ലോക്‌സഭ തെരഞ്ഞെടുപ്പിലെ കനത്ത പരാജയത്തിന് ശേഷമുള്ള ആദ്യ എല്‍.ഡി.എഫ് സംസ്ഥാന സമിതി ഇന്ന് ചേരും. വൈകുന്നേരം നാലിനാണ് യോഗം ചേരുക. ഘടകകക്ഷികള്‍ പ്രത്യേകം നേതൃയോഗം ചേര്‍ന്ന് പരാജയ കാരണങ്ങളെക്കുറിച്ച് പ്രാഥമിക വിലയിരുത്തല്‍ നടത്തിയെങ്കിലും മുന്നണി യോഗം ചേരുന്നത് ആദ്യമായിട്ടാണ്.

തെരഞ്ഞെടുപ്പ് വിലയിരുത്തലും വരാനിരിക്കുന്ന ആറ് നിയമസഭ ഉപതെരഞ്ഞെടുപ്പും ഭരണപരമായ വിഷയങ്ങളും പരിഗണനയിലുണ്ട്. എല്‍.ഡി.എഫിന് നഷ്ടപ്പെട്ട വിശ്വാസികളെ തിരിച്ചുപിടിക്കാനുള്ള വഴിതിരയലാവും പ്രധാനമായുള്ള അജണ്ട. പരമ്പരാഗതമായി ലഭിച്ചിരുന്ന ഹിന്ദു വോട്ടുകളിലെ വന്‍ ചോര്‍ച്ചയാണ് പരാജയ വ്യാപ്തി വര്‍ധിക്കാന്‍ കാരണമെന്നാണ് സി.പി.ഐ, എല്‍.ജെ.ഡി, ജെ.ഡി (എസ്), എന്‍.സി.പി, കേരള കോണ്‍ഗ്രസ് (ബി) കക്ഷികളുടെ വിലയിരുത്തല്‍.

എല്‍.ഡി.എഫിന്റെ പരമ്പരാഗത വോട്ടുകള്‍ യു.ഡി.എഫിലേക്കും ബി.ജെ.പിയിലേക്കും പോയി. ന്യൂനപക്ഷങ്ങളോട് മൃദുസമീപനം കാണിക്കുമ്പോള്‍ ഹിന്ദു വികാരം വ്രണപ്പെടുത്തിയെന്ന ആക്ഷേപവും വന്‍ തിരിച്ചടിയായി. ശബരിമല കോടതി വിധി നടപ്പാക്കിയത് ശരിയാണെങ്കിലും രണ്ട് സ്ത്രീകളെ ക്ഷേത്ര ദര്‍ശനത്തിന് പൊലീസ് അകമ്പടിയോടെ കൊണ്ടുപോയതാണ് സ്ത്രീ വിശ്വാസികളുടെ വികാരം വ്രണപ്പെടുത്തിയത് എന്ന വിമര്‍ശനം പല കക്ഷികളുടെയും യോഗത്തില്‍ ഉയര്‍ന്നിരുന്നു. സി.പി.എമ്മും സി.പി.ഐയും മാത്രം സീറ്റ് പങ്കുവെച്ചതില്‍ എല്‍.ജെ.ഡി, ജെ.ഡി (എസ്)ന് നീരസം ഉണ്ട്. എല്‍.ഡി.എഫിന്റെ ശൈലിയില്‍ മാറ്റം ആവശ്യമെന്ന് ജെ.ഡി (എസ്) നേതാവ് എ. നീലലോഹിതദാസ് പരസ്യമായി ആവശ്യപ്പെട്ടിരുന്നു.

തോല്‍വിയില്‍ ശബരിമല പങ്ക് ആദ്യം നിഷേധിച്ച സി.പി.എം, കഴിഞ്ഞ സംസ്ഥാന സമിതിക്ക് ശേഷം അതംഗീകരിച്ചു. സി.പി.എം അപ്രമാദിത്വത്തിനു കക്ഷികള്‍ കീഴടങ്ങുന്നുവെന്ന വിമര്‍ശനവുമുണ്ട്.

പരാജയത്തില്‍നിന്ന് കരകയറിയെന്ന് അണികളെ വിശ്വസിപ്പിക്കാന്‍ ഉപതെരഞ്ഞെടുപ്പില്‍ മികച്ച പ്രകടനം കാഴ്ചവെക്കണം. മഞ്ചേശ്വരം, പാല, കൊച്ചി, കോന്നി, അരൂര്‍, വട്ടിയൂര്‍ക്കാവ് എന്നീ നിയമസഭ മണ്ഡലങ്ങളിലാണ് ഉപതെരഞ്ഞെടുപ്പ് നടക്കേണ്ടത്. എം.എല്‍.എമാരുടെ മരണത്തെ തുടര്‍ന്നാണ് മഞ്ചേശ്വരത്തും പാലയിലും തെരഞ്ഞെടുപ്പ് നടക്കുന്നത്. മറ്റ് നാലിടങ്ങളില്‍ എം.എല്‍.എമാര്‍ എം.പിമാരായി തെരഞ്ഞെടുക്കപ്പെട്ടു. ആറില്‍ അരൂര്‍ ഒഴികെ അഞ്ച് സീറ്റും നിലവില്‍ യു.ഡി.എഫിനൊപ്പമാണ്. അട്ടിമറി വിജയമാണ് എല്‍.ഡി.എഫ് ലക്ഷ്യമിടുന്നത്.