അരിയാഹാരം കഴിക്കുന്ന കമ്മ്യൂണിസ്റ്റുകാര്‍ക്കെല്ലാം മനസിലായി എന്തുകൊണ്ട് കഴിഞ്ഞ ലോക്‌സഭാ തെരഞ്ഞെടുപ്പില്‍ എല്‍ഡിഎഫ് തോറ്റെന്ന്. ശബരിമലയിലെ വെല്ലുവിളി തന്നെയാണ് പരാജയ കാരണമെന്ന് കേരളത്തിലെ സകലര്‍ക്കുമറിയാം. കമ്മ്യൂണിസ്റ്റ് അനുഭാവികളായ അയ്യപ്പ ഭക്തര്‍ പണികൊടുത്തതാണ്. പക്ഷെ നേതാക്കള്‍ക്ക് മാത്രം കാര്യം മനസിലായില്ലത്രെ. പല കമ്മിറ്റികള്‍ നടത്തി താത്വിക അവലോകനം നടത്തിയ ശേഷമാണ് കുറച്ചൊക്കെ കാര്യം പിടി കിട്ടിയത്. എന്നാല്‍ പൂര്‍ണമായും അംഗീകരിക്കുന്ന പരിപാടി പാര്‍ട്ടിക്ക് പണ്ടെ ഇല്ല. ഇതൊക്കെ കാണുമ്പോള്‍ ഭക്തര്‍ക്ക് ചിരിയാണ് വരുന്നത്. 

വനിതാമതിലിന് ശേഷം ശബരിമലയില്‍ യുവതികള്‍ കയറിയത് ലോക്‌സഭാ തെരഞ്ഞെടുപ്പില്‍ തിരിച്ചടിച്ചെന്നാണ് സിപിഎം തെരഞ്ഞെടുപ്പ് അവലോകന റിപ്പോര്‍ട്ട് വന്നിരിക്കുന്നത്. ജനങ്ങളുടെ മനസ്സ് മനസ്സിലാക്കുന്നതില്‍ പരാജയപ്പെട്ടത് ഗൗരവകരമായെന്നും ശബരിമല വിഷയം ബിജെപിയും യുഡിഎഫും ഉപയോഗിച്ചെന്നും കണക്കാക്കുന്നു. തോല്‍വിയുടെ ഉത്തരവാദിത്വം പിബിയ്ക്കും കേന്ദ്രക്കമ്മറ്റിക്കുമാണ് കെട്ടിവെച്ചിരിക്കുന്നത്.

വനിതാമതിലിന്റെ പിറ്റേന്ന് തന്നെ ശബരിമലയില്‍ രണ്ടു സ്ത്രീകള്‍ പ്രവേശിച്ചത് പാര്‍ട്ടി അണികള്‍ക്കിടയില്‍ കനത്ത ആഘാതമുണ്ടാക്കി. ഇത് യുഡിഎഫും ബിജെപിയും ഉപയോഗപ്പെടുത്തി. ഇതിനൊപ്പം ബിജെപി കേന്ദ്രത്തില്‍ വീണ്ടും സര്‍ക്കാര്‍ രൂപീകരിക്കുമെന്ന ഭയം മതനിരപേക്ഷ മനസ്സുകളില്‍ യുഡിഎഫിന് അനുകൂലമായി ചുവടുമാറ്റത്തിന് കാരണമാക്കി. സിപിഎമ്മിനെ തോല്‍പ്പിക്കാന്‍ യു!ഡിഎഫിന് ബിജെപി വോട്ട് മറിച്ചിട്ടും ബിജെപിയുടെ വോട്ട് ശതമാനം കൂടിയത് ആശങ്കയുയര്‍ത്തുന്നുവെന്ന് റിപ്പോര്‍ട്ട് വിലയിരുത്തുന്നു. 

