക്കങ്ങളാണ് അന്ന് ആദ്യമുണ്ടായത്. 2004 ല് പാര്ലെമെന്റ് തെരഞ്ഞടുപ്പില് കോണ്ഗ്രസിനേറ്റ ദയനീയ പരാജയം ആന്റണിയുടെ രാജിയിലേക്ക് വഴിമാറിയത് അങ്ങനെയാണ്. ഇക്കുറി രാജിവച്ചില്ലെങ്കിലും 6 നിയമസഭാ സീറ്റുകളിലേക്ക് നടക്കുന്ന തെരഞ്ഞടുപ്പില് ആറിലും തോറ്റാല് പിണറായിക്ക് പിടിച്ചുനില്ക്കാനാവില്ല.
https://www.facebook.com/Malayalivartha