രണ്ടു മാസത്തെ വേനലവധിയുടെ അർമ്മാദനം കഴിഞ്ഞു പുതിയ അധ്യാന വർഷം ഇന്ന് ആരംഭിക്കുമ്പോൾ സ്‌കൂളില്‍ പോകുന്ന വിദ്യാര്‍ത്ഥികള്‍ക്ക് മലയാള സിനിമാ താരങ്ങളായ ചോക്കലേറ്റ് ബോയ് കുഞ്ചാക്കോ ബോബന്‌റേയും ഇന്ദ്രജിത്തിന്റേയും വക ഒരു വെറൈറ്റി ആശംസ. രണ്ടുപേരുടെയും കൂട്ടുകെട്ടിൽ പുറത്തിറങ്ങിയ ‘കസിന്‍സ്’ എന്ന ചിത്രത്തിലെ ചിത്രം ഇന്‍സ്റ്റഗ്രാമില്‍ പോസ്റ്റ് ചെയ്തുകൊണ്ടാണ് ആശംസ അറിയിച്ചിരിക്കുന്നത്.

‘പുതിയ അധ്യയനവര്‍ഷത്തില്‍ സ്‌കൂളില്‍ പോകുന്ന എല്ലാ വിദ്യാര്‍ത്ഥികള്‍ക്കും ആശംസകള്‍,’ എന്നാണ് ചിത്രത്തില്‍ കുറിച്ചിരിക്കുന്നത്. പൂര്‍ണിമ ഇന്ദ്രജിത്ത്, സൗബിന്‍ ഷാഹിര്‍ തുടങ്ങിയവരും ഈ ചിത്രം തങ്ങളുടെ ഇന്‍സ്റ്റഗ്രാം സ്റ്റോറിയായി പങ്കുവച്ചിട്ടുണ്ട്. ഇതാണ് ഇപ്പോൾ സോഷ്യൽ മീഡിയ ഏറ്റെടുത്തിരിക്കുന്നത്.

ഹാസ്യത്തിന് പ്രധാന്യം നല്‍കി 2014ല്‍ വൈശാഖ് സംവിധാനം ചെയ്ത ചിത്രമാണ് കസിൻസ്. കുഞ്ചാക്കോ ബോബനും, ഇന്ദ്രജിത്തും, സുരാജ് വെഞ്ഞാറമൂടും, ജോജു ജോര്‍ജ്ജും മുഖ്യവേഷത്തിലെത്തുന്ന ചിത്രത്തില്‍, തമിഴ് നടി വേദികയാണ് നായിക ര്‍. മിയ ജോര്‍ജും ഒരു അതിഥി താരമായി എത്തിയിരുന്നു. കോമഡിയുടെ പശ്ചാത്തലത്തിലൂടെ വളരെ ത്രില്ലറായ ഒരു കഥയായിരുന്നു കസിന്സിന്റെത് .

സാം, ജോര്‍ജി, പോളി, ടോണി എന്നിവര്‍ കസിന്‍സാണ്. ഇവരില്‍ പോളിയും ടോണിയും സഹോദരങ്ങളാണ്. സാമിന്റെ ജീവിതത്തിലെ പഠനകാലത്ത് ആറുവര്‍ഷക്കാലം ഓര്‍മ്മയില്‍നിന്നും നഷ്ടപ്പെടുന്നു. അത് വീണ്ടെടുക്കാന്‍ ഡോക്ടറുടെ നിര്‍ദ്ദേശപ്രകാരം നാലുപേരും നടത്തുന്ന ഒരു യാത്രയിലൂടെയാണ് ഈ ചിത്രത്തിന്റെ കഥാഗതികള്‍ വികസിക്കുന്നത്.

കസിന്‍സിന് പുറമെ പോപ്പിന്‍സ്, വേട്ട, ഫോര്‍ ഫ്രണ്ട്‌സ്, മുല്ലവള്ളിയും തേന്മാവും, എല്‍സമ്മ എന്ന ആണ്‍കുട്ടി, ത്രീ കിങ്‌സ്, റേസ് എന്നീ ചിത്രങ്ങളിലും കുഞ്ചാക്കോ ബോബനും ഇന്ദ്രജിത്തും ഒന്നിച്ച് അഭിനയിച്ചിട്ടുണ്ട്. ജൂണ്‍ ഏഴിന് തിയേറ്ററുകളില്‍ എത്തുന്ന ആഷിഖ് അബു ചിത്രത്തിലും ഇരുവരും ഒന്നിച്ച് അഭിനയിച്ചിരിക്കുകയാണ്.