മാതാവ്, തന്നോടൊപ്പം കഴിയുന്ന മകന്‍ മുറിയില്‍ മരിച്ചു കിടക്കുന്നതറിയാതെ വീടിനുള്ളില്‍ കഴിഞ്ഞത് 3 ദിവസം. പത്തനംതിട്ട ഇടത്തറ കൊമ്പനോലി പാലത്തിങ്കല്‍ റിട്ട. ബിഡിഒ പരേതനായ പി.എ.ജോര്‍ജിന്റെ മകന്‍ ജോബി പി.ജോര്‍ജ് (45) മരിച്ച വിവരമാണ് മാതാവ് ലീലാമ്മ അറിയാതിരുന്നത്.

ലീലാമ്മയും ജോബിയുമാണ് വീട്ടില്‍ താമസിച്ചിരുന്നത്. 4 വര്‍ഷം മുന്‍പ് പിതാവു മരിച്ചപ്പോള്‍ ഇലക്ട്രീഷ്യനായിരുന്ന ജോബി സൗദിയിലെ ജോലി മതിയാക്കി നാട്ടിലേക്കു വന്നതാണ്. ശനി വൈകിട്ട് 6-ന് ജോബിയെ റോഡില്‍ കണ്ടവരുണ്ട്.

ഇന്നലെ രാവിലെ ലീലാമ്മയുടെ ബന്ധു ലാലി ഇവരെ സന്ദര്‍ശിക്കാന്‍ വീട്ടിലെത്തിയപ്പോഴാണ് മരണവിവരം പുറത്തറിയുന്നത്. ജോബി ഭക്ഷണം കഴിഞ്ഞ ശേഷം കിടക്കുകയാണെന്നാണ് ലീലാമ്മ പറഞ്ഞത്. സംശയം തോന്നിയ ലാലി മുറിയില്‍ നോക്കിയപ്പോള്‍ ജോബി മരിച്ചു കിടക്കുന്നതാണു കാണുന്നത്.

മൃതദേഹത്തിന് 3 ദിവസത്തോളം പഴക്കമുണ്ടെന്ന് പൊലീസ് പറഞ്ഞു. ഫൊറന്‍സിക് വിദഗ്ധരും സ്ഥലത്തെത്തി. മൃതദേഹം പത്തനംതിട്ട ജനറല്‍ ആശുപത്രിയില്‍ പോസ്റ്റ്‌മോര്‍ട്ടം നടത്തി ബന്ധുക്കള്‍ക്കു വിട്ടുകൊടുത്തു.

മുന്‍ പഞ്ചായത്തംഗം കൂടിയായിരുന്ന ലീലാമ്മ, ജോര്‍ജിന്റെ മരണശേഷം മാനസിക പ്രശ്‌നങ്ങള്‍ കാണിച്ചിരുന്നതായി ബന്ധുക്കള്‍ പൊലീസിനെ അറിയിച്ചു.