കേരളത്തിലെ യുവാക്കളുടെ പോക്ക് എങ്ങോട്ടാണെന്നറിയില്ല. ശാസ്താം കോട്ടയില്‍ പ്രണയം നിരസിച്ചതിന് പ്രായ പൂര്‍ത്തിയാകാത്ത പെണ്‍കുട്ടിയെ യുവാവ് കുത്തിപ്പരിക്കേല്‍പ്പിച്ചു. പെണ്‍കുട്ടിയെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു. പെണ്‍കുട്ടിയുടെ ആരോഗ്യനില ഗുരുതരമായി തുടരുകയാണെന്നാണ് റിപ്പോര്‍ട്ട്. സ്വകാര്യ ബസ് ജീവനക്കാരനായ അനന്തുവാണ് കൃത്യം നടത്തിയതെന്നാണ് വിവരം.

പുലര്‍ച്ചെ രണ്ടുമണിയോടുകൂടി പെണ്‍കുട്ടിയുടെ വീടിന്റെ ഓടിളക്കി അകത്തുകടന്ന അനന്തു കുട്ടിയെ സ്‌ക്രൂ ഡ്രൈവര്‍ ഉപയോഗിച്ച് കുത്തിപ്പരിക്കേല്‍പ്പിക്കുകയായിരുന്നു. മൂന്ന് തവണ പെണ്‍കുട്ടിക്ക് കുത്തേറ്റുവെന്നാണ് വിവരം. പെണ്‍കുട്ടിയുടെ നിലവിളി കേട്ട് വീട്ടുകാര്‍ എത്തിയപ്പോഴേക്കും അനന്തു ഓടി രക്ഷപ്പെട്ടു.

ആദ്യം ശാസ്താംകോട്ട താലൂക്ക് ആശുപത്രിയില്‍ എത്തിച്ച പെണ്‍കുട്ടിയെ പരിക്ക് ഗുരുതരമായതിനെ തുടര്‍ന്ന് തിരുവനന്തപുരം മെഡിക്കല്‍ കോളേജിലേക്ക് റഫര്‍ ചെയ്യുകയായിരുന്നു. നേരത്തേ മുതല്‍ പെണ്‍കുട്ടിയെ അനന്തു ശല്യം ചെയ്തിരുന്നുവെന്നാണ് ബന്ധുക്കള്‍ പറയുന്നത്. പ്രണയാഭ്യര്‍ഥന നടത്തിയെങ്കിലും പെണ്‍കുട്ടി അത് നിരസിച്ചു. ഇതേതുടര്‍ന്നാണ് അനന്തു അക്രമം നടത്തിയതെന്നാണ് വിവരം.

ഈ മാസം തന്നെ നിരവധി സമാന സംഭവങ്ങളാണുണ്ടായത്. അതേസമയം പ്രണയ പകയ്‌ക്കെതിരെ ചര്‍ച്ചകളും നടക്കുന്നുണ്ട്. സ്‌നേഹത്തിന് പല അര്‍ഥങ്ങളുണ്ട്, തലങ്ങളുണ്ട്. പങ്കാളികള്‍ തമ്മിലുള്ള സ്‌നേഹം, കുട്ടികള്‍ക്കും മാതാപിതാക്കള്‍ക്കും ഇടയിലുള്ള സ്‌നേഹം, കൂട്ടുകാര്‍ക്കിടയിലെ ഇഷ്ടം. സ്‌നേഹബന്ധങ്ങളില്‍ പരസ്പരം വേദനിപ്പിക്കാന്‍ കഴിയുമോ? യഥാര്‍ഥ സ്‌നേഹമാണെങ്കില്‍ വേദനിപ്പിക്കാന്‍ കഴിയില്ലെന്നാണ് എല്ലാരും പറയാറ്. എന്നാല്‍ അടുത്തിടെ ചില വാര്‍ത്തകള്‍ കേള്‍ക്കുമ്പോള്‍ ഈ തത്വത്തിന് അടിസ്ഥാനമായില്ലെന്നു തോന്നും. പ്രേമം നിരസിച്ചതിനു പെണ്ണിന്റെ മുഖത്ത് ആസിഡ് ഒഴിക്കുക, കുത്തിക്കൊല്ലുക, തീ കൊളുത്തുക തുടങ്ങി അനേകം സംഭവങ്ങള്‍. ഇതില്‍ അടുത്തിടെ കോട്ടയത്തു നടന്ന സംഭവം കേരളത്തെ ഞെട്ടിച്ചു. പെണ്‍കുട്ടിയുടെ ദേഹത്ത് പെട്രോള്‍ ഒഴിക്കുകയും തുടര്‍ന്നു സ്വന്തം ദേഹത്തും ഒഴിച്ച് തീ കൊളുത്തിയുള്ള ആത്മാഹൂതി. പ്രണയത്തിനു ഇത്രയും ക്രൂരമാകാന്‍ കഴിയുമോ? പങ്കാളിയെ കൊല്ലാന്‍ പാകത്തിനു മനസ്സ് എവിടെക്കാണ് പോകുന്നത്? ഉത്തരം കിട്ടാത്ത ചോദ്യങ്ങളിലേക്കാണ് പോകുന്നത്.