ആര്‍.എസ്.പി. അംഗം എന്‍.കെ. പ്രേമചന്ദ്രന്‍ ശബരിമല സംബന്ധിച്ച്  അവതരിപ്പിച്ച സ്വകാര്യ ബില്‍ ഈ ലോക്‌സഭാ സമ്മേളനത്തില്‍ ചര്‍ച്ചക്കെടുക്കില്ല. ഈ സമ്മേളനത്തില്‍ ചര്‍ച്ചയ്‌ക്കെടുക്കാനുള്ള സ്വകാര്യബില്ലുകള്‍ നിശ്ചയിക്കാനായി ചൊവ്വാഴ്ച നടന്ന നറുക്കെടുപ്പില്‍ ശബരിമല ബില്ലിന് സ്ഥാനം ലഭിച്ചില്ല. അടുത്ത പാര്‍ലമെന്റ് സമ്മേളനത്തില്‍ ബില്‍ വീണ്ടും നറുക്കെടുപ്പിനിടും.നറുക്കെടുപ്പില്‍ തിരഞ്ഞെടുക്കപ്പെടുന്ന ആദ്യത്തെ മൂന്നുബില്ലുകള്‍ മാത്രമാണു സഭ ചര്‍ച്ചയ്‌ക്കെടുക്കുക.
പ്രേമചന്ദ്രന്റെ ബില്‍ ഉള്‍പ്പെടെ 32 സ്വകാര്യ ബില്ലുകള്‍ ചൊവ്വാഴ്ച ലോക്‌സഭാ സെക്രട്ടേറിയറ്റ് നറുക്കിട്ടു. എന്നാല്‍, പ്രേമചന്ദ്രന്റെ ബില്‍ പതിനൊന്നാമതായാണു തിരഞ്ഞെടുത്തത്. പ്രേമചന്ദ്രന്റെ മറ്റൊരു ബില്ലായ തൊഴിലുറപ്പ് ബില്‍ നാലാമതും എത്തി. ശബരിമലയില്‍ യുവതീപ്രവേശമനുവദിച്ച സുപ്രീംകോടതി വിധിക്കുമുമ്പുള്ള സ്ഥിതി തുടരാന്‍ വ്യവസ്ഥചെയ്യുന്ന 'ശബരിമല ശ്രീധര്‍മശാസ്താ ടെമ്പിള്‍ (സ്‌പെഷ്യല്‍ പ്രൊവിഷന്‍) ബില്‍ 2019' ഈമാസം 21നാണു ലോക്‌സഭയില്‍ അവതരിപ്പിച്ചത്.
ശബരിമലയില്‍ യുവതീപ്രവേശം അനുവദിച്ച് കഴിഞ്ഞവര്‍ഷം സെപ്റ്റംബര്‍ 28നു സുപ്രീംകോടതി നല്‍കിയ ഉത്തരവു മറികടക്കുന്നതിനുള്ള വ്യവസ്ഥകളാണ് ബില്ലിന്റെ ഉള്ളടക്കം. കോടതിവിധി നിലവിലുള്ളതിനാല്‍ പാര്‍ലമെന്റിനു നിയമനിര്‍മാണം സാധിക്കുമോ എന്നു ലോക്‌സഭാ സെക്രട്ടറി ജനറല്‍ ആരാഞ്ഞതിനെത്തുടര്‍ന്നു നിയമമന്ത്രാലയം പരിശോധിച്ചതിനു ശേഷമാണ് ബില്ലിനു അവതരണാനുമതി നല്‍കിയത്.