രാജ്യം മൊത്തം മാറി ചിന്തിച്ചിട്ടും എന്തിന് ബംഗാളില്‍ പോലും വലിയ ചലനമുണ്ടാക്കിയിട്ടും എന്തേ കേരളം മാറാത്തത്? പത്തനംതിട്ടയിലെയും തിരുവനന്തപുരത്തെയും പരാജയത്തിനു കാരണം ബി.ജെ.പി. അധ്യക്ഷന്‍ അമിത് ഷാ നേരിട്ട് അന്വേഷിക്കും. രാജ്യമാകെ മോഡി തരംഗം അലയടിച്ച തെരഞ്ഞെടുപ്പില്‍ അതിനൊപ്പമുയരാന്‍ സംസ്ഥാന നേതൃത്വത്തിനു കഴിഞ്ഞില്ലെന്ന റിപ്പോര്‍ട്ടാണ് അദ്ദേഹത്തിനു മുന്നിലുള്ളത്. അനുകൂല സാഹചര്യങ്ങള്‍ പ്രയോജനപ്പെടുത്താന്‍ കഴിയാതിരുന്നതിന് ഒഴിവുകഴിവുകള്‍ കേള്‍ക്കാന്‍ ഷാ തയാറല്ല.

മോഡിപ്രഭാവം അവഗണിച്ച് പ്രചാരണത്തില്‍ ശബരിമല വിഷയത്തിനു മാത്രം പ്രാധാന്യം നല്‍കിയതിനു സംസ്ഥാന നേതൃത്വം മറുപടി പറയേണ്ടിവരും. സ്വകാര്യ ഏജന്‍സിയെക്കൊണ്ട് വിശദമായ പഠനവും സര്‍വേയും നടത്തിയതിനു ശേഷമാണു മിസോറം ഗവര്‍ണര്‍ പദവി രാജിവയ്പിച്ച് കുമ്മനം രാജശേഖരനെ അമിത് ഷാ തിരുവനന്തപുരത്തേക്കയച്ചത്. വിജയിച്ചുവരുന്ന കുമ്മനത്തിന്റെ മന്ത്രിസഭാ പ്രവേശനം സംസ്ഥാനത്തു ബി.ജെ.പിയുടെ വളര്‍ച്ചയ്ക്ക് ചവിട്ടുപടിയാക്കാനും ലക്ഷ്യമിട്ടു. 

തിരുവനന്തപുരം സീറ്റ് മോഹിച്ച സംസ്ഥാന അധ്യക്ഷന്‍ പി.എസ്. ശ്രീധരന്‍ പിള്ളയെ തള്ളി കുമ്മനത്തെ സ്ഥാനാര്‍ഥിയാക്കിയതില്‍ സംസ്ഥാന നേതൃത്വത്തിലെ ഒരു വിഭാഗത്തിനുണ്ടായ അതൃപ്തി ദേശീയ നേതൃത്വത്തിന്റെ ശ്രദ്ധയില്‍പ്പെടുകയും ചെയ്തിരുന്നു. ശശി തരൂരിനോട് ഒരു ലക്ഷത്തോളം വോട്ടിനു പരാജയപ്പെട്ട കുമ്മനം വട്ടിയൂര്‍ക്കാവ് ഉള്‍പ്പെടെ പാര്‍ട്ടിയുടെ ശക്തികേന്ദ്രങ്ങളില്‍ പിന്നിലായതിനു ജില്ലാ നേതൃത്വവും മറുപടി നല്‍കേണ്ടിവരും. 

കഴക്കൂട്ടത്തും കോവളത്തും പാറശാലയിലും നെയ്യാറ്റിന്‍കരയിലും നേമത്തും മറ്റും പ്രതീക്ഷിച്ച വോട്ട് കിട്ടാതെപോയതു ചില സംസ്ഥാന നേതാക്കളെയും പ്രതിക്കൂട്ടിലാക്കും. തിരുവനന്തപുരത്തും പത്തനംതിട്ടയിലും വിജയം, സംസ്ഥാനത്ത് 20 ശതമാനം വോട്ട്, പത്തു നിയമസഭാ മണ്ഡലങ്ങളില്‍ ഒന്നാം സ്ഥാനം എന്നിങ്ങനെയായിരുന്നു അമിത് ഷായ്ക്കു കിട്ടിയ റിപ്പോര്‍ട്ട്. ചില ജില്ലാ, സംസ്ഥാന നേതാക്കള്‍ കെ. സുരേന്ദ്രനെതിരേ രംഗത്തുവന്നതു ഗൗരവമായെടുക്കും. 

