ശബരിമല സമരത്തില് ഒപ്പംനിന്നവര് പോലും ലോക്സഭാ തെരഞ്ഞെടുപ്പില് കൈവിട്ടിട്ടും കേരളത്തിന്റെ ജനമനസ്സ് കീഴടക്കാന് പ്രധാനമന്ത്രി നരേന്ദ്രമോദിയുടെ മാസ് പ്ലാന്
ശബരിമല സമരത്തില് ഒപ്പംനിന്നവര് പോലും ലോക്സഭാ തെരഞ്ഞെടുപ്പില് കൈവിട്ടിട്ടും കേരളത്തിന്റെ ജനമനസ്സ് കീഴടക്കാന് പ്രധാനമന്ത്രി നരേന്ദ്രമോദിയുടെ മാസ് പ്ലാന്. അതിന്റെ ഭാഗമായാണ് ഗുരുവായൂരില് ദര്ശനം നടത്തിയത്. മറ്റ് സംസ്ഥാനങ്ങളില് പരീക്ഷിച്ച് വിജയിച്ച തന്ത്രങ്ങളായിരിക്കില്ല ബി.ജെ.പി ഇനി കേരളത്തില് സ്വീകരിക്കുക എന്നാണ് റിപ്പോര്ട്ട്. വര്ഗീയതയും വ്യാജപ്രചരണങ്ങളും അഴിച്ചുവിടാതെ വികസനത്തിന്റെ രാഷ്ട്രീയമായിരിക്കും മുന്നോട്ട് വയ്ക്കുക. ഒ. രാജഗോപാല് കേന്ദ്രമന്ത്രിയായിരുന്നപ്പോഴാണ് കേരളത്തില് ഏറ്റവും കൂടുതല് റെയില്വേ പദ്ധതികള് നടപ്പാക്കിയത്. അതിന്റെ ഗുണം വോട്ടായി മാറിയിരുന്നു. പക്ഷെ, വിജയിക്കാനായില്ല. ഇപ്പോള് സംസ്ഥാനത്തെ രാഷ്ട്രീയ കാലാവസ്ഥ മാറിവരുകയാണ്. ആഞ്ഞ് പിടിച്ചാല് വട്ടിയൂര്ക്കാവും കഴക്കൂട്ടവും ബി.ജെ.പിക്ക് പിടിച്ചെടുക്കാനാവും. കഴിഞ്ഞ ലോക്സഭാ തെരഞ്ഞെടുപ്പ് കണക്കുകള് പരിശോധിച്ചാല് ആറ് നിയമസഭാ മണ്ഡലങ്ങളില് ബി.ജെ.പിയുടെ പിന്തുണ വര്ദ്ധിച്ചിട്ടുണ്ട്.
അക്രമ രാഷ്ട്രീയം ഭൂരിപക്ഷം വരുന്ന ഹൈന്ദവ സമൂഹം ഇഷ്ടപ്പെടുന്നില്ല എന്ന തിരിച്ചറിവാണ് പുതിയ ശൈലി തെരഞ്ഞെടുക്കാന് ബി.ജെ.പിയെ പ്രേരിപ്പിച്ചത്. ശബരിമല സമരത്തില് എന്.എസ്.എസ് ഉള്പ്പെടെ പാര്ട്ടിക്ക് ആദ്യം പിന്തുണ നല്കിയ ശേഷം പിന്നീട് സമദൂരത്തിലേക്ക് തിരിയാന് കാരണം അക്രമ സംഭവങ്ങളാണെന്ന വിലയിരുത്തല് ഒ. രാജഗോപാലിനെ പോലുള്ള മുതിര്ന്ന നേതാക്കള്ക്കുണ്ട്. ശബരിമല വിഷയത്തില് രാഷ്ട്രീയം കളിക്കാന് പാടില്ലായിരുന്നെന്ന നിലപാടിലാണ് മറ്റ് ചില നേതാക്കള്. റെഡി ടു വെയ്റ്റ് ക്യാമ്പയിന് നടത്തിയ യുവതികളടക്കം തെരഞ്ഞെടുപ്പിന് ശേഷം പാര്ട്ടിക്കെതിരെ വിമര്ശനം ഉന്നയിച്ചത് ഇതിന്റെ ഭാഗമായാണെന്ന് ഇവരുടെ വിലയിരുത്തല്. തിരുവനന്തപുരവും പത്തനംതിട്ടയും വിജയിക്കുമെന്ന വിശ്വാസമായിരുന്നു ദേശീയനേതൃത്വത്തിന് ഉണ്ടായിരുന്നത്. എന്നാല് ന്യൂനപക്ഷങ്ങളും ഹൈന്ദവരും കോണ്ഗ്രസിനൊപ്പം നില്ക്കുകയായിരുന്നു. ശബരിമല സമരത്തില് അവര് കാര്യമായി ഒന്നും ചെയ്തില്ലെങ്കിലും അക്രമം നടത്തിയില്ല. അതുകൊണ്ടാണ് ജനം അവര്ക്കൊപ്പം നിന്നതെന്നും ചിലര് ചൂണ്ടിക്കാട്ടുന്നു.
