വ്യാഴാഴ്ച മുംബൈ കോടതി ബിനോയ് കോടിയേരിക്ക് മുന്‍കൂര്‍ ജാമ്യം അനുവദിക്കാത്ത സാഹചര്യമുണ്ടാവുകയും സെക്രട്ടറി പുത്രനെ അറസ്റ്റ് ചെയ്യുകയും ചെയ്താല്‍ എന്ത് ചെയ്യുമെന്ന പ്രതിസന്ധിയിലാണ് കേരളത്തിലെ സിപിഎമ്മും അതിന്റെ സെക്രട്ടറി കോടിയേരി ബാലകൃഷണനും. അങ്ങനെ സംഭവിച്ചാല്‍ സെക്രട്ടറി സ്ഥാനം രാജിവയ്ക്കാന്‍ തന്നെയാണ് കോടിയേരി തീരുമാനിച്ചിരിക്കുന്നതെന്ന് അറിയുന്നു. 

അതേ സമയം യുവതിയെ സ്വാധീനിച്ച് കേസ് പിന്‍വലിക്കുന്നതിനുള്ള ശ്രമങ്ങള്‍ ബിനോയിയും കോടിയേരിയുടെ കുടുംബവും തുടരുന്നുണ്ട്. സിപിഎമ്മിനെ പ്രതിരോധത്തിലാക്കാന്‍ തങ്ങള്‍ തയാറല്ലെന്ന് യുവതിയുടെ കുടുംബം തങ്ങളെ കാണാനെത്തിയ പ്രാദേശിക സി പി എം നേതാക്കളെ അറിയിച്ചത്രേ. മഹാരാഷ്ട്രയിലെ ഇടത് നേതാക്കളുടെ സഹായത്തോടെ കേസ് ഒതുക്കാനാണ് ബിനോയിയുടെ കുടുംബം ശ്രമിക്കുന്നത്. 

പ്രതീക്ഷിക്കുന്നത് പോലെ കാര്യങ്ങള്‍ നടക്കാതെ വന്നാല്‍ കോടിയേരിയുടെ സ്ഥാനത്ത് ആരെ കൊണ്ടുവരുമെന്ന ചിന്തയും സിപിഎം നേതാക്കള്‍ സജീവമാക്കിയിട്ടുണ്ട്. പി. ജയരാജന്‍ പാര്‍ട്ടി സെക്രട്ടറി സ്ഥാനത്തിന് വേണ്ടി വടംവലിക്ക് തയ്യാറാകുമോ എന്ന ഭയവും പിണറായിക്കുണ്ട്. സംസ്ഥാനത്ത് ഇപ്പോള്‍ സി പി എമ്മിലെ മുതിര്‍ന്ന നേതാവാണ് പി ജയരാജന്‍. എന്നാല്‍ അദ്ദേഹത്തോട് പിണറായി ഉള്‍പ്പെടെയുള്ളവര്‍ക്ക് രസകേടുണ്ട്. ഇക്കാര്യം അറിയാവുന്നതു കൊണ്ട് തന്നെ ജയരാജന്‍ സംസ്ഥാന സെക്രട്ടറി പദവിക്ക് വേണ്ടി അവകാശവാദം ഉന്നയിക്കും. പി ജയരാജനെ മറികടക്കാന്‍ സിപി എം കരുതി വച്ചിരിക്കുന്ന പേരാണ് എം എ ബേബിയുടേത്. എന്നാല്‍ ബേബിയോടും സംസ്ഥാന നേതാക്കള്‍ക്ക് താത്പര്യകുറവുണ്ട്. പക്ഷേ ബേബി പോളിറ്റ് ബ്യൂറോ മെമ്പറായതിനാല്‍ അദ്ദേഹത്തിന് മുന്‍തൂക്കം ലഭിച്ചേക്കും.

മകന്‍ കാരണം മനസുമടുത്ത കോടിയേരി ആകെ ഇച്ഛാഭംഗത്തിലാണ്. കേസുണ്ടായ ശേഷം അദ്ദേഹം നേതാക്കളെയും പ്രവര്‍ത്തകരെയും കാണുന്നില്ല. കോടിയേരിയുടെ മുഖത്ത് സദാസമയവും ഉണ്ടായിരുന്ന പ്രസന്നത ഇല്ലാതായിരിക്കുന്നു. നിരന്തരം പത്ര സമ്മേളനങ്ങള്‍ നടത്തി തന്റെ ഭാഗം വിശദീകരിക്കാന്‍ അദ്ദേഹം ശ്രമിക്കുന്നുണ്ട്. പാര്‍ട്ടി താന്‍ കാരണം പ്രതികൂട്ടിലായെന്ന തോന്നലും കോടിയേരിക്കുണ്ട്. സ്ഥാനം ഒഴിയാന്‍ അദ്ദേഹം സന്നദ്ധനായത് തന്നെ അതുകൊണ്ടാണ്. മുംബൈ യുവതി ചോദിക്കുന്ന പണം നല്‍കാന്‍ തന്റെ കൈയിലില്ലെന്ന് അദ്ദേഹം തുറന്നു പറഞ്ഞു. അങ്ങനെ നല്‍കിയിരുന്നെങ്കില്‍ കേസ് ഉണ്ടാകുമായിരുന്നില്ലെന്നും പറഞ്ഞു. കോടിയേരി പ്രതീക്ഷിച്ച സഹായം ചില കോണുകളില്‍ നിന്നും അദ്ദേഹത്തിന് ലഭിച്ചില്ല. നേരത്തെ ചെക്ക് കേസ് ഉണ്ടായപ്പോള്‍ സഹായിക്കാന്‍ രംഗത്ത് എത്തിയവര്‍ ഇക്കുറി സഹായത്തിനില്ല. പിണറായിയുടെ കടും പിടുത്തം കാരണം കോടിയേരിക്ക് പഴയതു പോലെ ആരെയും സഹായം ലഭിക്കുന്നില്ല . 

ലോക സഭാ തെരഞ്ഞടുപ്പില്‍ തോറ്റമ്പിയ പാര്‍ട്ടിയെ വ്യവസായികള്‍ കൈവിട്ടു എന്നതാണ് ഇതിന് കാരണം. അടുത്ത തെരഞ്ഞടുപ്പില്‍ ഇടതു ഭരണം വരില്ലെന്ന ഉറപ്പിലാണ് വ്യവസായ ലോകം. ഇതും കേസൊതുക്കാനുള്ള കോടിയേരിയുടെ ശ്രമങ്ങള്‍ക്ക് തിരിച്ചടിയായെന്നു വേണം കരുതാന്‍. ഇടത് നേതാക്കളെ കണ്ടാല്‍ മാറി നടക്കുന്ന പ്രവണതയാണ് വ്യവസായികള്‍ കാണിക്കുന്നത്.