താരമായി താരരാജാവ്... രാജിവെച്ച നടിമാരെ അംഗത്വ ഫീസ് വാങ്ങാതെ തിരിച്ചെടുക്കണമെന്ന മമ്മൂട്ടിയുടെ ഉറച്ച നിലപാടിന് അംഗീകാരം
താര സംഘടനയോടുള്ള വിയോജിപ്പ് കാരണം രാജി വച്ച നടിമാരുടെ കാര്യത്തില് ഒരു തീരുമാനമായി. അമ്മയുടെ ഇരുപത്തിയഞ്ചാം ജനറല് മോഡിയില് അമ്മയില് നിന്നും രാജിവെച്ച നടിമാരെ തിരിച്ചെടുക്കണമെന്ന നിലപാട് മമ്മൂട്ടിയാണ് സ്വീകരിച്ചത്. അംഗത്വ ഫീസ് ഇല്ലാതെ വേണം തിരിച്ചെടുക്കാനെന്നായിരുന്നു താരം ആവശ്യപ്പെട്ടത്. ഇത് കേട്ട ഉടനെ അംഗങ്ങള് നിറകൈയ്യടികളോടെ അംഗീകരിക്കുകയും ചെയ്തു. രാജി വെച്ച അംഗങ്ങള്ക്ക് 'അമ്മ'യ്ക്ക് അപേക്ഷ എഴുതിത്തന്നാല് മാത്രം തിരിച്ചുവരാമെന്നാണ് സംഘടനയുടെ നിലപാട്. ഈ സാഹചര്യത്തിലാണ് ഫീസ് ഇല്ലാതെ തിരിച്ചെടുക്കണമെന്ന ആവശ്യം മമ്മൂട്ടി പങ്കുവെച്ചത്.
ഇക്കാര്യത്തില് അന്തിമ തീരുമാനം എക്സിക്യൂട്ടീവ് കൈകൊള്ളും. വനിതാ അംഗങ്ങള് ഉയര്ത്തിയ ആവശ്യങ്ങളില് ചര്ച്ചയുണ്ടാകണമെന്നും പ്രശ്നപരിഹാരത്തിന് ശ്രമിക്കണമെന്നും താരം ആവശ്യപ്പെട്ടിട്ടുണ്ട്. വിശദമായ ചര്ച്ചയ്ക്ക് ശേഷമായിരിക്കണം ഭരണഘടനാ ഭേദഗതി നടപ്പാക്കേണ്ടതെന്നും മമ്മൂട്ടി വ്യക്തമാക്കി. മമ്മൂട്ടിയെ കൂടാതെ ജോയ് മാത്യു, ഷമ്മി തിലകന്, ലക്ഷ്മി ഗോപാലസ്വാമി എന്നിവരും ഭരണഘടനാ ഭേദഗതിയില് ഡബ്ല്യുസിസി അംഗങ്ങള് ഉയര്ത്തിയ ആശങ്കകള് പരിഗണിക്കേണ്ടതാണെന്ന അഭിപ്രായം പങ്കുവെച്ചു.
ആക്രമിക്കപ്പെട്ട നടിക്ക് നീതി കിട്ടുന്നില്ലെന്നും പ്രതിക്കൂട്ടില് നില്ക്കുന്ന നടന് ദിലീപിനെ പിന്തുണയ്ക്കുന്ന സാഹചര്യം വന്നതോടെയാണ് നടിക്ക് ഐക്യദാര്ഢ്യം പ്രഖ്യാപിച്ച് മൂന്നു പേര് സംഘടനയില് നിന്നും രാജിവെച്ചത്. ആക്രമിക്കപ്പെട്ട നടിയും രാജിവെച്ചിരുന്നു. റിമാ കല്ലിങ്കല്, ഗീതു മോഹന്ദാസ്, രമ്യാ നമ്ബീശന് എന്നിവരാണ് സംഘടനയില് നിന്ന് രാജി വെച്ച അംഗങ്ങള്. രാജി വെച്ച അംഗങ്ങള്ക്ക് തിരികെ വരാന് നടപടിക്രമങ്ങളുണ്ടെന്നും എന്നാല് അവര് അപേക്ഷ നല്കിയാല് അത് സ്വീകരിക്കുന്നതിന് തടസ്സങ്ങളൊന്നുമില്ലെന്നും യോഗത്തിന് ശേഷം അമ്മ പ്രസിഡന്റ് മോഹന്ലാല് പറഞ്ഞു.