ശക്തമായ വേരോട്ടമുള്ള അടൂരിലും കോന്നിയിലും ആറന്മുളയിലും ഒന്നാം സ്ഥാനം ലഭിക്കാതെ പോയതും അന്വേഷിക്കും. തൃശൂരില്‍ സുരേഷ് ഗോപിയും ആറ്റിങ്ങലില്‍ ശോഭാ സുരേന്ദ്രനും മികച്ച പ്രകടനം കാഴ്ചവച്ചതും സംസ്ഥാനത്തു പൊതുവേ വോട്ട് വര്‍ധിച്ചതും മാത്രമാണ് നേട്ടത്തിന്റെ പട്ടികയില്‍ പെടുത്താവുന്നത്.

അതേസമയം ശബരിമല യുവതി പ്രവേശനം കൊണ്ടുണ്ടായ പ്രശ്‌നങ്ങളുടെ നേട്ടം ബിജെപ്പിക്ക് ഗുണം ചെയ്തില്ലെന്ന് എം എല്‍ എ ഒ രാജഗോപാല്‍ വ്യക്തമാക്കി. എന്നാല്‍ ശബരിമല പ്രശ്‌നം വന്നപ്പോള്‍ ഒരു ചെറുവിരല്‍ പോലും അനക്കാത്ത യുഡിഎഫിനാണ് ഗുണം കിട്ടിയതെന്നും അദ്ദേഹം പറഞ്ഞു. അതുകൊണ്ടാണ് കെ സുരേന്ദ്രന് പത്തനംതിട്ടയില്‍ പോലും വിചാരിച്ച അത്രയും വോട്ട് ലഭിക്കാതിരുന്നതെന്നും അദ്ദേഹം പറഞ്ഞു.

സിപിഎമ്മില്‍ നിന്നും യുഡിഎഫിലേക്ക് വോട്ട് മറിഞ്ഞിട്ടുണ്ടെന്നും അദ്ദേഹം ആരോപിച്ചു. സിപിഎമ്മിന്റെ അറിയപ്പെടുന്ന ചില നേതാക്കളാണ് വോട്ട് യുഡിഎഫിന് മറിച്ചതെന്നും അദ്ദേഹം പറഞ്ഞു. ബിജെപിക്ക് കൂടുതല്‍ വോട്ട് കിട്ടേണ്ടിയിരുന്ന നേമത്തും കഴക്കൂട്ടത്തും പ്രതീക്ഷിച്ചത്രയും വോട്ട് നേടാനായില്ല. ഇതിന് കാരണം ബിജെപി ജയിക്കോമോന്നുള്ള ഭയം കാരണം യുഡിഎഫിലേക്ക് സിപിഎം വോട്ട് മറിച്ചതാണെന്നും അദ്ദേഹം ആരോപിച്ചു. താന്‍ പരാജയപ്പെടുത്തിയ സിപിഎം നേതാക്കളും വോട്ട് മറിച്ചു. പല നേതാക്കളുടെയും പേരുപറയാതെയായിരുന്നു രാജഗോപാലിന്റെ ആരോപണം. 

തനിക്ക് വ്യക്തിപരമായി കിട്ടിയ വോട്ടു പോലും തിരുവനന്തപുരത്ത് കുമ്മനം രാജശേഖരന് കിട്ടിയില്ലെന്നും, കഴിഞ്ഞ തവണ എന്‍ഡിഎയ്ക്ക് ലഭിച്ച വോട്ടിന്റെ കുറച്ചു മാത്രമേ ലഭിച്ചുള്ളുവെന്നും അദ്ദേഹം പറഞ്ഞു.