കഴിഞ്ഞയാഴ്ച നിറഞ്ഞുനിന്ന വാര്‍ത്തയാണ് കോണ്‍ഗ്രസ് നേതാവ് കൊടിക്കുന്നില്‍ സുരേഷ് പ്രധാനമന്ത്രി നരേന്ദ്ര മോദിക്ക് സത്യപ്രതിജ്ഞ ചൊല്ലിക്കൊടുക്കുമെന്നത്. ലോക്‌സഭയിലെ ഏറ്റവും സീനിയറായ ജയിച്ച എംപി എന്ന നിലയിലാണ് ഈ സൗഭാഗ്യം കൊടിക്കുന്നിലിനെ തേടിയെത്തിയിരുന്നത്. സീനിയറായ മേനക ഗാന്ധി ഉള്‍പ്പെടെ മന്ത്രിയാകുമ്പോള്‍ പിന്നെയുള്ള യോഗം കൊടിക്കുന്നില്‍ സുരേഷിനായിരുന്നു.

അതേസമയം മേനകാ ഗാന്ധി ഇത്തവണ മോദി മന്ത്രിസഭയിലേക്കില്ലെന്ന സൂചന അവസാനമാണ് വന്നത്. നേരത്തെ അവര്‍ മന്ത്രിയായി സത്യപ്രതിജ്ഞ ചെയ്യുമെന്നായിരുന്നു പ്രതീക്ഷിച്ചിരുന്നത്. എന്നാല്‍ അതുണ്ടായില്ല. മേനകാ ഗാന്ധിക്ക് ഇത്തവണ താല്‍ക്കാലിക സ്പീക്കര്‍ പദവി ലഭിച്ചേക്കുമെന്നാണ് സൂചന. അതല്ലെങ്കില്‍ പ്രൊ ടേം സ്പീക്കറാക്കാനും സാധ്യതയുണ്ട്. നേരത്തെ ഇത് കൊടിക്കുന്നില്‍ സുരേഷിന് ലഭിക്കുമെന്നായിരുന്നു സൂചന.

മേനക മന്ത്രിസഭയില്‍ ഉണ്ടാവുമെന്ന കണക്കുകൂട്ടലിലായിരുന്നു കൊടിക്കുന്നില്‍ സുരേഷിന് ഇത്തരമൊരു ലഭിക്കുമെന്ന് കരുതിയിരുന്നു. എന്നാല്‍ സീനിയോറിറ്റിയുടെ അടിസ്ഥാനത്തില്‍ മേനകയ്ക്ക് പ്രൊ ടേം സ്പീക്കര്‍ പദവി ലഭിക്കാനാണ് സാധ്യത. നാല് സര്‍ക്കാരുകളില്‍ മേനകാ ഗാന്ധി മന്ത്രിയായിരുന്നു. എന്നാല്‍ സത്യപ്രതിജ്ഞ ചെയ്ത ടീമില്‍ ഇത്തവണ അവരുടെ പേരുണ്ടായിരുന്നില്ല. ഇതോടെ കൊടിക്കുന്നലിന്റെ സ്വപ്നം വെറുതേയായി. ഒപ്പം കോണ്‍ഗ്രസുകാരില്‍ ചിരിയും പടര്‍ന്നു. 

പ്രൊ ടേം സ്പീക്കര്‍ മേനകയാവാനാണ് കൂടുതല്‍ സാധ്യത. ലോക്‌സഭാ എംപിമാരുടെ സത്യപ്രതിജ്ഞാ ചടങ്ങ് മേനകാണ് നടത്തുക. ലോക്‌സഭയുടെ ആദ്യ യോഗം മേനകയാണ് നിയന്ത്രിക്കുക. സ്പീക്കര്‍ സ്ഥാനം ഇവരുടെ നേതൃത്വത്തിലാണ് തിരഞ്ഞെടുക്കുക. താല്‍ക്കാലിക സ്പീക്കര്‍ പദവിയിലേക്ക് സന്തോഷ് ഗ്യാങ് വാര്‍, മേനകാ ഗാന്ധി എന്നിവരുടെ പേരുകളാണ് ഉയര്‍ന്നത്. ഇവരാണ് ലോക്‌സഭയിലെ സീനിയര്‍ അംഗങ്ങള്‍.

