സിപിഎം കേരളത്തില്‍ തകര്‍ന്നടിയുമെങ്കിലും ആറ്റിങ്ങലില്‍ ഡോ. എ. സമ്പത്ത് വലിയ ഭൂരിപക്ഷത്തോടെ ജയിച്ചു കയറുമെന്നാണ് എല്ലാ തെരഞ്ഞെടുപ്പ് സര്‍വേകളിലും വന്നത്. ആരും ബിജെപിയുടെ ശോഭ സുരേന്ദ്രനെ അത്ര ഗൗനിച്ചില്ല. എന്നാല്‍ രണ്ടര ലക്ഷത്തോളം വോട്ടാണ് ശോഭ സുരേന്ദ്രന്‍ നേടിയത്. അതോടെ സമ്പത്ത് വീണുടയുകയും അടൂര്‍ പ്രകാശ് ജയിക്കുകയും ചെയ്തു. ഒട്ടും പ്രതീക്ഷിക്കാത്ത ഈ സംഭവം സിപിഎമ്മിനെ അക്ഷരാര്‍ത്ഥത്തില്‍ ഞെട്ടിച്ചു. 

ലോക്‌സഭാ മണ്ഡലത്തിലെ സര്‍വീസ് വോട്ടര്‍മാരില്‍ ബിജെപിക്കു മുന്‍തൂക്കം കിട്ടിയതിനെതിരെ സിപിഎം നേതൃത്വത്തിന്റെ വിമര്‍ശനം. ആറ്റിങ്ങലില്‍ പാര്‍ട്ടിക്കുണ്ടായ ചോര്‍ച്ച ഭയാനകമാണെന്നും നേതൃത്വം ചൂണ്ടിക്കാട്ടി.

ലോക്‌സഭാ തിരഞ്ഞെടുപ്പു വിലയിരുത്തിയ കേന്ദ്ര സംസ്ഥാന കമ്മിറ്റികളുടെ റിപ്പോര്‍ട്ടുകളെകുറിച്ചുള്ള മേഖലാതല വിശദീകരണ യോഗത്തിലാണ് ഇതു ചൂണ്ടിക്കാട്ടിയത്. പൊളിറ്റ് ബ്യൂറോ അംഗം എസ് രാമചന്ദ്രന്‍ പിള്ളയും സംസ്ഥാന സെക്രട്ടറി കോടിയേരി ബാലകൃഷ്ണനും നേതൃത്വം നല്‍കി
സംസ്ഥാനത്താകെ വോട്ടെടുപ്പിനുശേഷം പാര്‍ട്ടി കണക്കു കൂട്ടിയതിനെക്കാള്‍ 17 ലക്ഷം വോട്ടാണു ഫലം വന്നപ്പോള്‍ കുറഞ്ഞതന്നു നേതാക്കള്‍ സമ്മതിച്ചു. 20 മണ്ഡലങ്ങളിലും 2014 നെ അപേക്ഷിച്ചു വോട്ടു കുറഞ്ഞു. പാര്‍ട്ടിയുടെ കണക്കുകള്‍ പാടെ പാളി. 

ജനവികാരം മനസ്സിലാക്കുന്നതില്‍ പരാജയപ്പെട്ടു. പെരുപ്പിച്ച കണക്കുകള്‍ നല്‍കരുതെന്നു പലതവണ വ്യക്തമാക്കിയിട്ടും വിവിധ ഘടകങ്ങള്‍ ശ്രദ്ധിച്ചില്ല. സര്‍വീസ് സംഘടനാരംഗത്തു കാര്യമായ ശക്തിയില്ലാത്ത ബിജെപിക്കു ആറ്റിങ്ങലില്‍ മുന്നേറാനായത് അമ്പരപ്പിച്ചതായി നേതാക്കള്‍ ചൂണ്ടിക്കാട്ടി.

