പിള്ളേരോടാണ് കളി... ബിന്ദു കൃഷ്ണയ്ക്ക് മകനെ കേന്ദ്രീയ വിദ്യാലയത്തില് അയക്കുന്നതിന് പകരം സര്ക്കാര് വിദ്യാലയത്തില് അയച്ചൂടെ; ബിന്ദു കൃഷ്ണയെ വിമര്ശിക്കാന് പോസ്റ്റിട്ട് കുരുക്കിലായി പ്രതിഭ എംഎല്എ; എംഎല്എയുടെ ബസ്റ്റ് ജനറല് നോളജ്
മന്ത്രി കെ.കെ. ശൈലജ ടീച്ചര് വീണ ജോര്ജിന് മാത്രം അഭിനന്ദനം നല്കിയതിനെ ചോദ്യം ചെയത്ത് സോഷ്യല് മീഡിയയുടെ വലിയ ആക്രമണമാണ് ഉണ്ടായത് അതിന് പിന്നാലെ കൊല്ലം ഡിസിസി പ്രസിഡന്റ് ബിന്ദു കൃഷ്ണയെ വിമര്ശിക്കാന് ഇട്ട ഫെയ്സ്ബുക്ക് പോസ്റ്റില് സ്വയം വെട്ടിലായിരിക്കുകയാണ് കായകുളം എംഎല്എ യു.പ്രതിഭ. ബിന്ദു കൃഷ്ണയ്ക്ക് മകനെ കേന്ദ്രീയ വിദ്യാലയത്തില് അയക്കുന്നതിന് പകരം സര്ക്കാര് വിദ്യാലയത്തില് അയച്ചൂടെ എന്ന് ഉപദേശിച്ച് പ്രതിഭ ഫെയ്സ്ബുക്കിലിട്ട പോസ്റ്റിലാണ് അമളി പറ്റിയത്. കേന്ദ്രീയ വിദ്യാലയം സര്ക്കാര് വിദ്യാലയമാണെന്നുള്ള അറിവ് പോലും എംഎല്എക്ക് ഇല്ലേ എന്നാണ് സാമൂഹിക മാധ്യമങ്ങളിലൂടെയുള്ള പരിഹാസം.
വേനലവധിക്ക് ശേഷം ആദ്യ ദിവസം സ്കൂളില് പോകുന്ന മകന്റെ ഫോട്ടോ ബിന്ദു കൃഷ്ണ ഫെയ്സ്ബുക്കിലിട്ടിരുന്നു. കേന്ദ്രീയ വിദ്യാലയം നേരത്തെ തുറന്നുവെന്നും ബിന്ദുകൃഷ്ണ പോസ്റ്റിന് കമന്റ് ചെയ്തിരുന്നു. ഇതിന്റെ സ്ക്രീന് ഷോട്ട് എടുത്ത് പങ്കുവെച്ചായിരുന്നു പ്രതിഭയുടെ സര്ക്കാര് വിദ്യാഭ്യാസ സ്ഥാപനങ്ങളിലേക്ക് കുട്ടികളെ വിടുന്നതിന്റെ ആവശ്യകതയും മറ്റും വിവരിച്ചുള്ള നീണ്ട പോസ്റ്റ്. കേന്ദ്രീയ വിദ്യാലയവും സര്ക്കാര് സ്ഥാപനമാണെന്നും പ്രതിഭക്ക് സാമാന്യ വിവരമില്ലേയെന്നുമുള്ള വിമര്ശനങ്ങള് വന്നതോടെ അവര് പോസ്റ്റില് ചെറിയ തിരുത്തല് വരുത്തി. കേന്ദ്രീയ വിദ്യാലയങ്ങള്ക്ക് താന് എതിരാണെന്ന പ്രചാരണം ശരിയല്ലെന്നായിരുന്നു തിരുത്തല്.
