ലോക്‌സഭാ തെരഞ്ഞെടുപ്പില്‍ അത്ഭുതവിജയം നേടിയ യു.ഡി.എഫിനെയും കോണ്‍ഗ്രസിനെയും ടൂറിസം മന്ത്രി കടകംപള്ളി സുരേന്ദ്രന്‍ ട്രോളി. മണ്ണും ചാരി നിന്നവന്‍ പെണ്ണും കൊണ്ട് പോയതിന് സമാനമാണ് ലോക്‌സഭാ തെരഞ്ഞെടുപ്പില്‍ നാടിന്റെ അവസ്ഥയെന്ന് കടകംപള്ളി പറഞ്ഞു. ആലപ്പുഴയില്‍ സര്‍ക്കാര്‍ പരിപാടിയില്‍ സംസാരിക്കുകയായിരുന്നു അദ്ദേഹം. നല്ലത് ചെയ്താലും നല്ല ശിക്ഷ കിട്ടുമെന്ന് പുരാണങ്ങളും ഇതിഹാസങ്ങളും പഠിപ്പിച്ചിട്ടുണ്ടെന്നും കടകംപള്ളി ഓര്‍മ്മിപ്പിച്ചു. സര്‍ക്കാര്‍ നല്ലത് ചെയ്തിട്ടും 20 സീറ്റില്‍ 19ലും എല്‍.ഡി.എഫ് തോറ്റിരുന്നു. ആലപ്പുഴ മണ്ഡലത്തില്‍ എ.എം ആരിഫ് മാത്രമാണ് വിജയിച്ചത്. അഞ്ചാറ് സീറ്റിലെങ്കിലും വിജയിക്കുമെന്നാണ് സര്‍ക്കാരും മുന്നണിയും കരുതിയിരുന്നത്. 

'ഇത്രയും വലിയ ശിക്ഷ നല്‍കാന്‍ സര്‍ക്കാര്‍ എന്തെങ്കിലും തെറ്റ് ചെയ്‌തോ എന്ന് ഒരുപാട് ആലോചിച്ചു. ആകെ ആശ്വാസം, നല്ലത് ചെയ്താല്‍ നല്ല ശിക്ഷ കിട്ടുമെന്ന് പുരാണങ്ങള്‍ പഠിപ്പിച്ചത് ഓര്‍മ്മിച്ചപ്പോഴാണ്. യേശുക്രിസ്തുവിനെ ക്രൂശിലേറ്റിയത് തെറ്റ് ചെയ്തിട്ടാണോ? മൂന്ന് ദിവസം കുരിശില്‍ കിടന്ന് ഇഞ്ചിഞ്ചായി അദ്ദേഹം മരിച്ചത് വല്ലതും ചെയ്തിട്ടാണോ?' 'സീത മോശക്കാരിയായിട്ടാണോ രാമന്‍ കാട്ടിലേക്ക് ഉപേക്ഷിച്ചത്. ഏതോ അലക്കുകാര്‍ പറഞ്ഞു, രാവണന്റെ കൊട്ടാരത്തില്‍ താമസിച്ചതല്ലേയെന്ന്. അത് കേട്ട് സീതയെ രാമന്‍ കാട്ടില്‍ ഉപേക്ഷിച്ചില്ലേ? അങ്ങനെ് ആശ്വസിക്കുകയാണ്. നല്ലത് ചെയ്താലും നല്ല ശിക്ഷ കിട്ടും' കടകംപള്ളി പറഞ്ഞു. ശബരിമല വിഷത്തില്‍ കോടതി വിധി നടപ്പാക്കുക മാത്രമാണ് സര്‍ക്കാര്‍ ചെയ്തതെന്നും അതിന് ഇത്രയും ക്രൂരിക്കരുതായിരുന്നു എന്നാണ് കടകംപള്ളി ഉദ്ദേശിച്ചത്. 

