കഴിഞ്ഞ വര്‍ഷം നിപ്പയുടെ പ്രതിരോധ പ്രവര്‍ത്തനങ്ങളില്‍ സജീവമായിരുന്ന റൂബി സജ്ന എന്ന നഴ്സിനെതിരെ സംഘപരിവാറിന്റെ വര്‍ഗീയ പ്രചരണം ശക്തം. എന്ത് സംഭവിച്ചാലും അവസാന നിപ്പാ വൈറസിനെ നിര്‍മ്മാര്‍ജ്ജനം ചെയ്യുന്നതു വരെ സേവനം ചെയ്യാനും മരിച്ചു വീഴാനും ഞങ്ങളുണ്ടാകും എന്ന് ഫേസ്ബുക്കിലൂടെ റൂബി സജ്ന ഫേസ്ബുക്കില്‍ കുറിച്ചിരുന്നു. അന്ന് റൂബി ഫേസ്ബുക്കിലിട്ട കുറിപ്പ് നിപയ്ക്കെതിരായ കേരളത്തിന്റെ പോരാട്ടത്തിന് ആത്മവിശ്വാസം പകർന്ന ഒന്നായിരുന്നു. വീണ്ടുമൊരു നിപ്പാ കാലത്തിന്‍റെ ആശങ്കയില്‍ മാരകവ്യാധിയെ നേരിടാന്‍ ജനം ഒറ്റക്കെട്ടായി നീങ്ങുമ്പോഴാണ് നഴ്‌സിനെതിരെ സൈബർ ആക്രമണം നടക്കുന്നത്.

‘ഇവൾ ചതിക്കും ജിഹാദിച്ചി’ എന്ന കമന്റോടെ ഒരു സംഘപരിവാര്‍ പ്രൊഫൈലിൽ റൂബിയുടെ ചിത്രം സഹിതം പോസ്റ്റ് വന്നതോടെയാണ് മറ്റ് സംഘ് പേജുകൾ ഈ പ്രചാരണം ഏറ്റുപിടിച്ചിരിക്കുന്നത്. ഇടതുപക്ഷ അനുഭാവി കൂടിയാണ് റൂബി എന്നതാണ് സംഘപരിവാറുകാരെ പ്രകോപിപ്പിച്ചിരിക്കുന്നത്.

ഈ വര്‍ഗീയ ആക്രമണം തന്നെ തളർത്തില്ലെന്ന് റൂബി ഫേസ്ബുക്കിലൂടെ പ്രതികരിച്ചു. കൂടുതൽ ഊർജസ്വലമായി തന്നിലേൽപ്പിച്ചിട്ടുള്ള ഉത്തരവാദിത്വങ്ങൾ നിർവ്വഹിക്കുമെന്ന് അവർ പറഞ്ഞു. റൂബിക്ക് പിന്തുണ നൽകി നിരവധി ഫേർ കമന്റ് ചെയ്യുകയും പോസ്റ്റുകളിടുകയും ചെയ്യുന്നുണ്ട്. അതേസമയം നിപ്പയില്‍ കേരള സര്‍ക്കാരിനെതിരേയും സംഘപരിവാര്‍ നുണ പ്രചരണം കൊഴുപ്പക്കുന്നുണ്ട്. നിരീക്ഷണത്തില്‍ കഴിയുന്ന ആറ് പേര്‍ക്ക് നിപ്പയില്ലെന്ന് സ്ഥിരീകരിച്ചുകൊണ്ടുള്ള ആരോഗ്യ മന്ത്രി കെകെ ശൈലജയുടെ പത്രസമ്മേളനത്തിന്‍റെ ലൈവ് വീഡിയോയ്ക്ക് താഴെയാണ് ഇത് സിനിമാ പ്രമോഷനാണെന്നായിരുന്നു ഒരാളുടെ കമന്‍റ്. റിലീസാവാന്‍ പോകുന്ന ആഷിഖ് അബു ചിത്രം വൈറസിന് വേണ്ടിയുള്ള പ്രമോഷന്‍ അവസാനിച്ചെന്നായിരുന്നു ഇയാളുടെ കമന്‍റ്. ഇയാള്‍ക്കെതിരെ കടുത്ത പ്രതിഷേധമാണ് ഉയരുന്നത്.

അതേ സമയം റൂബിക്ക് പിന്തുണ നൽകി കേരള ഗവൺമെന്റ് നഴ്സസ് അസോസിയേഷൻ രംഗത്തു വന്നിട്ടുണ്ട്. സംഘടനയുടെ പ്രസ്താവന ഇങ്ങനെ ആയിരുന്നു.

മതവും ജാതിയും പറഞ്ഞ് അധിക്ഷേപിച്ചാൽ തളരുന്നവരല്ല ഞങ്ങൾ: കൂടുതൽ വീറോടെയും ശക്തിയോടെയും പ്രതികരിക്കുന്നവരാണ് ഞങ്ങൾ: വർഗ്ഗീയത തുലയട്ടെ: കേരള ഗവ: നേഴ്സസ് അസോസിയേഷൻ കോഴിക്കോട് ജില്ലാ കമ്മിറ്റിയംഗം സ. റൂബി സജ്നക്കെതിരെയുള്ള വർഗ്ഗീയ പരാമർശത്തിൽ കേരള ഗവ: നേഴ്സസ് അസോസിയേഷൻ ശക്തമായി അപലപിക്കുന്നു:

പ്രതിഷേധം രേഖപ്പെടുത്തുന്നു.

ജന:സെക്രട്ടറി
കെ.ജി.എൻ.എ