ഞാന് വലിയൊരു ഉദാഹരണം... വീണ്ടും നിപ വൈറസ് ബാധിച്ചതോടെ കേരളത്തെ ആശ്വസിപ്പിച്ച് അതിജീവിച്ച അജന്യ
കേരളത്തെ മുഴുവന് മുള്മുനയില് നിര്ത്തിയ ദിനങ്ങളായിരുന്നു കഴിഞ്ഞ വര്ഷത്തെ നിപ വൈറസ് കാലം. അന്ന് 2000ത്തോളം പേര് നിരീക്ഷണത്തിലായിരുന്നു. അതില് 18 പേര്ക്ക് രോഗം സ്ഥിരീകരിച്ചിരുന്നു. 2 പേര് രക്ഷപ്പെട്ടു. അവരാണ് ഉപീഷും അജന്യയും. വീണ്ടും നിപ കേരളത്തിലെത്തിയപ്പോള് ആശ്വാസമായെത്തുകയാണ് അവര്.
എറണാകുളത്തെ സ്വകാര്യ ആശുപത്രിയില് ചികിത്സയില് കഴിയുന്ന വിദ്യാര്ത്ഥിക്ക് നിപ സ്ഥിരീകരിച്ചതോടെ വീണ്ടും ജനങ്ങള് ഭയചകിതരായിരിക്കുകയാണ്. ആശങ്ക വേണ്ടെന്ന് മുഖ്യമന്ത്രിയും ആരോഗ്യമന്ത്രിയുമൊക്കെ പറയുന്നുണ്ടെങ്കിലും നമ്മുടെ പേടി മാറിയിട്ടില്ല. നമ്മള് അതിജീവിക്കും അതിനുള്ള ജീവിക്കുന്ന ഉദാഹരണമാണ് താനെന്ന് പറഞ്ഞുകൊണ്ട് രംഗത്ത് എത്തിയിരിക്കുകയാണ് നിപയെ അതിജീവിച്ച് ജീവിതത്തിലേക്ക് തിരിച്ചെത്തിയ അജന്യ എന്ന നഴ്സിങ് സ്റ്റുഡന്റ്.
അജന്യയുടെ വാക്കുകള് ഇങ്ങനെയാണ്
പേടിയല്ല വേണ്ടത് ജാഗ്രതയാണ്. നമ്മള് അതിജീവിക്കും. അതിനുള്ള വലിയൊരു ഉദാഹരണമാണ് ഞാന്. നമ്മുടെ കൂടെ ആരോഗ്യവകുപ്പ് സജീവമായിട്ടുണ്ട്. കഴിഞ്ഞ ദിവസം എന്താണെന്ന് അറിയാതെപോലും അതില് നിന്ന് അതിജീവിച്ച് വന്നു. ആരും പേടിക്കരുത്,ജാഗ്രത വേണം .എന്ത് അസുഖമുണ്ടെങ്കിലും പെട്ടെന്ന് തന്നെ ഡോകടറെ കാണണം. നമ്മുടെ ആരോഗ്യവകുപ്പ് കൂടെയുണ്ട്. എനിക്ക് തന്ന ആത്മവിശ്വസവും ധൈര്യവുമാണ് എന്നെ അതിജീവിക്കാന് സഹായിച്ചത്. ഇതും നമ്മള് അതിജീവിക്കും.
അതേസമയം നിപ ബാധിച്ച് എറണാകുളത്തെ സ്വകാര്യാശുപത്രിയില് ചികിത്സയില് കഴിയുന്ന വടക്കന് പറവൂര് സ്വദേശിയായ ഇരുപത്തിമൂന്നുകാരന്റെ ആരോഗ്യനില തൃപ്തികരമാണ്. പുനെയിലെ വൈറോളജി ഇന്സ്റ്റിറ്റിയൂട്ടില് നടത്തിയ പരിശോധനയിലാണു സ്ഥിരീകരണം ഉണ്ടായത്.
മൂന്നു നഴ്സുമാരടക്കം നിപ ലക്ഷണങ്ങളോടെ പനി ബാധിതരായ അഞ്ചുപേര്കൂടി ഐസൊലേഷന് വാര്ഡില് ചികിത്സയിലുണ്ട്. യുവാവിനെ കൊച്ചിയിലെ സ്വകാര്യാശുപത്രിയില് പരിചരിച്ചവരാണു നഴ്സുമാര്. നിപ സ്ഥിരീകരിക്കപ്പെട്ട യുവാവിന്റെ കുട്ടമ്പുഴ സ്വദേശിയായ സഹപാഠിയും യുവാവുമായി ബന്ധമില്ലാത്ത ചാലക്കുടി സ്വദേശിയുമാണു മറ്റു രണ്ടുപേര്. ഇവര് കളമശേരി മെഡിക്കല് കോളജ് ആശുപത്രിയിലെ ഐസൊലേഷന് വാര്ഡിലാണ്. ഇവരുടെ രക്ത സാമ്പിളുകള് ഇന്ന് ആലപ്പുഴ, മണിപ്പാല്, പുനെ വൈറോളജി ഇന്സ്റ്റിറ്റിയൂട്ടുകളിലേക്ക് അയയ്ക്കും. നിപ ബാധിച്ച യുവാവിനൊപ്പം അമ്മയും ആശുപത്രിയിലുണ്ട്. മറ്റു കുടുംബാംഗങ്ങള് വീട്ടില്ത്തന്നെ ആരോഗ്യവകുപ്പിന്റെ നിരീക്ഷണത്തിലാണ്. സംസ്ഥാനത്തൊട്ടാകെ 311 പേരാണു നിരീക്ഷണത്തിലുള്ളത്. മന്ത്രി ശൈലജ കൊച്ചിയില് തങ്ങി പ്രവര്ത്തനങ്ങള്ക്കു നേതൃത്വം നല്കുന്നു. നിപ ബാധിച്ച യുവാവിനോട് ഇടപഴകിയ കൊല്ലം ജില്ലക്കാരായ മൂന്നു വിദ്യാര്ഥികളും ആരോഗ്യവകുപ്പിന്റെ നിരീക്ഷണത്തിലുണ്ട്. കൊട്ടാരക്കര, കരുനാഗപ്പള്ളി സ്വദേശികളാണ് ഇവര്. മൂവരും വീടുകളില്ത്തന്നെയാണുള്ളത്. കൊല്ലം ജില്ലാ ആശുപത്രി, പാരിപ്പള്ളി മെഡിക്കല് കോളജ് എന്നിവിടങ്ങളിലും ഐസൊലേഷന് വാര്ഡുകള് സജ്ജമാക്കി.
ബംഗളുരുവിലെ സ്വകാര്യ ലാബിലും ആലപ്പുഴ, മണിപ്പാല് എന്നിവിടങ്ങളിലെ വൈറോളജി ഇന്സ്റ്റിറ്റിയൂട്ടുകളിലും നടത്തിയ സാമ്പിള് പരിശോധനകളില് യുവാവിനു നിപ ബാധിച്ചതായി കണ്ടെത്തിയിരുന്നു. എന്നാല്, പുനെയിലെ ദേശീയ വൈറോളജി ഇന്സ്റ്റിറ്റിയൂട്ടില്നിന്നുള്ളതാണ് അന്തിമഫലം. നിപ സ്ഥിരീകരിക്കപ്പെട്ട യുവാവിന്റെ ആരോഗ്യനിലയില് പുരോഗതിയുണ്ടെന്നു മന്ത്രി ശൈലജ വ്യക്തമാക്കി.
https://www.facebook.com/Malayalivartha
