ജില്ലയിലെ എംപിമാര്‍ക്കൊരുക്കിയ സ്വീകരണത്തില്‍ താരമായത് ആലത്തൂരില്‍ പാട്ടുംപാടി ജയിച്ച പെങ്ങളൂട്ടി രമ്യ ഹരിദാസ്. സ്വാഗതപ്രസംഗം നടക്കുന്‌പോള്‍ വേദിയിലെത്തിയ രമ്യയെ നിറഞ്ഞ കൈയടികളോടെയാണ് പ്രവര്‍ത്തകര്‍ സ്വീകരിച്ചത്. സ്വാഗത പ്രസംഗകന്‍ പേരു പറഞ്ഞപ്പോള്‍ മറ്റ് രണ്ട് എംപിമാരെക്കാളും കൈയടി കിട്ടിയതും രമ്യയ്ക്കായിരുന്നു. 

ഓരോ തവണ രമ്യയുടെ പേര് പരാമര്‍ശിച്ചപ്പോഴും സദസ് കരഘോഷത്താല്‍ മുങ്ങി. ഇന്ത്യന്‍ പാര്‍ലമെന്റിലെ യുവവിസ്മയം എന്നായിരുന്നു രമ്യയെ വി.എം. സുധീരന്‍ വിശേഷിപ്പിച്ചത്. യുഡിഎഫ് സ്ഥാനാര്‍ഥിപ്പട്ടികയിലെ ഏറ്റവും നല്ല ചോയ്‌സ് ആയിരുന്നു രമ്യയെന്നു പലരും തന്നോടു പറഞ്ഞതായുള്ള രമേശ് ചെന്നിത്തലയുടെ വാക്കുകളും പ്രവര്‍ത്തകരെ ആവേശം കൊള്ളിച്ചു. ആലത്തൂരിലെ ചരിത്രവിജയത്തിനു ശേഷം പ്രവര്‍ത്തകര്‍ക്കിടയില്‍ രമ്യയുടെ താരപരിവേഷം ഇരട്ടിച്ചുവെന്നു വ്യക്തമാക്കുന്ന രംഗങ്ങളാണ് ടൗണ്‍ഹാളില്‍ കണ്ടത്.