നിപ സ്ഥിരീകരിച്ച വിദ്യാര്‍ഥി താമസിച്ചിരുന്ന തൊടുപുഴയിലെ വാടകവീടിന്റെ സമീപത്ത് ആരോഗ്യവകുപ്പ് പരിശോധന നടത്തി. കിണറിലോ വീടിന്റെ പരിസരത്തോ വവ്വാല്‍ സാന്നിധ്യം കണ്ടെത്താനായിട്ടില്ല. മഗസംരക്ഷണവകുപ്പിന്റെ നേതൃത്വത്തില്‍ മൃഗങ്ങളിലും പരിശോധന നടത്തുന്നുണ്ട്. നിപ വൈറസ് ഉറവിട പരിശോധനയ്ക്കുള്ള പ്രത്യേക സംഘം ഇന്നോ നാളെയോ എത്തുമെന്നാണ് വിവരം. ഈ പ്രദേശത്ത് പനി സര്‍വ്വേ നടത്തിയിരുന്നുവെങ്കിലും ആര്‍ക്കും പനിയോ മറ്റ് ലക്ഷണങ്ങളോ കണ്ടെത്തിയിട്ടില്ല. രോഗം സ്ഥിരീകരിച്ച വിദ്യാര്‍ത്ഥിയുടെ വീട്ടില്‍ പഞ്ചായത്തധികൃതരും ആരോഗ്യ പ്രവര്‍ത്തകരും ദിവസവും പോകുന്നുണ്ട്. അവര്‍ ഒരിക്കലും ഒറ്റയ്ക്കാവില്ലെന്നും നാട്ടുകാര്‍ പറയുന്നു.

നിപ്പയെ ചെറുത്ത് തോല്‍പ്പിക്കാനാകുമെന്ന ഉറച്ച ആത്മവിശ്വാസത്തിലാണ് രോഗം സ്ഥിരീകരിച്ച വിദ്യാര്‍ത്ഥിയുടെ നാടായ വടക്കേക്കര പഞ്ചായത്ത് നിവാസികള്‍. കൃത്യമായ പ്രതിരോധ പ്രവര്‍ത്തനങ്ങളിലൂടെയും ബോധവത്ക്കരണത്തിലൂടെയും ആരോഗ്യപ്രവര്‍ത്തകര്‍ക്കൊപ്പം ഒറ്റക്കെട്ടായി നില്‍ക്കുകയാണ് ഈ നാട്ടുകാര്‍. ഇവിടെ ആരേയും ഒറ്റപ്പെടുത്താനോ കുറ്റപ്പെടുത്താനോ തങ്ങളെ കിട്ടില്ലെന്നും തികഞ്ഞ ജാഗ്രതയിലും തങ്ങള്‍ ഒറ്റക്കെട്ടാണെന്നുമാണ് നാട്ടുകാര്‍ പറയുന്നത്. ഉറവിടം വവ്വാലോ വവ്വാല്‍കടിച്ച പഴമോ എന്തുമാകട്ടെ വടക്കേക്കര പഞ്ചായത്തില്‍ കാര്യങ്ങളെല്ലാം പഴയതുപോലെ തന്നെയാണ്. കടകളെല്ലാം തുറന്നു പ്രവര്‍ത്തിക്കുന്നുണ്ട്. ആളുകള്‍ ജോലിക്കു പോകുന്നുണ്ട്. കുട്ടികള്‍ സ്‌കൂളില്‍ പോകുന്നുണ്ട്. ഭയന്ന് പേടിച്ച്‌ വീട്ടിലിരിക്കേണ്ട കാര്യമൊന്നുമില്ല. പ്രതിരോധവും പരിചരണവും നല്‍കുക. അതില്‍ മാത്രമാണ് വിശ്വസിക്കുന്നത്. - നാട്ടുകാര്‍ വ്യക്തമാക്കുന്നു.