ലോക്‌സഭ തെരഞ്ഞെടുപ്പില്‍ യുഡിഎഫ് തൂത്തു വാരിയതോടെ എല്‍ഡിഎഫിനോട് ഒപ്പം നിന്ന വെള്ളാപ്പള്ളി നടേശനും ഘടകകക്ഷി നേതാവ് കൂടിയായ ബാലകൃഷ്ണ പിള്ളയും കാലുമാറി. തോല്‍വിയുടെ ഉത്തരവാദിത്വം ശബരിമലയിലൂന്നി ആഞ്ഞടിക്കുകയാണ് ഇരുവരും. 

ഇടതുപക്ഷത്തെ വളര്‍ത്തിയത് ഈഴവരുടെ ചോരയും നീരുമാണെന്നും എന്നിട്ടും ഈഴവരെ സര്‍ക്കാര്‍ വേണ്ടവിധം പരിഗണിക്കുന്നില്ലെന്നും എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. വനിതാമതില്‍ കെട്ടിയതിന്റെ അടുത്തദിവസം തന്നെ പൊളിച്ചെന്നും ശബരിമല പ്രശ്‌നം കൈകാര്യം ചെയ്ത രീതി ചിലരില്‍ ആശങ്കയുണ്ടാക്കിയെന്നും അദ്ദേഹം അഭിപ്രായപ്പെട്ടു.

ആലപ്പുഴയില്‍ എല്‍.ഡി.എഫ് സ്ഥാനാര്‍ഥി എ.എം ആരിഫിനെ ജയിപ്പിച്ചത് ചേര്‍ത്തലയിലെ ഈഴവരാണ്. ആരിഫിനെ ജയിപ്പിക്കണമെന്ന നിര്‍ദേശം പ്രവര്‍ത്തകര്‍ക്കു നല്‍കിയിരുന്നു. എന്നെ ആക്രമിച്ച കോണ്‍ഗ്രസിനെതിരേ പ്രതികാരം ചെയ്‌തെന്നും അദ്ദേഹം പറഞ്ഞു. ശബരിമല വിധി ധൃതിപിടിച്ച് നടപ്പാക്കേണ്ടിയിരുന്നില്ലെന്നും വെള്ളാപ്പള്ളി അഭിപ്രായപ്പെട്ടു.

കേരളത്തിലെ 20 മണ്ഡലങ്ങളില്‍ 19 എണ്ണത്തിലും യു.ഡി.എഫ് ജയിച്ചപ്പോള്‍ ആലപ്പുഴയില്‍ മാത്രമായിരുന്നു എല്‍.ഡി.എഫിന്റെ വിജയം. ആരിഫ് ജയിച്ചില്ലെങ്കില്‍ തല മുണ്ഡനം ചെയ്ത് താന്‍ കാശിക്ക് പോകുമെന്ന് നേരത്തെ വെള്ളാപ്പള്ളി പ്രഖ്യാപിച്ചിരുന്നു. ആലപ്പുഴയില്‍ നാമനിര്‍ദേശ പത്രിക കൊടുത്തുകഴിഞ്ഞപ്പോള്‍ തന്നെ ആരിഫ് വിജയിച്ചുകഴിഞ്ഞെന്നും ആരിഫിനോട് കോണ്‍ഗ്രസ് മത്സരിക്കുന്നത് ആനയോട് എലി മത്സരിക്കുന്നതുപോലെയാണെന്നും വെള്ളാപ്പള്ളി പറഞ്ഞിരുന്നു.

ആരിഫ് ജയിക്കില്ലെന്ന് നിങ്ങള്‍ക്ക് തോന്നുന്നുണ്ടോ ? ആരിഫ് ജയിച്ചില്ലെങ്കില്‍ തല മുണ്ഡനം ചെയ്ത് കാശിക്ക് പോകും. അയാള്‍ ഒരു ജനകീയനാണ്. അയാള്‍ ജനങ്ങളുടെ ഇടയില്‍ 24 മണിക്കൂറും പ്രവര്‍ത്തിക്കുന്ന ആളാണ്. മറ്റുള്ളവരൊക്കെ ഇടയ്ക്ക് വന്നുപോകുന്നവരാണ് എന്നുമായിരുന്നു വെള്ളാപ്പള്ളിയുടെ പ്രസ്താവന.

പിന്നീട് തല മൊട്ടയടിക്കുന്ന കാര്യം വെറുതെ പറഞ്ഞതാണെന്നും വെള്ളാപ്പള്ളി നടേശന്‍ പറഞ്ഞിരുന്നു. ഇരുപത് ലോക്‌സഭ മണ്ഡലത്തില്‍ ആലപ്പുഴയില്‍ മാത്രമാണ് ഇടതുപക്ഷത്തിന് വിജയിക്കാനായത്. 9000 ത്തിലധികം വോട്ടുകളുടെ ഭൂരിപക്ഷത്തിനാണ് എ.എം ആരിഫ് വിജയിച്ചത്.

അതേസമയം സുകുമാരന്‍നായരെ അനുസരിക്കാതെ മാറിനിന്ന ബാലകൃഷ്ണ പിള്ള ശരിക്കും വെള്ളം കുടിച്ചു. തന്റെ തട്ടകത്തില്‍ സുകുമാരന്‍നായര്‍ ശരിക്കും കളിച്ചു. ഫലമോ ബാലകൃഷ്ണ പിള്ളയുടെ പാര്‍ട്ടി എല്‍ഡിഎഫില്‍ വന്നിട്ടും ഒരു കാര്യമില്ലാതായി. കൊടിക്കുന്നില്‍ സുരേഷ് വലിയ ഭൂരിപക്ഷത്തില്‍ ജയിച്ചു. ഇതോടെ നില്‍ക്കക്കള്ളി നഷ്ടപ്പെട്ട പിള്ള സുകുമാരന്‍ നായരെ പുകഴ്ത്തുകയാണ്. ഒപ്പം ശബരിമലയില്‍ സര്‍ക്കാരിന്റെ നിലപാടുകളെ വിമര്‍ശിക്കുകയും ചെയ്യുന്നു. 

മകനും ബിഡിജെഎസ് അധ്യക്ഷനുമായ തുഷാര്‍ വെള്ളാപ്പള്ളിക്കു വയനാട് നിയോജക മണ്ഡലത്തില്‍ മാവേലിക്കരയിലെ ബിഡിജെഎസ് സ്ഥാനാര്‍ഥിയേക്കാള്‍ വോട്ടു കുറഞ്ഞതിനു പിന്നില്‍ സംഘടനാ പാളിച്ചകളുണ്ടായെന്നും വെള്ളാപ്പള്ളി പറഞ്ഞു. തൃശൂരില്‍ മത്സരിക്കുന്നതായിരുന്നു തുഷാറിനു നല്ലത്. അവിടെ സംഘടനാ സംവിധാധനം ശക്തവും സമുദായത്തിനു സ്വാധീനവുമുണ്ട്. രണ്ടു മണ്ഡലമായാലും പരാജയം ഉറപ്പായിരുന്നു. ഉറുമ്പുകടിച്ചു ചാവുന്നതിനെക്കാളും നല്ലത് ആനകുത്തി ചാവുന്നതിനാലാണ് വയനാടു തിരഞ്ഞെടുത്തതെന്നുമാണ് വെള്ളാപ്പള്ളിയുടെ വിലയിരുത്തല്‍.