തെരഞ്ഞെടുപ്പ് കഴിഞ്ഞില്ലേ.... നരേന്ദ്ര മോദിയുമായുള്ള ദീര്ഘനാളത്തെ സൗഹൃദം അതേപടി നിലനിര്ത്താന് പിണറായി; മസാല ബോണ്ടിനെപ്പറ്റി പറഞ്ഞ് പറഞ്ഞ് എത്തിയത് നരേന്ദ്ര മോദിയില്; നരേന്ദ്രമോദി സര്ക്കാരിന്റെ നവ ലിബറല് സമീപത്തിന്റെ ഭാഗമാണ് മസാല ബോണ്ട്
നരേന്ദ്ര മോദി രണ്ടാമത് പ്രധാനമന്ത്രിയായി അധികാരമേല്ക്കുന്നതിനു മുമ്പ് തന്നെ മുഖ്യമന്ത്രി പിണറായി വിജയന് അദ്ദേഹത്തെ മുന്നില് നിര്ത്തി അനുഗ്രഹ പ്രഭാഷണം തുടങ്ങി. നരേന്ദ്ര മോദിയുമായുള്ള ദീര്ഘനാളത്തെ സൗഹൃദം അതേപടി നിലനിര്ത്താന് ശ്രമിക്കുകയാണ് പിണറായി. മസാലബോണ്ടിനെ മുന്നില് നിര്ത്തിയാണ് പിണറായിയുടെ സാക്ഷ്യം പറച്ചില്.
നരേന്ദ്രമോദി ഗവണ്മെന്റ് ആവിഷ്കരിച്ച നവ ലിബറല് സമീപത്തിന്റെ ഭാഗമാണ് മസാല ബോണ്ട്. 2015 ല് ലണ്ടനിലെ ഡൗണ്സ്ട്രീറ്റ് പ്രസംഗത്തിലാണ് ആദ്യമായി മസാല ബോണ്ടിനെ കുറിച്ച് നരേന്ദ്രമോദി പ്രസംഗിച്ചത്. ആ പ്രഖ്യാപനത്തെ അന്നത്തെ ബ്രിട്ടീഷ് പ്രധാനമന്ത്രി ഉള്പ്പെടെയുള്ളവര് സ്വാഗതം ചെയ്തു. നമ്മുടെ രാജ്യത്ത് ഇന്ത്യന് രൂപയില്തന്നെ കടപ്പത്രങ്ങള് ഇറക്കി പണം സമാഹരിക്കുന്ന മസാല ബോണ്ടിനെക്കുറിച്ച് ധാരാളം വിവാദങ്ങള് പുറത്തുവന്നിരിക്കുകയാണ്. ഇന്ത്യന് റെയില്വേയില് പൂര്ണ്ണമായി വിദേശനിക്ഷേപം അനുവദിക്കുമെന്ന് പ്രഖ്യാപിച്ചതിനോടൊപ്പമാണ് ലണ്ടന് സ്റ്റോക്ക് എക്സ്ചേഞ്ചില് മസാല ബോണ്ടിന്റെ പ്രഖ്യാപനം നരേന്ദ്രമോദി നടത്തിയത്.
ഇതിന്ശേഷം ഇന്ത്യയിലെ മിക്കവാറും എല്ലാ പൊതുമേഖലാ സ്ഥാപനങ്ങളെയും സ്വകാര്യവത്ക്കരിക്കാനുള്ള നീക്കം നരേന്ദ്രമോദി നടത്തി. പ്രസ്തുത നയങ്ങള്ക്ക് കുടപിടിക്കുന്ന സമീപനമാണ് പിണറായി സ്വീകരിക്കുന്നത്. റീസ്ട്രക്ച്ചറിംഗ് എന്ന ഓമനപ്പേരില് വന്കിട പൊതുമേഖലാ സ്ഥാപനങ്ങളെ സ്വകാര്യവല്ക്കരിച്ചുകൊണ്ട് ബി.ജെ.പി. സര്ക്കാര് സ്വീകരിച്ച നടപടിയുടെ ഭാഗമായിരുന്നു മസാല ബോണ്ട്. പ്രസ്തുത ബോണ്ടിനെയാണ് ബി.ജെ.പി. ഗവണ്മെന്റ് പോലും സ്വീകരിക്കാത്ത ആവേശത്തോടെ കേരള സര്ക്കാര് സ്വീകരിക്കുന്നത് .