സംഭവം വിവാദമായതിന് പിന്നാലെ ബിന്ദു കൃഷ്ണയും പ്രതിഭയ്ക്കെതിരെ രംഗത്തെത്തിയിട്ടുണ്ട്. മാസം 200 രൂപ മാത്രം അദ്ധ്യാപന ഫീസുള്ള കേന്ദ്ര മാനവ വിഭവശേഷി മന്ത്രാലയത്തിന് കീഴിലുള്ള കേന്ദ്രസര്ക്കാര് സ്കൂളായ കേന്ദ്രീയ വിദ്യാലയത്തിലാണ് ഞങ്ങളുടെ മകന് പഠിക്കുന്നത്. കേന്ദ്രീയ വിദ്യാലയമെന്ന് കേട്ടപ്പോള് മാസം പതിനായിരം രൂപ ഫീസുള്ള ഏതോ പണച്ചാക്ക് സ്കൂളാണെന്ന് പ്രതിഭാ എംഎല്എ കരുതിക്കാണും. അതല്ലെങ്കില് ആടിനെ പട്ടിയാക്കുന്ന സഖാക്കന്മാരുടെ സ്ഥിരം സ്വഭാവം ആ സഖാവിനെ പിടികൂടിയതാകാം. അതുമല്ലെങ്കില് വിദേശ രാജ്യങ്ങളില് പഠിക്കുന്ന മക്കളുള്ള സഖാക്കന്മാര്ക്കുള്ള ഒളിയമ്പുമാകാം ആ കുട്ടിയുടെ പോസ്റ്റെന്നും ബിന്ദു കൃഷ്ണ പറഞ്ഞു.
പ്രതിഭാ ഹരിയുടെ ഫെയ്സ്ബുക്ക് പോസ്റ്റിന്റെ പൂര്ണ്ണ രൂപം (എഡിറ്റ് ചെയ്തത്?)
കേരളത്തിലെ കോണ്ഗ്രസ് നേതാവിന്റെ പോസ്റ്റ് ആണ് ( ഈ ഫോട്ടോയില് കാണുന്ന മകനോട് സ്നേഹം മാത്രം. ഒപ്പം പഠനത്തിന് ആശംസകള് ). രാഷ്ട്രീയം എന്നാല് രാഷ്ട്രത്തെ സംബന്ധിച്ചത്. അപ്പോള് അത് അവിടുത്തെ ജനങ്ങളെ സംബന്ധിച്ചും ആകും. ഇനി വിഷയത്തിലേക്ക് വരാം.കേരളത്തില് സര്ക്കാര് സ്കൂളുകള് തുറക്കുന്നത് ജൂണ് ആറി ന് ആണ്. എന്റെ മകന് അടക്കം ലക്ഷക്കണക്കിന് കുഞ്ഞുങ്ങള് പുതിയ അധ്യയന വര്ഷത്തിലേക്ക് പ്രതീക്ഷയോടെ കടക്കുകയാണ്. അതെ അവര്ക്ക് പ്രതീക്ഷക്ക് വകയുണ്ട്. നമ്മുടെ സര്ക്കാര് ആണ് കേരളം ഭരിക്കുന്നത്. പുസ്തകങ്ങള് വന്നു. യൂണിഫോം വന്നു.. ഉച്ചഭക്ഷണത്തിനുള്ള തയ്യാറെടുപ്പുകള് പൂര്ത്തിയായി. വിദ്യാലയങ്ങള് കുഞ്ഞുങ്ങളെ സ്വീകരിക്കാന് തയ്യാറായി നില്ക്കുന്നു..