അതേസമയം നല്ല രീതിയില്‍ പ്രവര്‍ത്തിച്ച സര്‍ക്കാരിനെ ജനംപിന്തുണയ്ക്കാഞ്ഞത് ശബരിമല യുവതീപ്രവേശനം കൊണ്ട് മാത്രമാണെന്ന് പാര്‍ട്ടിയിലേയും മുന്നണിയിലേയും നേതാക്കളടക്കം ഭൂരിപക്ഷം പേരും വിശ്വസിക്കുന്നു. പ്രളയത്തില്‍ പമ്പ തകര്‍ന്ന് കിടക്കുന്നതിനാല്‍ കഴിഞ്ഞ മണ്ഡലകാലത്ത് യുവതീപ്രവേശനം ഒഴിവാക്കാമായിരുന്നു. അങ്ങനെയെങ്കില്‍ ഇത്രയും വലിയ തിരിച്ചടി സര്‍ക്കാരിനും മുന്നണിക്കും ലഭിക്കില്ലായിരുന്നെന്നും സി.പി.ഐയിലെ അടക്കം നേതാക്കള്‍ സ്വകാര്യ സംസാരങ്ങളില്‍ പറയുന്നുണ്ട്. എന്നാല്‍ കോടതി വിധി വന്നപ്പോള്‍ കോണ്‍ഗ്രസും ബി.ജെ.പിയും അടക്കം സ്വാഗതം ചെയ്യുകയും നാമജപക്കാര്‍ തെരുവിലിറങ്ങിയപ്പോള്‍ നിലപാട് മാറ്റുകയുമായിരുന്നു. ഭരണഘടനയുടെ അടിസ്ഥാനത്തില്‍ പ്രവര്‍ത്തിക്കുന്ന സര്‍ക്കാരിന് അതിന് കഴിയില്ല എന്നാണ് മുന്നണിയിലെ മറ്റ് ചിലരുടെ മറുവാദം. 

ശബരിമല സമരം നടത്തുകയും അക്രമം അഴിച്ചുവിടുകയും ചെയ്തത് ബി.ജെ.പിയും ആര്‍.എസ്.എസും ആയിരുന്നെങ്കിലും ഭക്തര്‍ കോണ്‍ഗ്രസിനെയും യു.ഡി.എഫിനെയുമാണ് വിശ്വാസത്തിലെടുത്തത്. അങ്ങനെ നോക്കുമ്പോഴും മണ്ണും ചാരി നിന്നവന്‍ പെണ്ണും കൊണ്ടുപോയി എന്ന പ്രയോഗം കോണ്‍ഗ്രസിന് ചേരും. ഭക്തര്‍ക്ക് ധാര്‍മിക പിന്തുണ നല്‍കിയതല്ലാതെ യാതൊരു വിധ പ്രക്ഷോഭപരിപാടികളും നടത്താതെയാണ് യു.ഡി.എഫ് ലോക്‌സഭാ തെരഞ്ഞെടുപ്പില്‍ ചരിത്ര വിജയം നേടിയത്. കാസര്‍കോട് അടക്കം ബി.ജെ.പി വോട്ട് കൊണ്ടാണ് കോണ്‍ഗ്രസ് ജയിച്ചതെന്ന് കണക്കുകള്‍ ചൂണ്ടിക്കാട്ടി എല്‍.ഡി.എഫ് ആരോപിക്കുന്നു. വടകരയിലും അതാണ് സംഭവിച്ചതെന്നും അവര്‍ പറയുന്നു. നൈനായി കിട്ടിയ വിജയം ഉപതെരഞ്ഞെടുപ്പിലും ആവര്‍ത്തിക്കാനാവുമോ എന്നതാണ് യു.ഡി.എഫ് നേരിടുന്ന വെല്ലുവിളി. എല്‍.ഡി.എഫിനാകട്ടെ ജനവിശ്വാസം എങ്ങനെയും നേടുക എന്നതും.