കണ്ടെയ്‌നര്‍ ലോറിക്ക് പിന്നില്‍ ഒമിനി വാനിടിച്ച് മൂന്ന് കുട്ടികളുള്‍പ്പെടെ അഞ്ചുപേര്‍ക്ക് ദാരുണാന്ത്യം. വാളയാര്‍ വട്ടപ്പാറയ്ക്ക് സമീപം ദേശീയപാതയിലാണ് സംഭവമുണ്ടായത്. ഏഴുപേര്‍ക്ക് പരിക്കേറ്റു. ഒരാളുടെ നില ഗുരുതരമാണ്. കോയമ്പത്തൂര്‍ കരിമ്പ് കടൈ ഭാരതി നഗറില്‍ അബ്ദുള്‍ മജീദിന്റെ ഭാര്യ ഫൈറോജ് ബീഗം (65), ഇവരുടെ ചെറുമകള്‍ അല്‍ഫ ഷില്‍ദ (രണ്ടര), ബന്ധുവായ മൊയ്തീന്‍ അബുവിന്റെ മക്കള്‍ ഷെറിന്‍ (13), മുഹമ്മദ് റയാന്‍ (9), വാന്‍ െ്രെഡവര്‍ കോയമ്പത്തൂര്‍ കുനിയമ്പുത്തൂര്‍ കുറിച്ചിപ്പിരിവ് ഇട്ടോരി ഷംസദ് ഖാനിന്റെ മകന്‍ മുഹമ്മദ് ഷാജഹാന്‍ (30) എന്നിവരാണ് മരിച്ചത്. മൂന്നുപേര്‍ സംഭവ സ്ഥലത്തും ഒരാള്‍ ആശുപത്രിക്ക് കൊണ്ടുപോകും വഴിയും മറ്റൊരാള്‍ ആശുപത്രിയിലുമാണ് മരിച്ചത്.

വാഹനത്തിലുണ്ടായിരുന്ന ഫൈറോജ് ബീഗത്തിന്റെ മകള്‍ ഫരീദ (42), ചെറുമകള്‍ ഇനിയ ഫര്‍ഹത്ത് (12), ബിനാസ് (36), മക്കളായ നിഷ്മ (12), മുഹമ്മദ് റിസ്വാന്‍ (5), ബന്ധുവായ മൊയ്തീന്‍ അബുവിന്റെ ഭാര്യ സാജിത (28), മെഹരാജ് (30) എന്നിവര്‍ക്കാണ് പരിക്കേറ്റത്. ഇവരെ പാലക്കാട് ജില്ലാ ആശുപത്രിയിലെ പ്രാഥമിക ചികിത്സയ്ക്കു ശേഷം കോയമ്പത്തൂരിലെ സ്വകാര്യ സൂപ്പര്‍ സ്‌പെഷ്യാലിറ്റി ആശുപത്രിയിലേക്ക് മാറ്റി.ഇന്നലെ ഉച്ചയ്ക്ക് 1.50 നായിരുന്നു അപകടം.
ഫൈറോജ് ബീഗത്തിന്റെ സഹോദരന്‍ എ.എം. ഷെയ്ഖ് പാലക്കാട് ചന്ദ്രനഗര്‍ ചൈതന്യ കോളനിയിലാണ് താമസിക്കുന്നത്. ഇവരുടെ മരുമകളുടെ പ്രസവത്തിന് മുന്നോടിയായുള്ള ചടങ്ങില്‍ പങ്കെടുക്കാനാണ് സംഘം പാലക്കാട്ടേക്ക് പുറപ്പെട്ടത്. കുട്ടികളുള്‍പ്പെടെ 12 പേരാണ് വാനിലുണ്ടായിരുന്നത്. വാളയാര്‍ വട്ടപ്പാറയ്ക്ക് സമീപം പതിനാലാം കല്ല് ജംഗ്ഷനില്‍ നിറുത്തിയിട്ടിരുന്ന കണ്ടെയ്‌നര്‍ ലോറിക്ക് പിന്നിലേക്ക് വാന്‍ ഇടിച്ചുകയറുകയായിരുന്നു. വാനിന്റെ മുന്‍ഭാഗം പൂര്‍ണമായും തകര്‍ന്നു. ഉടന്‍ ഫയര്‍ഫോഴ്‌സും വാളയാര്‍, കസബ സ്‌റ്റേഷനുകളിലെ പൊലീസും ഹൈവേ പട്രോള്‍ സംഘവും നാട്ടുകാരുടെ സഹായത്തോടെയാണ് രക്ഷാപ്രവര്‍ത്തനം നടത്തിയത്. അപകടവിവരമറിഞ്ഞ് പാലക്കാട്ടെ ബന്ധുക്കള്‍ ജില്ലാ ആശുപത്രിയിലെത്തി.