ലോക്‌സഭാ തെരഞ്ഞെടുപ്പിലുണ്ടായ കനത്ത തോല്‍വിയില്‍ ആകെ മനം മടുത്തിരിക്കുകയാണ് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. അമേഠിയില്‍ സ്മൃതി ഇറാനിയോട് തോറ്റത് വലിയ മാനസിക പ്രശ്‌നങ്ങളുണ്ടാക്കി. കോണ്‍ഗ്രസ് അധ്യക്ഷ പദവി രാജി വയ്ക്കാനൊരുങ്ങുകയാണ് രാഹുല്‍ ഗാന്ധി. പലരും നിര്‍ബന്ധിച്ചിട്ടും രാജിവെക്കാനുള്ള തീരുമാനത്തില്‍ രാഹുല്‍ ഗാന്ധി ഉറച്ച് നില്‍ക്കുന്നതോടെ പകരം ആളെ തേടിയുള്ള ചര്‍ച്ചകള്‍ സജീവമായി. രാജി തീരുമാനത്തില്‍ നിന്ന് രാഹുലിനെ പിന്‍മാറ്റാന്‍ മുതിര്‍ന്ന നേതാക്കളും അമ്മ സോണിയയും സഹോദരി പ്രിയങ്കയുമടക്കം നടത്തിയ ശ്രമങ്ങള്‍ ഫലം കാണാത്തതിനെ തുടര്‍ന്നാണ് പുതിയ ആളെ കണ്ടെത്താന്‍ കോണ്‍ഗ്രസ് ശ്രമം നടത്തുന്നത്.

രാജസ്ഥാന്‍ ഉപമുഖ്യമന്ത്രി സച്ചിന്‍ പൈലറ്റിന്റെ പേരാണ് ഇപ്പോള്‍ ചര്‍ച്ചയില്‍ ഉയര്‍ന്ന് കേള്‍ക്കുന്നത്. ജ്യോതിരാദിത്യ സിന്ധ്യ, പൃഥ്വിരാജ് ചൗഹാന്‍, എ.കെ.ആന്റണി തുടങ്ങിയ നേതാക്കളുടെ പേരുകളും ചര്‍ച്ചയില്‍ വരുന്നുണ്ട്. എന്നാല്‍ സംഘടനാപാടവത്തില്‍ മികവ് തെളിയിച്ചിട്ടുള്ള സച്ചിന്‍ പൈലറ്റിന്റെ പേരിനാണ് ചര്‍ച്ചകളില്‍ മുന്‍ഗണ ലഭിക്കുന്നത്. സച്ചിന്‍ പൈലറ്റിന്റെ നേതൃത്വത്തിലായിരുന്നു രാജസ്ഥാനില്‍ കോണ്‍ഗ്രസ് ഭരണം പിടിച്ചെടുത്തത്. യുവജന നേതാവ് എന്ന വിശേഷണവും സച്ചിന്റെ സ്വീകാര്യത വര്‍ധിപ്പിക്കുന്നു.

അതേ സമയം ലോക്‌സഭാ തിരഞ്ഞെടുപ്പിലുണ്ടായ കനത്ത തോല്‍വിയില്‍ രാജസ്ഥാനില്‍ കോണ്‍ഗ്രസിനുള്ളില്‍ പൊട്ടിത്തെറി ഉടലെടുത്തിട്ടുണ്ട്. മുഖ്യമന്ത്രി അശോക് ഗെഹ്‌ലോതിന്റെ പിടിപ്പ്‌കേടാണ് തോല്‍വിക്ക് പിന്നിലെന്ന കുറ്റപ്പെടുത്തലുമായി സച്ചിന്‍ വിഭാഗം പരസ്യമായി രംഗത്തെത്തി. അശോക് ഗെഹ്‌ലോത് അടക്കമുള്ള മുതിര്‍ന്ന നേതാക്കള്‍ മക്കള്‍ക്ക് സീറ്റ് ഉറപ്പിക്കുന്നതില്‍ ശ്രദ്ധ കേന്ദ്രീകരിച്ചെന്ന് പേരെടുത്ത് പറയാതെ കോണ്‍ഗ്രസ് പ്രവര്‍ത്തക സമിതി യോഗത്തില്‍ രാഹുല്‍ ഗാന്ധി വിമര്‍ശിക്കുകയും ചെയ്തിരുന്നു. ജോധ്പുരില്‍ മത്സരിച്ച ഗെഹ്‌ലോന്റെ മകന്‍ വൈഭവ് ഗെഹ്‌ലോത്തടക്കം സംസ്ഥാനത്തെ 25 സീറ്റുകളിലും കോണ്‍ഗ്രസ് പരാജയപ്പെട്ടു. 