ജനങ്ങളുടെ മനസ്സ് മനസ്സിലാക്കുന്നതില്‍ പരാജയപ്പെട്ടത് ഗൗരവകരമാണെന്നും തോല്‍വിയുടെ ഉത്തരവാദിത്വം പിബിയും കേന്ദ്രക്കമ്മറ്റിയും ഏറ്റെടുക്കണമെന്നും പറഞ്ഞിട്ടുണ്ട്. ജനങ്ങളെ തിരിച്ചുപിടിക്കാന്‍ ശക്തമായ രാഷ്ട്രീയ ഇടപെടല്‍ ആവശ്യമാണ്. ജനങ്ങള്‍ അകന്നതും പരമ്പരാഗത വോട്ടില്‍ ഒരുഭാഗത്തിന്റെ വിട്ടുപോകലും മനസ്സിലാക്കാന്‍ ആഴത്തിലുള്ള അവലോകനം ആവശ്യമാണെന്നും റിപ്പോര്‍ട്ടില്‍ പറയുന്നു. 

അതേസമയം കേന്ദ്രത്തില്‍ മതനിരപേക്ഷ സര്‍ക്കാര്‍ രൂപീകരിക്കുന്നതിന് ഇടതുപക്ഷ സാന്നിധ്യം ശക്തിപ്പെടുത്തണമെന്ന മുദ്രാവാക്യത്തിന് വിശ്വാസം നേടാന്‍ കഴിഞ്ഞില്ലെന്നും റിപ്പോര്‍ട്ടിലുണ്ട്. ഇതാദ്യമായിട്ടാണ് തെരഞ്ഞെടുപ്പ് തോല്‍വിയില്‍ തെറ്റ് മനസ്സിലാക്കുന്നതായി സിപിഎം അവലോകനം നടത്തുന്നത്. പാര്‍ട്ടി മുഖപത്രത്തില്‍ തെരഞ്ഞെടുപ്പ് അവലോകന റിപ്പോര്‍ട്ട് പ്രസിദ്ധീകരിക്കുന്നതും പതിവില്ലാത്ത കാര്യമായി.

അതേസമയം എന്‍.കെ. പ്രേമചന്ദ്രന്‍ എംപി അവതരിപ്പിച്ച ശബരിമല ആചാര സംരക്ഷണ ബില്‍ ലോക്‌സഭയില്‍ ഉടന്‍ ചര്‍ച്ചയ്‌ക്കെടുക്കില്ല. ജൂലൈ 12ന് ചര്‍ച്ചയ്‌ക്കെടുക്കേണ്ട സ്വകാര്യ ബില്ലുകള്‍ നറുക്കിട്ടെടുത്തപ്പോള്‍ ശബരിമല ബില്‍ ഉള്‍പ്പെട്ടില്ല. ഒന്‍പത് അംഗങ്ങള്‍ അവതരിപ്പിച്ച 30 സ്വകാര്യബില്ലുകളില്‍ മൂന്നെണ്ണമാണ് ചര്‍ച്ചയ്ക്കായി നറുക്കിട്ടെടുത്തത്.

ജനാര്‍ദന്‍ സിങ് സിഗ്‌രിവാള്‍, സുനില്‍ കുമാര്‍ സിങ്, ശ്രീരംഗ് ബര്‍ണെ എന്നിവരുടെ ബില്ലുകളാണ് ചര്‍ച്ചയ്‌ക്കെടുക്കുന്നത്. ശബരിമലയില്‍ യുവതീപ്രവേശനം അനുവദിച്ച സുപ്രീംകോടതി വിധി മറികടക്കാന്‍ ലക്ഷ്യമിട്ടാണ് എന്‍.കെ. പ്രേമചന്ദ്രന്‍ സ്വകാര്യബില്‍ അവതരിപ്പിച്ചത്. ഇനി വരുന്ന നറുക്കെടുപ്പുകളിലും പ്രേമചന്ദ്രന്റെ ബില്‍ ഉള്‍പ്പെടുത്തുമെങ്കിലും ചര്‍ച്ചയ്ക്ക് വരാനുള്ള സാധ്യത കുറവാണ്.