രാഷ്ട്രീയക്കാരുടെ പട്ടിണിയും ദാരിദ്ര്യവും പറയാതിരിക്കുന്നതാണ് ഭേദം. വെള്ള വസ്ത്രത്തിനുള്ളില്‍ ഒരു വിശക്കുന്ന വയറുണ്ട്. അധികാരം ഉള്ളപ്പോര്‍ മാത്രം ചില നേതാക്കള്‍ക്ക് കുശാലാണ്. എന്നാല്‍ പലരും ഭാര്യമാരേയും മറ്റു ബന്ധുക്കളേയും ആശ്രയിച്ചാണ് കഴിയുന്നത്. അക്കാര്യം തുറന്ന് പറയുകയാണ് കാസര്‍ഗോഡ് നിന്നും ജയിച്ച രാജ് മോഹന്‍ ഉണ്ണിത്താന്‍.

എംപിയായ തിരഞ്ഞെടുക്കപ്പെട്ട തനിക്ക് ശമ്പളവും എംപി പാസും മാത്രം മതിയെന്ന് എംപി രാജ്‌മോഹന്‍ ഉണ്ണിത്താന്‍ പറഞ്ഞു. ഇതിനു പുറമെ കിട്ടുന്ന മറ്റെല്ലാ സൗകര്യങ്ങളും ജനങ്ങള്‍ക്ക് ഉപയോഗിക്കാമെന്ന് രാജ്‌മോഹന്‍ ഉണ്ണിത്താന്‍ പറഞ്ഞു. കാസര്‍കോട് കെഎംസിസി സംഘടിപ്പിച്ച യോഗത്തില്‍ സംസാരിക്കവെയാണ് ഉണ്ണിത്താന്‍ പ്രഖ്യാപനം നടത്തിയത്.

ഇത്രയും കാലം തന്നെ തീറ്റിപ്പോറ്റിയത് ഭാര്യയും കുട്ടികളുമാണ്. ഭാര്യ കഴിഞ്ഞ ദിവസം റിട്ടയര്‍ ചെയ്തതോടെ ജോലിയും പോയി. അതുകൊണ്ട് മാത്രമാണ് ശമ്പളം എടുക്കുന്നതെന്നും, സംസ്ഥാനത്ത് സഞ്ചരിക്കാനും നിങ്ങളെ കാണാനും കയ്യില്‍ കാശില്ലാത്തതുകൊണ്ടാണ് പാസ് ഉപയോഗിക്കുന്നതെന്നും അദേഹ പറഞ്ഞു. കാസര്‍കോട് നിന്ന് മത്സരിക്കാന്‍ താന്‍ ഒരിക്കലും ആഗ്രഹിച്ചിട്ടില്ല. എന്നാല്‍ കാസര്‍കോട് നിന്ന് കിട്ടിയ സ്‌നേഹവും പിന്തുണയും ഒരിക്കലും തനിക്ക് മറക്കാനാകില്ലെന്നും അദേഹം കൂട്ടിച്ചേര്‍ത്തു. 35 വര്‍ഷത്തിനു ശേഷം കാസര്‍കോട് മണ്ഡലം തിരിച്ചുപിടിക്കാനായത് നിങ്ങളുടെ പ്രാര്‍ത്ഥന പടച്ചോന്‍ കേട്ടതുകൊണ്ടാണെന്നും രാജ്‌മോഹന്‍ ഉണ്ണിത്താന്‍ പറഞ്ഞു.

തനിക്ക് ലഭിക്കുന്ന എംപി ഫണ്ട് യുഡിഎഫ് സമിതി പറയുന്ന രീതിയില്‍ ചിലവഴിക്കും. അഞ്ചു കോടി രൂപയാണ് ഒരു വര്‍ഷം എംപി ഫണ്ടായി ലഭിക്കുന്നത്. വികസനപ്രവര്‍ത്തനങ്ങളില്‍ കേന്ദ്ര സര്‍ക്കാരുമായി യോജിച്ച് മുന്നോട്ടു പോകുമെന്നും, കേന്ദ്രമന്ത്രി മുരളീധരന് മുമ്പില്‍ നിര്‍ദേശങ്ങള്‍ മുന്നോട്ടുവെച്ചിട്ടുണ്ടെന്നും അദേഹം പറഞ്ഞു. മരിക്കുന്നതു വരെ താന്‍ കോണ്‍ഗ്രസുകാരനായിരിക്കുമെന്നും രാജ്‌മോഹന്‍ ഉണ്ണിത്താന്‍ പറഞ്ഞു.

അതേസമയം കാസര്‍കോട് എം.പി എന്ന നിലയില്‍ ബി.ജെ.പിയോട് ശത്രുതയില്ലെന്ന് രാജ്‌മോഹന്‍ ഉണ്ണിത്താന്‍ പറഞ്ഞു. കോണ്‍ഗ്രസുകാരന്‍ എന്ന നിലയ്ക്ക് ബി.ജെ.പിയോട് ശത്രുതയുണ്ട്. രാഹുല്‍ ഗാന്ധി കോണ്‍ഗ്രസ് അധ്യക്ഷ സ്ഥാനം ഒഴിയരുതെന്ന് ആവശ്യപ്പെടുമെന്നും അദ്ദേഹം വ്യക്തമാക്കി. 

ഇന്ത്യയുടെ പ്രധാനമന്ത്രിക്കസേരയില്‍ രാഹുല്‍ ഗാന്ധി ഉണ്ടാകുമെന്നാണ് ഞങ്ങള്‍ പ്രതീക്ഷിച്ചത്. കോണ്‍ഗ്രസ് അധികാരത്തില്‍ വരുമെന്നാണ് ഞങ്ങള്‍ പ്രതീക്ഷിച്ചത്. കേരളത്തിലെ ജനങ്ങള്‍ വോട്ടുചെയ്തത് അതിന് വേണ്ടിയാണെന്നും ഉണ്ണിത്താന്‍ വ്യക്തമാക്കി.