സച്ചിന്‍ പൈലറ്റിനെ മുഖ്യമന്ത്രിയാക്കണമെന്നാവശ്യപ്പെട്ട് ഒരു വിഭാഗം രംഗത്തെത്തുകയും ചെയ്തിട്ടുണ്ട്. ഇതിനിടെയാണ് കോണ്‍ഗ്രസ് അധ്യക്ഷ പദവി സംബന്ധിച്ചുള്ള ചര്‍ച്ചകള്‍ക്ക് ചൂട്പിടിക്കുന്നത്. 2004ല്‍ തന്റെ 26ാം വയസില്‍ ദൗസ മണ്ഡലത്തില്‍ 1.2 ലക്ഷം വോട്ടുകള്‍ വിജയിച്ച് രാജ്യത്തെ ഏറ്റവും പ്രായം കുറഞ്ഞ എംപിയായിട്ടുള്ള ആളാണ് സച്ചിന്‍ പൈലറ്റ്. ഇതടക്കം മൂന്ന് തവണ ലോക്‌സഭാ അംഗമായിട്ടുള്ള പൈലറ്റ് രണ്ടാം യുപിഎ സര്‍ക്കാരില്‍ കോര്‍പ്പറേറ്റ് അഫേഴ്‌സ് മന്ത്രിയായും പ്രവര്‍ത്തിച്ചിട്ടുണ്ട്.

എന്നാല്‍ നെഹ്‌റു കുടുംബാംഗമെന്ന നിലയില്‍ രാഹുല്‍ സ്വീകാര്യനായത് പോലെ മുതിര്‍ന്ന നേതാക്കള്‍ ജൂനിയറായ സച്ചിന്‍ പൈലറ്റിനോട് താത്പര്യം കാണിക്കുമോ എന്നുള്ള ചോദ്യവും ഉയരുന്നുണ്ട്.

തെരഞ്ഞെടുപ്പ് ഫലം പുറത്ത് വന്ന ഉടന്‍ തന്നെ രാജി സന്നദ്ധത രാഹുല്‍ സോണിയയെ അറിയിച്ചിരുന്നു. പ്രവര്‍ത്തക സമിതി യോഗത്തില്‍ തീരുമാനിക്കാം എന്നാണ് സോണിയ പറഞ്ഞത്. എന്നാല്‍ പ്രവര്‍ത്തക സമിതി യോഗത്തിലും അതിന് ശേഷവും രാജി തീരുമാനത്തില്‍ നിന്ന് പിന്നോട്ട് പോകാന്‍ രാഹുല്‍ തയ്യാറായില്ല. പുതുതായി തെരഞ്ഞെടുത്ത എംപിമാരുടേതടക്കമുള്ള എല്ലാ കൂടിക്കാഴ്ചകളും ഇന്ന് അദ്ദേഹം റദ്ദാക്കുകയും ചെയ്തു. 

നിലവില്‍ രാഷ്ട്രീയ അന്തരീക്ഷത്തില്‍ താത്കാലികമായിട്ടാണെങ്കിലും മാറി നില്‍ക്കുക എന്ന് നിലപാടില്‍ ഉറച്ചാണ് രാഹുലുള്ളതെന്ന് അദ്ദേഹവുമായി അടുത്ത വൃത്തങ്ങള്‍ അറിയിച്ചു. പിന്നോട്ടില്ല എന്നതായതോടെ രാജിവെക്കാനുള്ള തീരുമാനത്തിന് സോണിയയും പ്രിയങ്കയും അനുമതി നല്‍കിയതായാണ് റിപ്പോര്‍ട്ടുകള്‍.