ഭാഷയുടെ അതിര്വരമ്പുകള് ചാടിക്കടന്ന് കുട്ടികളൊന്നായി; കനകക്കുന്നൊരു മിനി ഇന്ത്യയായി
തിരുവനന്തപുരം: ഭാഷയുടെ അതിര്വരമ്പുകള് ചാടിക്കടന്ന് ദേശീയ സഹവാസക്യാമ്പിലെ കുട്ടികള് ഒത്തൊരുമിച്ചു. അങ്ങനെ ദേശീയ ശിശുക്ഷേമസമിതിയുടെ ആഭിമുഖ്യത്തില് സംസ്ഥാന ശിശുക്ഷേമസമിതി കനകക്കുന്നില് നടത്തുന്ന ക്യാമ്പ് ഒരു കുഞ്ഞ് ഇന്ത്യയായി മാറി. തമിഴനും തെലുങ്കനും മലയാളിയും മണിപ്പൂരിയും വടക്ക്കിഴക്കന് സംസ്ഥാനങ്ങളിലുള്ളവരും രാജസ്ഥാനിയും പഞ്ചാബിയും ഒത്തൊരുമിച്ച് ഒരൊറ്റ ഇന്ത്യ, ഒരൊറ്റ ജനത എന്ന സന്ദേശം പകര്ന്നു. പല പല സംസ്ഥാനങ്ങളില് നിന്ന് വന്ന കുട്ടികളെ ഇടകലര്ത്തി ആറ് ഗ്രൂപ്പുകളാക്കി തിരിച്ചാണ് രണ്ടാം ദിവസം ക്യാമ്പ് അധികൃതര് വൈവിധ്യമാര്ന്ന പരിപാടികള് നടത്തിയത്. അത് കുട്ടികളില് ചിരി പടര്ത്തകയും ചിന്ത വിടര്ത്തുകയും ചെയ്തതിനൊപ്പം മാനസികമായ ഐക്യം സൃഷ്ടിക്കുന്നതിനും സഹായകമായി.
ആശയവിനിമയത്തിന് ഭാഷ തടസമല്ലെന്ന് ഓരോ പരിശീനല പരിപാടികളിലും പങ്കെടുത്ത കുട്ടികള് തെളിയിച്ചു. സൈക്കോളജിസ്റ്റും സോഫ്റ്റ് സ്കില് വിദഗ്ധനുമായ പ്രൊഫ. ജി. സുരേന്ദ്രനാഥിന്റെ നേതൃത്വത്തിലാണ് ക്യാമ്പിലുള്ള 250 കുട്ടികള്ക്ക് പരിശീലനം നല്കിയത്. കടലാസുകൊണ്ട് സതീന്ദ്രന് പന്തലക്കോട് തൊപ്പിയും കാറ്റാടിയും തവളയും ഉണ്ടാക്കുന്ന കരകൗശല ഇന്ദ്രജാലം കണ്ട് കുട്ടികള് അമ്പരന്നു. പലരും അവയെല്ലാം ഉണ്ടാക്കാന് പരിശ്രമിച്ചു. മേഘാലയയില് നിന്നുള്ള കുട്ടികള് തൊപ്പിയുണ്ടാക്കുന്നത് ഏറെ കൗതുകത്തോടെയാണ് കണ്ടത്. നിത്യജീവിതത്തില് സംഭവിക്കുന്നതും ചെയ്യുന്നതുമായ കാര്യങ്ങളുടെ ശാസ്ത്രീയ വശം കളികളിലൂടെ പകര്ന്ന് നല്കിയത് കുട്ടികള്ക്ക് പുതിയ അനുഭവമായി.
ജീവിതത്തിലെ പ്രശ്നങ്ങളും പ്രതിസന്ധികളും നേരിടാനും പരിഹരിക്കാനും കുട്ടികളെ പ്രാപ്തരാക്കാനുള്ള ലൈഫ് സ്കില്ലിനെ സംബന്ധിച്ച് പ്രിത ക്യാമ്പ് അംഗങ്ങളെ മനസ്സിലാക്കി. കാരയ്ക്കാമണ്ഡപം വിജയകുമാര് ചിത്രരചന,സി.പി അരവിന്ദാക്ഷന് ശാസ്ത്രം, നജീം ഇലക്ട്രോണിക്സ് എന്നിവയില് കുട്ടികള്ക്ക് പരിശീലനം നല്കി. ക്യാമ്പ് ഡയറക്ടര്മാരായ പ്രമോദ്, ബിന്ദു എന്നിവര് നേതൃത്വം നല്കി.
https://www.facebook.com/Malayalivartha