ബിജെപിക്കും കേന്ദ്ര സര്ക്കാരിനുമെതിരെ പിണറായി നിരന്തരം സംസാരിക്കുമെങ്കിലും അവര് തമ്മില് ഒരു അന്തര്ധാര നിലവിലുണ്ട്. ശബരിമല വിഷയം വഷളാക്കിയതില് ബിജെപി കടപ്പെട്ടിരിക്കുന്നത് പിണറായിയോടാണ്. എന്നാല് സി പി എം ബിജെപി ബന്ധത്തിലെ വാസ്തവം മനസിലാക്കിയാണ് കേരള ജനത കോണ്ഗ്രസ്സിന് വോട്ടു ചെയ്തത്. പക്ഷേ ഇങ്ങനെ സംഭവിക്കുമെന്ന് പിണറായിയും മോദിയും കരുതിയില്ല, ബിജെപിയുടെ ശബരിമല താത്പര്യം യാഥാര്ത്ഥ്യമായിരുന്നെങ്കില് വിധിയെ പ്രതിരോധിക്കാന് കേന്ദ്ര സര്ക്കാര് തീര്ച്ചയായും നിയമനിര്മ്മാണം നടത്തുമായിരുന്നു . ഇപ്പോള് നിയമനിര്മ്മാണം നടത്തുമെന്ന് പ്രഖ്യാപിച്ചിരിക്കുന്നത് രമേശ് ചെന്നിത്തലയാണ്.
നരേന്ദ്രമോദിക്ക് ഇത്തരം പാര്ട്ടി അതീതമായ ബന്ധങ്ങള് നിരവധിയാണ്. ചില കോണ്ഗ്രസ് നേതാക്കളുമായി മോദിക്ക് അടുത്ത ബന്ധമുണ്ട്. പ്രണബ്കുമാര് മുഖര്ജിയുമായുള്ള ബന്ധം ഉദാഹരണം. കോണ്ഗ്രസുമായുള്ള ബന്ധത്തില് നിന്ന് സീതാറാം യച്ചൂരിയെ വിലക്കിയത് പിണറായിയുടെ നേതൃത്വത്തില് കേരള സംസ്ഥാന കമ്മിറ്റിയാണ്. അതിന്റെ പ്രതിഫലനം ഇക്കഴിഞ്ഞ തെരഞ്ഞടുപ്പിലുമുണ്ടായിരുന്നു. പ്രതിപക്ഷ പാര്ട്ടികളെ ബി ജെ പി വിരുദ്ധമാക്കാതിരിക്കാന് പിണറായി പരിശ്രമിച്ചിരുന്നതായി ആരോപണമുയരന്നു. അത് ലാവ്ലിന് കേസില് നിന്നും ഊരാനുള്ള കുറുക്കുവഴിയായി തെറ്റിദ്ധരിക്കപ്പെട്ടിരുന്നു.
മസാലബാണ്ട് പ്രഖ്യാപനം മോദിയുടെ നിര്ദ്ദേശാനുസരണമാണോ പിണറായി നടത്തിയതെന്ന് വ്യക്തമല്ല. ഏതായാലും കേന്ദ്ര സര്ക്കാരിന്റെ അനുവാദമില്ലാതെ ഇത്തരമൊരു ബിസിനസില് കേരള സര്ക്കാരിന് ഇടപെടാന് കഴിയുകയില്ല. അതുകൊണ്ടു തന്നെ മസാല ബോണ്ടുകള് ഇനിയും ഇറങ്ങികൊണ്ടേയിരിക്കും, പിണറായിയും മോദിയും ഉള്ളിടത്തോളം കാലം.
https://www.facebook.com/Malayalivartha