അതേസമയം ഉത്തര്‍പ്രദേശിലെ സുല്‍ത്താന്‍പൂരില്‍ നിന്ന് കഷ്ടിച്ച് വിജയിക്കുകയായിരുന്നു മേനകാ ഗാന്ധി. അതുകൊണ്ടാണ് ഇത്തവണ അവര്‍ക്ക് മന്ത്രിസ്ഥാനം നല്‍കാത്തതെന്ന് സൂചനയുണ്ട്. മകന്‍ വരുണ്‍ ഗാന്ധിയുമായി മണ്ഡലം വെച്ച് മാറുകയായിരുന്നു മേനകാ ഗാന്ധി. വരുണ്‍ പിലിഭിത്തിലാണ് മത്സരിച്ചത്. തിരഞ്ഞെടുപ്പ് പ്രചാരണത്തിനിടെ മേനക വിവാദങ്ങളില്‍ ചാടുകയും ചെയ്തിരുന്നു.

കേരളത്തില്‍ കോണ്‍ഗ്രസിന്റെ ജനപ്രിയ എംപിമാര്‍ ആരെന്ന് ചോദിച്ചാല്‍ ആദ്യ അഞ്ചില്‍ വരുന്ന പേരാണ് കൊടിക്കുന്നില്‍ സുരേഷിന്റേത്. ആറ് തവണ പാര്‍ലമെന്റില്‍ എത്തി എന്നത് തന്നെയാണ് അദ്ദേഹത്തിന്റെ നേട്ടം. 2014ല്‍ കോണ്‍ഗ്രസ് ദേശീയ തലത്തില്‍ തകര്‍ന്നടിഞ്ഞപ്പോള്‍ കേരളത്തില്‍ കോണ്‍ഗ്രസിന്റെ അഭിമാനമുയര്‍ത്തിയ നേതാക്കളിലൊരാളായിരുന്നു കൊടിക്കുന്നില്‍. 1989ലാണ് അദ്ദേഹം ആദ്യമായി ലോക്‌സഭയിലേക്ക് മത്സരിക്കുന്നത്. പിന്നീട് 1991, 96, 99 വര്‍ഷങ്ങളിലും അദ്ദേഹം മത്സരിച്ചു. 1998, 2004 വര്‍ഷങ്ങളില്‍ മാത്രമാണ് കൊടിക്കുന്നില്‍ തോല്‍വിയറിഞ്ഞത്. 2009ല്‍ സിപിഎമ്മിന്റെ ആര്‍എസ് അനിലിനെയും 2014ല്‍ ചെങ്ങറ സുരേന്ദ്രനെയും പരാജയപ്പെടുത്തിയാണ് അദ്ദേഹം തിരിച്ചെത്തിയത്.

2009ല്‍ അദ്ദേഹത്തിന്റെ ജയം കേരള ഹൈക്കോടതി അസാധുവാക്കിയിരുന്നു. തിരഞ്ഞെടുപ്പ് കമ്മീഷന് അദ്ദേഹം സമര്‍പ്പിച്ച ജാതി സര്‍ട്ടിഫിക്കറ്റ് വ്യാജനാണെന്നും, ശരിക്കും അദ്ദേഹം ക്രിസ്ത്യാനിയാണെന്നും പറഞ്ഞായിരുന്നു കോടതി വിധി. എന്നാല്‍ സുപ്രീം കോടതി ഈ വിധി പിന്നീട് തള്ളി. 2014 മുതല്‍ 2018 വരെയുള്ള വര്‍ഷങ്ങളിലാണ് അദ്ദേഹം ഏറ്റവും ജനപ്രിയനാവുന്നത്. വിവാദങ്ങള്‍ ഉണ്ടെങ്കിലും മാവേലിക്കരയുടെ ഹൃദയമറിഞ്ഞ നേതാവെന്നാണ് ജനങ്ങള്‍ അദ്ദേഹത്തെ വിളിക്കുന്നത്. നിലവില്‍ കെപിസിസിയുടെ വര്‍ക്കിംഗ് പ്രസിഡന്റ് ചുമതലയും കൊടിക്കുന്നില്‍ വഹിക്കുന്നുണ്ട്.