വിഴിഞ്ഞം കടൽ പുറത്തു നെത്തോലിയുടെ ചാകര. ടണ്‍ കണക്കിന് നെത്തോലി മീനിനെയാണ്കടലിൽ നിന്നും പിടിച്ചത്. ആദ്യം നെത്തോലിയുമായി കടൽ തീരത്തു എത്തിയ മൽസ്യ ബന്ധന തൊഴിലാളികൾക്ക് ഒരു കുട്ടക്കു 1000 രൂപ വരെ ലഭിച്ചു. എന്നാൽ നെത്തോലി സുലഭമായി കിട്ടുന്നതിനാൽ പിന്നാലെ കൊണ്ട് വന്നവരുടെ മീനിന് വില കുറഞ്ഞു. ആദ്യം 1000 രൂപയ്ക്കു വിറ്റ നെത്തോലിയെ ഒടുവിൽ 300 രൂപയ്ക്കാണ് വിറ്റത്.

നെത്തോലിയുടെ ചാകര വന്നതോടെ കൂടുതൽ മൽസ്യത്തൊഴിലാളികൾ കടലിലേക്ക് തിരിച്ചു. ഇതോടെയാണ് വില ഇടിഞ്ഞത്. മത്സ്യത്തൊഴിലാളികൾ നൽകുന്ന ഏകദേശ കണക്കനുസരിച്ചു 30 ടണ്ണോളം മീന്‍ ലഭിച്ചുവെന്നാണ് കരുതുന്നത്. മീൻ ലഭിക്കേണ്ട കാലമായിട്ടു പോലും കിട്ടാത്ത അവസ്ഥയായിരുന്നു. എന്നാൽ ചാകര വന്നതോടെ സ്ഥിതി മാറി. 5000 മുതല്‍ 6000 രൂപ വരെയായിരുന്നു കഴിഞ്ഞ ആഴ്ച മീനിന് ഈടാക്കിയിരുന്നത്. എന്നാൽ ചാകര വന്നതോടെ 300ൽ എത്തി നിൽക്കുന്നു വില.