തടവുകാര് ഉപ്പിട്ട് മൊബൈല് ജാമര് കേടാക്കി, പുതുതന്ത്രത്തില് ഞെട്ടി പൊലീസ്
ജയിലുകളില് തടവുകാരുടെ മൊബൈല് ഫോണ് ഉപയോഗം തടയാന് ജാമര് സ്ഥാപിക്കുമെന്ന മുഖ്യമന്ത്രിയുടെ പ്രഖ്യാപനം നടപ്പാകണമെങ്കില് ആദ്യം തടവുകാര്ക്ക് ഉപ്പ് കിട്ടാതിരിക്കാന് സംവിധാനം ഉണ്ടാക്കണം. 12 വര്ഷം മുന്പ് കണ്ണൂര് സെന്ട്രല് ജയിലില് സ്ഥാപിച്ച മൊബൈല് ജാമര് തടവുകാര് തകരാറിലാക്കിയത് ഉപ്പു നിറച്ചാണ്. 20 ലക്ഷം രൂപ മുടക്കി സ്ഥാപിച്ച ജാമര് പ്രവര്ത്തിച്ചത് ആറു മാസം മാത്രം.
കണ്ണൂര് സെന്ട്രല് ജയിലില് മൊബൈല് ഫോണ് ഉപയോഗം വ്യാപകമായപ്പോഴാണ് 2007-ല് ജാമര് സ്ഥാപിച്ചത്. ടവറിനു സമീപം സ്ഥാപിച്ച ജാമറിന്റെ കേബിളുകള് വിവിധ ബ്ലോക്കുകള് വഴിയാണ് സ്ഥാപിച്ചത്. ഇതു മുറിക്കാനാണ് ആദ്യം തടവുകാര് ശ്രമിച്ചത്. എന്നാല് കേബിളുകള് വീണ്ടും ഘടിപ്പിച്ചു. ജാമറിന്റെ പ്രധാന യന്ത്രഭാഗങ്ങള് മണ്ണിനടിയിലായിരുന്നു. ഇതു നശിപ്പിച്ചാല് ജാമര് കേടാക്കാന് കഴിയുമെന്നു മനസിലാക്കിയ തടവുകാര് അതിനുള്ള ശ്രമം തുടങ്ങി.
ഉപ്പിട്ടാല് ജാമര് തകരാറിലാക്കാമെന്ന് തടവുകാര്ക്ക് ആരില് നിന്നോ വിദദ്ധോപദേശം ലഭിച്ചു. അതോടെ ഭക്ഷണത്തിനൊപ്പം കിട്ടുന്ന ഉപ്പ് ഓരോരുത്തരായി ശേഖരിച്ചു തുടങ്ങി. ജയില് അടുക്കളയില്നിന്ന് ഉപ്പ് ചെറിയ അളവില് മോഷ്ടിക്കുകയും ചെയ്തു. ദിവസങ്ങളെടുത്താണ് ഉപ്പ് ശേഖരണം പൂര്ത്തിയാക്കിയത്.ഇതിനുശേഷം മണ്ണിനടിയിലെ യന്ത്രഭാഗങ്ങളില് ഉപ്പിട്ട് ഇവ നശിപ്പിക്കുകയായിരുന്നു.
കൂടുതല് സാങ്കേതിക മികവുള്ള ജാമര് സ്ഥാപിച്ചാല് മാത്രമേ തടവുകാരുടെ ഉപ്പുപ്രയോഗത്തില്നിന്നു രക്ഷപ്പെടാനാകൂ. മൂന്നു സെന്ട്രല് ജയിലുകളിലും ആധുനിക രീതിയിലുള്ള ജാമര് സ്ഥാപിക്കണെന്നാവശ്യപ്പെട്ടു ജയില് വകുപ്പ് കെല്ട്രോണിനു കത്തു നല്കിയിട്ടുണ്ട്.
https://www.facebook.com/Malayalivartha
