ബിജെപി അധ്യക്ഷനും പ്രധാനമന്ത്രി നരേന്ദ്ര മോദിയുടെ വലംകൈയ്യുമായ അമിത് ഷാ ആഭ്യന്തര മന്ത്രിയായതോടെ വലിയ ആരോപണമാണ് എതിര്‍ കക്ഷികള്‍ ഉന്നയിച്ചത്. അമിത് ഷായുടെ പൂര്‍വകാല ചരിത്രവും ഗുജറാത്ത് കലാപവും ഉന്നയിച്ചായിരുന്നു കേരളത്തില്‍ പോലും ചര്‍ച്ചകള്‍ നടന്നത്. എന്നാല്‍ ആഭ്യന്തര മന്ത്രിയായി കുറഞ്ഞ നാളുകള്‍ക്കുള്ളില്‍ പക്വത കാണിക്കുകയാണ് അമിത് ഷാ. 

ഇഫ്താര്‍ വിരുന്നില്‍ പങ്കെടുത്ത ബി.ജെ.പി., ജെ.ഡി.യു., എല്‍.ജെ.പി. നേതാക്കളെ പരിഹസിച്ച് ട്വീറ്റു ചെയ്ത കേന്ദ്രമന്ത്രി ഗിരിരാജ് സിങ്ങിനെ അമിത് ഷാ ശക്തമായ ഭാഷയിലാണ് താക്കീതു ചെയ്തത്. ബിഹാര്‍ മുഖ്യമന്ത്രി നിതീഷ് കുമാര്‍, ഉപമുഖ്യമന്ത്രി സുശീല്‍കുമാര്‍ മോദി, കേന്ദ്രമന്ത്രിയും എല്‍.ജെ.പി. നേതാവുമായ രാംവിലാസ് പാസ്വാന്‍ എന്നിവരെയാണ് കേന്ദ്രമന്ത്രി പരിഹസിച്ചത്. ഇത്തവണ ബിഹാറിലെ ബെഗുസരായ് മണ്ഡലത്തില്‍ നിന്നു ജയിച്ച ഗിരിരാജ് സിങ് മുമ്പും വിവാദപ്രസ്താവനകള്‍ നടത്തിയിട്ടുണ്ട്. പുതുതായി രൂപവത്കരിച്ച മൃഗസംരക്ഷണഫിഷറീസ് മന്ത്രാലയത്തിലെ കാബിനറ്റ് മന്ത്രിയാണ് അദ്ദേഹം.

തിങ്കളാഴ്ച ഹിന്ദുസ്ഥാന്‍ ആവാം മോര്‍ച്ച നേതാവും മുന്‍ മുഖ്യമന്ത്രിയുമായ ജിതിന്‍ റാം മാഞ്ചി പട്‌നയില്‍ നടത്തിയ ഇഫ്താറില്‍ മുതിര്‍ന്ന നേതാക്കള്‍ പങ്കെടുത്തിരുന്നു. ഈ നേതാക്കള്‍ ഒരുമിച്ചു നില്‍ക്കുന്ന ഫോട്ടോകള്‍ ചേര്‍ത്തായിരുന്നു ഗിരിരാജ് സിങ്ങിന്റെ ട്വീറ്റ്. നവരാത്രി പോലെ സ്വന്തം മതത്തിലുള്ള ആഘോഷങ്ങളും ആചാരങ്ങളും ഉയര്‍ത്തിക്കാട്ടാതെ മറ്റു മതങ്ങളുടെ ആഘോഷങ്ങള്‍ക്കായി അണിനിരക്കുന്നതെന്തിനാണെന്നായിരുന്നു ട്വീറ്റിലെ ചോദ്യം. ഈ ഫോട്ടോകള്‍ നവരാത്രി ആഘോഷങ്ങളില്‍നിന്ന് ഉണ്ടായതാണെങ്കില്‍ എത്രയോ മനോഹരമായിരുന്നെന്നും ഗിരിരാജ് സിങ് ചോദിച്ചു.

ട്വീറ്റ് പുറത്തുവന്നയുടന്‍തന്നെ നേതാക്കള്‍ കടുത്ത വിമര്‍ശനവുമായി രംഗത്തുവന്നു. മാധ്യമങ്ങളുടെ ശ്രദ്ധ കിട്ടാനാണ് ഗിരിരാജ് സിങ് പ്രസ്താവന നടത്തിയതെന്ന് ബിഹാര്‍ മുഖ്യമന്ത്രി നിതീഷ് കുമാര്‍ പ്രതികരിച്ചു. ഗിരിരാജ് സിങ്ങിന്റെ മാനസികനില പരിശോധിക്കണമെന്നായിരുന്നു ജെ.ഡി.യു വക്താവ് സഞ്ജയ് സിങ്ങിന്റെ പ്രസ്താവന. എല്ലാവര്‍ക്കുമൊപ്പം എന്ന പ്രസ്താവന ഉയര്‍ത്തിയാണ് എല്‍.ജെ.പി. രൂപവത്കരിച്ചതെന്ന് ചെയര്‍മാന്‍ ചിരാഗ് പാസ്വാന്‍ ചൂണ്ടിക്കാട്ടി.

ഇതോടെയാണ് ബി.ജെ.പി. കേന്ദ്രനേതൃത്വം ഇടപെട്ടത്. ഇത്തരം പ്രസ്താവനകള്‍ ആവര്‍ത്തിക്കരുതെന്ന് ദേശീയാധ്യക്ഷനും കേന്ദ്ര ആഭ്യന്തരമന്ത്രിയുമായ അമിത് ഷാ ചൊവ്വാഴ്ച ഗിരിരാജ് സിങ്ങിനെ താക്കീതു ചെയ്തു. രണ്ടാം മോദി സര്‍ക്കാര്‍ അധികാരമേറ്റ് ദിവസങ്ങള്‍ മാത്രം പിന്നിടുമ്പോള്‍ വിവാദ പ്രസ്താവനയുടെ പേരില്‍ താക്കീത് ചെയ്യപ്പെടുന്ന രണ്ടാം മന്ത്രിയാണ് ഗിരിരാജ്. കഴിഞ്ഞദിവസം ആഭ്യന്തരസഹമന്ത്രി കിഷന്‍ റെഡ്ഡിയെ അമിത് ഷാ ശാസിച്ചിരുന്നു. ഹൈദരാബാദ് ഭീകരരുടെ സുരക്ഷിതതാവളമാണെന്ന പ്രസ്താവനയുടെ പേരിലായിരുന്നു താക്കീത്.