ഇവിടെ സര്ക്കാര് വിദ്യാഭ്യാസ സ്ഥാപനത്തിലേക്ക് മക്കളെ വിടാന് ആദ്യം തയ്യാറാകേണ്ടത് രാഷ്ട്രീയക്കാരും ജനപ്രതിനിധികളും പൊതു പ്രവര്ത്തകരും സര്ക്കാര് ഉദ്യോഗസ്ഥരും ആണ്... ഈ തെരഞ്ഞെടുപ്പ് സമയത്ത് പല ഓണ്ലൈന് അതുപോലെ തന്നെ വലതുപക്ഷ മാധ്യമങ്ങളും ചില സ്ഥാനാര്ത്ഥികള്ക്ക് അമിതമായ താരപരിവേഷം അന്യായ പ്രചരണം ഒക്കെ നല്കുന്നത് കണ്ടു. തങ്ങള് ആര്ക്കാണോ പ്രചരണം നല്കാന് ആഗ്രഹിക്കുന്നത് ആ ജോലി അമിതമായ ആത്മാര്ത്ഥതയോടെ നിര്വ്വഹിക്കുന്നത് കണ്ടു. എന്നാല് എങ്ങനെയാണ് ജനപ്രതിനിധികളെ പൊതുപ്രവര്ത്തകരെ വിലയിരുത്തേണ്ടത്. അവരുടെ വാക്കും പ്രവൃത്തിയും ഒത്തുവരുന്നുണ്ടോ നോക്കണം. അങ്ങനെ തന്നെ വേണം ജനവും വിലയിരുത്താന് ..
നമ്മുടെ മക്കളെ പൊതു വിദ്യാഭ്യാസ സ്ഥാപനങ്ങളില് വിടാതെ പൊതു വിദ്യാഭ്യാസത്തെ സ്ഥാപനങ്ങളെ വിമര്ശിക്കാനോ വിലയിരുത്താനോ നമ്മള്ക്കെന്ത് അവകാശം.. ജനപ്രതിനിധി ആയി ജില്ലാ പഞ്ചായത്തില് ഇരിക്കെ നിരന്തരമായി സര്ക്കാര് വിദ്യാഭ്യാസ സ്ഥാപനങ്ങളിലേക്ക് കുട്ടികളെ വിടുന്നതിന്റെ ആവശ്യകതയെക്കുറിച്ച് ഞാന് ക്യാംപയിന് ചെയ്യുമായിരുന്നു.അത് ഏറെക്കുറെ വിജയിക്കുകയും ചെയ്തിരുന്നു.എന്റെ സഹപ്രവര്ത്തകരായിരുന്നു രണ്ട് അംഗങ്ങള് അവരുടെ മക്കളെ അണ് എയ്ഡഡില് നിന്നും പൊതു വിദ്യാലയത്തിലേക്ക് മക്കളെ മാറ്റി ചേര്ത്തു.
... നാട് എങ്ങനെയുമാകട്ടെ. നമ്മുടെ മക്കള് സുരക്ഷിതരായി പഠിച്ച് വളരട്ടെ എന്ന് കരുതുന്ന ചിന്താഗതി മാത്രമാണ് ഇവിടെ ചൂണ്ടി കാണിച്ചിട്ടുള്ളത്... ആദര്ശത്തിന്റെ ആവരണം വസ്ത്രം പോലെ എടുത്ത് അണി യേണ്ടവരല്ല നമ്മള് പൊതുപ്രവര്ത്തകര്.. സമൂഹത്തിന്റെ ഭാഗമായി നില്ക്കേണ്ടവരാണ് നമ്മള് .. എന്റെ മകനെ അംഗന്വാടി മുതല് ഈ നിമിഷം വരെ സര്ക്കാര് സ്ഥാപനത്തില് മാത്രം വിട്ടിട്ടുള്ള ഒരമ്മ എന്ന നിലയില് തന്നെയാണ് ഈ പോസ്റ്റ് ഇടുന്നത്. എന്നും സര്ക്കാര് സ്കൂളിനൊപ്പം. പൊതു വിദ്യാഭ്യാസത്തിനൊപ്പം... ഈ പോസ്റ്റ് കേന്ദ്രീയ വിദ്യാലയങ്ങള്ക്ക് എതിരാണ് എന്ന രീതിയില് പ്രചരണം നടത്തുന്നവരോട് ഒന്നും പറയാനില്ല. മലയാളം മീഡിയത്തില് പഠിക്കുന്ന,, പണം കൊടുത്ത് വിദ്യാഭ്യാസം നേടാന് ആഗ്രഹിക്കാത്ത ,, വിദ്യാര്ത്ഥികള്ക്കും രക്ഷകര്ത്താക്കള്ക്കും മനസ്സിലാകും .. മനസ്സിലായാല് മതി.
https://www.facebook.com/Malayalivartha