അതേസമയം ഡബ്ല്യൂസിസിയുടെ കടുത്ത എതിര്പ്പുകളെ മറികടന്ന് താരസംഘടനയായ അമ്മയുടെ ഭരണഘടനാ ഭേദഗതി പാസായി. കരട് ഭേദഗതി കൊണ്ടുവന്ന സംഘടനയുടെ എക്സിക്യൂട്ടീവ് കമ്മിറ്റിക്കെതിരെ വിമണ് ഇന് സിനിമ കളക്ടീവ് അംഗങ്ങള് തുറന്നടിച്ചു. കരട് ഭേദഗതി ജനാധിപത്യവിരുദ്ധവും യുക്തിരഹിതവുമാണെന്നും ഡബ്ല്യൂസിസി ആരോപിച്ചു.
വനിതാ പ്രാതിനിധ്യം കൂട്ടാനെന്ന പേരിലാണ് താരസംഘടന ഭരണഘടനാ ഭേദഗതി കൊണ്ടുവന്നത്. കരട് തയാറാക്കിയത് എക്സിക്യൂട്ടീവ് കമ്മിറ്റിയുടെ ആഗ്രവും താല്പര്യവും മാത്രം അനുസരിച്ചാണെന്ന് രേഖാമൂലം നല്കിയ മറുപടിയില് ഡബ്ല്യൂസിസി അംഗങ്ങള് വ്യക്തമാക്കിയിരുന്നു. കൊച്ചിയില് നടി ആക്രമിക്കപ്പെട്ട സംഭവത്തിനു പിന്നാലെയാണ് ഇത്തരമൊരു ഭേദഗതി കൊണ്ടുവരാനുള്ള ചര്ച്ചകള്ക്ക് താരസംഘടന തുടക്കമിടുന്നത്.
എന്നാല് ഇത്തരം സംഭവങ്ങള് ആവര്ത്തിക്കാതിരിക്കാനുള്ള നടപടികള് കരട് ഭേദഗതിയില് ഇല്ലെന്ന് ഡബ്ല്യൂസിസി ആരോപിക്കുന്നു. വനിതാ പ്രാതിനിധ്യം ഉറപ്പാക്കണമെന്നും തൊഴില് സുരക്ഷ ഉറപ്പാക്കും വിധം ഭേദഗതി പുനര്നിര്മ്മിക്കണമെന്നും ഇതിനായി കൂടുതല് ചര്ച്ച ജനറല് ബോഡിയില് വേണമെന്നുമാണ് ഡബ്ല്യൂസിസി ആവശ്യപ്പെടുന്നത്. സംഘടനയുടെ വൈസ് പ്രസിഡന്റ് സ്ഥാനം അടക്കം കുറഞ്ഞത് അഞ്ച് സ്ഥാനങ്ങള് വനിതകള്ക്കായി നീക്കി വെക്കുന്നതാണ് ഇന്ന് യോഗം പാസ്സാക്കിയ പ്രധാന ഭേദഗതി.
രാജി വച്ചു പോയവരെ തിരിച്ചെടുക്കുന്നത് സംബന്ധിച്ച ഉപാധികളിലടക്കം ഡബ്ല്യുസിസി അംഗങ്ങള് കൂടിയായ പാര്വതി, രേവതി എന്നിവര് ശക്തമായ എതിര്!പ്പ് രേഖപ്പെടുത്തി.
അംഗങ്ങളെ തിരികെ എടുക്കണമെങ്കില് അവര് കത്ത് നല്കണം എന്ന നിലപാടില് തന്നെയാണ് ഇപ്പോഴും സംഘടന. 'അമ്മ'യ്ക്ക് എതിരായി നിലപാട് എടുക്കുന്നവരെ സംഘടനയില് നിന്ന് പുറത്താക്കും എന്ന തരത്തിലുള്ള നിയമങ്ങളോടും കടുത്ത വിയോജിപ്പാണ് വിമന് ഇന് സിനിമ കളക്ടീവിനുള്ളത്. ഡബ്ല്യൂസിസി അംഗങ്ങളായ രേവതിയും പാര്വതിയും മടങ്ങിയതിനു ശേഷമാണ് ഭരണഘടനാ ഭേദഗതി അംഗങ്ങള് കയ്യടിച്ച് പാസാക്കിയത്. നിലവിലെ ഭാരവാഹികള്ക്ക് ഒരു വര്ഷം കൂടെ കാലാവധി ബാക്കിയുള്ളതിനാല് ഈ വര്ഷം തിരഞ്ഞെടുപ്പ് നടക്കില്ല.
https://www.facebook.com/Malayalivartha
