ലോക്‌സഭാ തെരഞ്ഞെടുപ്പിലെ കനത്ത പരാജയം സ്വയംവരുത്തിവെച്ചതാണെന്ന് തിരിച്ചറിയാതെ മുഖ്യമന്ത്രി മാധ്യമങ്ങളുടെ നെഞ്ചത്ത് കയറുന്നു. എല്‍.ഡി.എഫിനെ പരാജയപ്പെടുത്താന്‍ ചില മാധ്യമങ്ങള്‍ ശ്രമിച്ചെന്ന് മുഖ്യമന്ത്രി പിണറായി വിജയന്‍ ആരോപിച്ചു. ഇടത് സ്ഥാനാര്‍ത്ഥികള്‍ പരാജയപ്പെടുമെന്ന പ്രതീതി ചില മാധ്യമങ്ങള്‍ സൃഷ്ടിച്ചു. ജനങ്ങളെ തെറ്റിദ്ധരിപ്പിക്കാനുള്ള ശ്രമം നല്ല പോലെ നടന്നു. അത് വോട്ടര്‍മാരെ സ്വാധീനിച്ചിരിക്കാമെന്നും മുഖ്യമന്ത്രി പിണറായി വിജയന്‍ ആരോപിച്ചു. ശബരിമല യുവതീപ്രവേശനം തെരഞ്ഞെടുപ്പിനെ ബാധിച്ചെന്നും പാര്‍ട്ടി വോട്ടുകള്‍ പോലും അങ്ങനെയാണ് ചോര്‍ന്നതെന്നും സി.പി.എം സംസ്ഥാന സെക്രട്ടറിയേറ്റ് വിലയിരുത്തിയത് പോലും മറികടന്നാണ് മുഖ്യമന്ത്രിയുടെ പുതിയ കണ്ടുപിടുത്തം.

ചാനലുകളുടെ തെറ്റായ വാര്‍ത്തകള്‍ വിശ്വസിച്ച ജനങ്ങള്‍ക്ക് ഇപ്പോള്‍ തിരിച്ചറിവുണ്ടായെന്നും മുഖ്യമന്ത്രി പറയുന്നു. ഇടതുപക്ഷത്തോട് ജനങ്ങള്‍ക്ക് പ്രത്യേക അകല്‍ച്ചയുണ്ടെന്ന് തോന്നുന്നില്ല. ബിജെപിയുടെയും നരേന്ദ്രമോദിയുടെയും ഭരണത്തെ ഭയന്ന് വോട്ടര്‍മാര്‍ യുഡിഎഫിന് വോട്ട് ചെയ്തു. അല്ലാതെ ഇടതുപക്ഷത്തോടുള്ള അകല്‍ച്ച കൊണ്ടല്ലെന്നുമാണ് മുഖ്യമന്ത്രിയുടെ കണ്ടെത്തല്‍. ശബരിമല കോടതിവിധിയുടെ മറവില്‍ വിശ്വാസികളെ തെറ്റിദ്ധരിപ്പിക്കാന്‍ ചിലര്‍ ശ്രമിച്ചു. എല്‍.ഡി.എഫ് സര്‍ക്കാര്‍ വിശ്വാസികള്‍ക്ക് എതിരല്ല. ഇന്ത്യയുടെ പരമോന്നത കോടതിയുടെ വിധി നടപ്പാക്കാന്‍ സര്‍ക്കാര്‍ ബാധ്യസ്ഥരാണെന്നും മുഖ്യമന്ത്രി ചൂണ്ടിക്കാട്ടി.

യുവതീപ്രവേശന വിധി നടപ്പാക്കാന്‍ വേണ്ട സുരക്ഷ ഉറപ്പാക്കാനാണ് ബി.ജെ.പി ഭരിക്കുന്ന കേന്ദ്രസര്‍ക്കാരും സംസ്ഥാന സര്‍ക്കാരിനോട് ആവശ്യപ്പെട്ടത്. വിധി നടപ്പാക്കിയതിനെയാണ് ചിലര്‍ വിശ്വാസികള്‍ക്ക് എതിരായ ശ്രമമെന്ന് വരുത്തിത്തീര്‍ക്കാന്‍ ശ്രമിച്ചത്. അതും ജനങ്ങളെ, പ്രത്യേകിച്ച് ഭക്തരെ തെറ്റിദ്ധരിപ്പിച്ചു. ജനങ്ങള്‍ക്കിപ്പോള്‍ യാഥാര്‍ത്ഥ്യം മനസിലായിട്ടുണ്ട്. ഇടത്പക്ഷത്തിന്റെ പരാജയം താല്‍ക്കാലികമാണെന്നും താമസിക്കാതെ തിരിച്ച് വരുമെന്നും മുഖ്യമന്ത്രി പറഞ്ഞു. സിപിഎം മറ്റത്തൂര്‍ ലോക്കല്‍ കമ്മിറ്റി ഓഫീസ് ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി പിണറായി വിജയന്‍.

അതേസമയം മുഖ്യമന്ത്രിയുടെ കര്‍ക്കശ നിലപാടാണ് തെരഞ്ഞെടുപ്പില്‍ ഇത്രയുംകനത്ത പരാജയം ഏറ്റുവാങ്ങാന്‍ കാരണമെന്ന് പാര്‍ട്ടിയിലെ പല നേതാക്കളും രഹസ്യമായി പറയുന്നുണ്ട്. സംസ്ഥാന സെക്രട്ടറിയേറ്റും പി.ബിയും ശബരിമല പരാജയകാരണമാണെന്ന് വിലയിരുത്തുന്നു. ശബരിമല യുവതീപ്രവേശനം നടത്താന്‍ മുഖ്യമന്ത്രി തീരുമാനിച്ചത് മുതല്‍ കേരളത്തിലെ ഭൂരിപക്ഷം മാധ്യമങ്ങളും മാധ്യമപ്രവര്‍ത്തകരും അദ്ദേഹത്തിന് പൂര്‍ണ പിന്തുണ നല്‍കിയിരുന്നു. ബി.ജെ.പിയുടെയും കോണ്‍ഗ്രസിന്റെയും നിലപാടുകള്‍ക്കെതിരെ നിരന്തരം വാര്‍ത്തകള്‍ നല്‍കിയതിന് സംസ്ഥാനത്ത് നിരവധി മാധ്യമപ്രവര്‍ത്തകര്‍ ആക്രമിക്കപ്പെട്ടിരുന്നു. അതെല്ലാം മറന്നാണ് മുഖ്യമന്ത്രിയുടെ പുതിയ വിലയിരുത്തല്‍.