കേരളത്തില് നിന്ന് ഒരു എം.പിയെ പോലും കിട്ടിയില്ലെങ്കിലും വികസനപ്രവര്ത്തനങ്ങളില് യാതൊരു വിട്ട് വീഴ്ചയ്ക്കും തയ്യാറല്ലെന്ന് പ്രധാനമന്ത്രി പറഞ്ഞത് ദീര്ഘവീക്ഷണത്തോടെയാണ്. കേന്ദ്രം ഒന്നും തരുന്നില്ല എന്ന പരാതികള് ഒഴിവാക്കാനായിരിക്കും നീക്കം. രാജ്യത്തെ എല്ലാ ജനങ്ങളുടെയും പ്രധാനമന്ത്രിയായിരിക്കും താനെന്നും മോദി വ്യക്തമാക്കിയത് കോണ്ഗ്രസിനെയും സി.പി.എമ്മിനെയും വെട്ടിലാക്കിയിട്ടുണ്ട്. നാടിന്റെ പുരോഗതിക്ക് ജനം തടസ്സം നില്ക്കില്ലെന്ന് മോദിക്കറിയാം. വികസനപ്രവര്ത്തനങ്ങള് കാര്യക്ഷമമായി നടത്തിയാല് രാഷ്ട്രീയം നോക്കാതെ മലയാളികള് ഇരുകയ്യും നീട്ടി സ്വീകരിക്കും. അതിനാല് അത്തരത്തിലുള്ള സമീപനമായിരിക്കും ബി.ജെ.പിയും കേന്ദ്രസര്ക്കാരും സ്വീകരിക്കുക. അത് കോണ്ഗ്രസിനും സി.പി.എമ്മിലും വലിയ തിരിച്ചടിയാകും എന്ന കാര്യത്തില് സംശയമില്ല. വി. മുരളീധരന് പ്രവാസികാര്യ വകുപ്പ് നല്കിയത് തന്നെ കേരളത്തെ ലക്ഷ്യം വെച്ചാണ്.
മഹാരാഷ്ട്രയില് നിന്നുള്ള രാജ്യസഭാ എം.പിയാണെങ്കിലും വി.മുരളീധരന്റെ പ്രധാനപ്രവര്ത്തനം കേരളം കേന്ദ്രീകരിച്ചായിരിക്കും. ശബരിമലയിലും ഗുരുവായൂരിലും അടക്കം പ്രത്യേകം പദ്ധതികള് നടപ്പാക്കും. ഇടഞ്ഞ് നില്ക്കുന്ന വെള്ളാപ്പള്ളി നടേശനേയും എസ്.എന്.ഡി.പിയേയും അനുനയിപ്പിക്കാനുള്ള നീക്കങ്ങളും താമസിക്കാതെ ഉണ്ടാവും. ദേശീയപാതാ വികസനത്തില് കേന്ദ്രഉപരിതല ഗതാഗതമന്ത്രി നിതിന്ഗഡ്കരി മികച്ച പ്രവര്ത്തനമാണ് നടത്തിയിട്ടുള്ളത്. ഇക്കാര്യത്തില് മുഖ്യമന്ത്രി പിണറായി വിജയനും അദ്ദേഹത്തെ പരസ്യമായി പ്രശംസിച്ചിരുന്നു. അതിനാല് റോഡുകള്, റെയില്വേ, ഫിഷറീസ് തുടങ്ങിയ മേഖലകളില് കുടുതല് പദ്ധതികളും മറ്റും കേന്ദ്രസര്ക്കാര് കേരളത്തില് നടപ്പാക്കുമെന്നാണ് പ്രതീക്ഷിക്കുന്നത്. ആറ് നിയമസഭാ മണ്ഡലങ്ങളിലെ ഉപതെരഞ്ഞെടുപ്പിലും തദ്ദേശഭരണ തെരഞ്ഞെടുപ്പിലും കൂടുതല് സീറ്റുകള് നേടുകയാണ് മറ്റൊരു ലക്ഷ്യം. അതിന് മുന്നോടിയായി സംസ്ഥാന ഘടകത്തില് അടിമുടി മാറ്റങ്ങളുണ്ടാവുമെന്നും അറിയുന്നു.
https://www.facebook.com/Malayalivartha
