ബൃഹത്തായ പ്രവര്ത്തനങ്ങളിലൂടെ മാത്രമേ കുട്ടികള്ക്കെതിരെയുള്ള അതിക്രമം തടയുവാന് സാധിക്കുകയുള്ളു; കരുതല് സ്പര്ശത്തിന് മുന്നൊരുക്കം: ഒരു ലക്ഷത്തോളംപേര് ഒത്തുകൂടി; സംസ്ഥാനതല ഉദ്ഘാടനം ജൂണ് 1ന് തിരുവനന്തപുരത്ത്
തിരുവനന്തപുരം: ബൃഹത്തായ രീതിയിലുള്ള പ്രവര്ത്തനങ്ങളിലൂടെ മാത്രമേ കുട്ടികള്ക്കെതിരെയുള്ള അതിക്രമം തടയുവാന് സാധിക്കുകയുള്ളുവെന്ന് ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്. ഇതിന്റെ ഭാഗമായാണ് 2019 ജൂണ് 1 ഗ്ലോബല് പാരന്റിംഗ് ഡേ മുതല് 2019 നവംബര് 14 ചില്ഡ്രന്സ് ഡേ വരെ വിവിധ വകുപ്പുകളെ ഏകോപിപ്പിച്ച് വനിത ശിശു വികസന വകുപ്പ് 'കരുതല് സ്പര്ശം-കൈകോര്ക്കാം കുട്ടികള്ക്കായ്' എന്ന മെഗാ ക്യാമ്പയിന് ആവിഷ്ക്കരിച്ചിരിക്കുന്നത്. കേരളത്തില് ഒട്ടേറെ കുട്ടികള് ആക്രമിക്കപ്പെടുന്നതിന്റെ പശ്ചാത്തലത്തിലാണ് ഈ മേഖലയിലെ പ്രാഗത്ഭ്യം തെളിയിച്ച വിവിധ വ്യക്തികളുടെ ചര്ച്ചയുടെ അടിസ്ഥാനത്തില് ഇങ്ങനെയൊരു ക്യാമ്പയിന് സംഘടിപ്പിക്കാന് തീരുമാനിച്ചത്. ബോധവത്ക്കരണത്തിന് ഉപരിയായി അവയെല്ലാം പ്രവര്ത്തന പന്ഥാവിലേക്ക് കൊണ്ടുവരാനാണ് ഈ ക്യാമ്പയിനിലൂടെ ശ്രമിക്കുന്നതെന്നും മന്ത്രി വ്യക്തമാക്കി. ക്യാമ്പയിന്റെ മുന്നൊരുക്കമായി നടത്തിയ പരിശീലന പരിപാടിയില് കേരളത്തിന്റെ വിവിധ ഭാഗങ്ങളിലെ കേന്ദ്രങ്ങളിലുള്ള ജീവനക്കാരോടും പ്രവര്ത്തകരോടും സംസാരിക്കുകയായിരുന്നു മന്ത്രി.
ഏറ്റവും കൂടുതല് സമയം കുട്ടികള് ചെലവഴിക്കുന്നത് സ്കൂളുകളിലാണ്. അതിനാല് തന്നെ കുട്ടികളുടെ പെരുമാറ്റങ്ങള് അധ്യാപകരും ജീവനക്കാരും ശ്രദ്ധിക്കണം. തല്ലിയത് കൊണ്ട് കുട്ടികള് നേരെയാവില്ല. കുട്ടികളിലുണ്ടാകുന്ന പലതരം സ്വഭാവദൂഷ്യത്തിന് കാരണങ്ങള് വ്യത്യസ്തമാണ്. കുടംബാംഗങ്ങളുടെ മനസിന്റേയും ശരീരത്തിന്റേയും ആരോഗ്യം പ്രധാനമാണ്. മദ്യം, മയക്കു മരുന്ന് എന്നിവയുടെ പിടിയില് നിന്നും കുട്ടികളെ മോചിപ്പിക്കണം. കുട്ടികളെ ദ്രോഹിക്കുന്ന ഇത്തരക്കാര്ക്ക് ക്രിമിനല് ശിക്ഷയും ചികിത്സയും ആവശ്യമാണ്. കുട്ടികളെ സംരക്ഷിക്കുക എന്നത് സമൂഹത്തിന്റെ കൂടി ഉത്തരവാദിത്വമാണ്. ഓരോ കുടുംബത്തിന്റേയും ശാരീരിക മാനസിക ആരോഗ്യം നിലനിര്ത്താന് ആരോഗ്യ വകുപ്പിനും വലിയ പങ്കാണുള്ളത്. അമ്മമാരുടെ മാനസിക പ്രശ്നങ്ങള് പരിഹരിക്കാനായി അമ്മമനസ് എന്ന പദ്ധതി ആരോഗ്യ വകുപ്പ് ആവിഷ്ക്കരിച്ച് വരികയാണ്.
ഓരോ മേഖലയിലും കടന്നുചെന്ന് ഇടപെടാന് പ്രവര്ത്തകര്ക്ക് കഴിയണം. കുട്ടികളുടെ സ്നേഹസ്പര്ശം, കരുതല് എന്നിവയ്ക്ക് വേണ്ടിയാണ് ഈ ക്യാമ്പയിന് സംഘടിപ്പിച്ചിരിക്കുന്നത്. ഇതിന്റെ മാറ്റം സമൂഹത്തില് പ്രതിഫലിക്കുമെന്നും മന്ത്രി വ്യക്തമാക്കി.
കരുതല് സ്പര്ശം ക്യാമ്പയിന്റെ മുന്നൊരുക്കമായി നടത്തിയ പരിശീലന പരിപാടിയില് കേരളത്തിന്റെ വിവിധ ഭാഗങ്ങളിലുള്ള കേന്ദ്രങ്ങളിലായി ഒരു ലക്ഷത്തോളം പേര് പങ്കെടുത്തു. 66,000 അംഗന്വാടി വര്ക്കര്മാര്, ആശ വര്ക്കര്മാര്, സ്കൂള് കൗണ്സിലര്മാര്, സ്റ്റുഡന്റ് പോലീസ് യൂണിറ്റ്, ഔര് റെസ്പോണ്സിബിലിറ്റി ടു ചില്ഡ്രണ്, ചൈല്ഡ് ലൈന്, സ്കൂള് ഹെല്ത്ത് നഴ്സുമാര്, അധ്യാപകര്, ജെ.പി.എച്ച്.എന്.മാര്, എന്.എസ്.എസ്., വിവിധ എന്.ജി.ഒ.കള് എന്നിവരാണ് എല്ലാ ജില്ലകളിലേയും വിവിധ വേദികളില് സംബന്ധിച്ചത്.
വിക്ടേഴ്സ് ചാനലിന്റെ തിരുവനന്തപുരത്തെ സ്റ്റുഡിയോയിലിരുന്നാണ് മന്ത്രിയും വിദഗ്ധരും തത്സമയം മറ്റുള്ളവരോട് സംവദിച്ചത്. സാമൂഹ്യനീതി വകുപ്പ് സ്പെഷ്യല് സെക്രട്ടറി ബിജു പ്രഭാകര്, വനിതശിശു വികസന വകുപ്പ് ഡയറക്ടര് ഷീബ ജോര്ജ്, പ്രമുഖ സൈക്യാട്രിസ്റ്റുകളായ ഡോ. ആര്. ജയപ്രകാശ്, ഡോ. കെ.പി. ജയപ്രകാശ്, ഡോ. അരുണ് ബി.നായര്, ഡോ. മോഹന് റോയി എന്നിവര് റെസ്പോണ്സിബിള് പാരന്റിംഗ് തുടങ്ങിയ വിവിധ വിഷയങ്ങളെ അധികരിച്ച് ഇവരുമായി സംവദിച്ചു. സംസ്ഥാനത്ത് വിവിധ ജില്ലകളിലെ 63 കേന്ദ്രങ്ങളാണ് ഇതിനായി സജ്ജീകരിച്ചത്. ഓരോ കേന്ദ്രത്തിലും സംശയങ്ങള് ചോദിക്കാനുള്ള സൗകര്യങ്ങളും ഒരുക്കിയിരുന്നു.
https://www.facebook.com/Malayalivartha