അക്രമ രാഷ്ട്രീയം ആരോപിച്ച് എതിരാളികള്‍ നടത്തിയ പ്രചാരണവും ശബരിമലയുടെ കാര്യത്തിലുണ്ടായ തെറ്റിദ്ധാരണകളും ഫലത്തെ കാര്യമായി സ്വാധീനിച്ചു. ആലപ്പുഴയില്‍ ജയിച്ചെങ്കിലും വോട്ട് നിലയില്‍ കുറവാണുണ്ടായത്. വനിതാ മതിലിനു ശേഷം രണ്ടു യുവതികള്‍ ശബരിമലയില്‍ പ്രവേശിച്ചതിനെ എതിരാളികള്‍ ഉപയോഗപ്പെടുത്തി.
തെക്കന്‍ ജില്ലകളില്‍ നിന്നുള്ള ജില്ല ഏരിയാ കമ്മിറ്റി അംഗങ്ങള്‍, ലോക്കല്‍ സെക്രട്ടറിമാര്‍ എന്നിവരാണ് റിപ്പോര്‍ട്ടിങ്ങില്‍ പങ്കെടുത്തത്. വിശദ റിപ്പോര്‍ട്ട് കീഴ്ഘടകങ്ങള്‍ക്കു കത്തായി നല്‍കും. 

ഈ മാസം 22 മുതല്‍ 28 വരെ സംസ്ഥാന നേതാക്കളും ജനപ്രതിനിധികളുമടക്കമുള്ളവര്‍ വീടുകള്‍ സന്ദര്‍ശിച്ചു പാര്‍ട്ടി നിലപാടുകള്‍ വിശദീകരിക്കും. ഓഗസ്റ്റില്‍ ലോക്കല്‍ അടിസ്ഥാനത്തില്‍ പാര്‍ട്ടി കുടംബ യോഗങ്ങള്‍ വിളിച്ച് അകല്‍ച്ച മാറ്റിയെടുക്കാനുള്ള ശ്രമം നടത്തും.

അതേസമയം എം.എല്‍.എയായിരുന്ന അടൂര്‍ പ്രകാശ് ആറ്റിങ്ങല്‍ എം.പിയായതിനെ തുടര്‍ന്ന് നടക്കാന്‍ പോകുന്ന കോന്നി നിയമസഭ മണ്ഡലം ഉപതെരഞ്ഞെടുപ്പിലെ സ്ഥാനാര്‍ത്ഥികളെ കുറിച്ചുള്ള ചര്‍ച്ചകള്‍ പാര്‍ട്ടികളില്‍ സജീവമായിരിക്കുകയാണ്. പാര്‍ട്ടി കമ്മറ്റികളില്‍ സ്ഥാനാര്‍ത്ഥികളെ തീരുമാനിക്കാനുള്ള ചര്‍ച്ചകള്‍ നടക്കുകയാണ്.

ബി.ജെ.പി സംസ്ഥാന ജനറല്‍ സെക്രട്ടറി ശോഭാ സുരേന്ദ്രനെ രംഗത്തിറക്കാനാണ് എന്‍.ഡി.എ ശ്രമിക്കുന്നത്. ബി.ജെ.പി സംസ്ഥാന നേതൃത്വം ശോഭാ സുരേന്ദ്രനോട് കോന്നിയില്‍ കേന്ദ്രീകരിക്കാന്‍ ആവശ്യപ്പെട്ടതായാണ് റിപ്പോര്‍ട്ടുകള്‍. മറ്റൊരു ജനറല്‍ സെക്രട്ടറിയായ എ.എന്‍ രാധാകൃഷ്ണനാണ് കോന്നിയിലെ തെരഞ്ഞെടുപ്പ് ചുമതല ബി.ജെ.പി നല്‍കിയിരിക്കുന്നത്. കോന്നിയില്‍ ജയിച്ച് പോയ സ്ഥാനാര്‍ത്ഥിക്ക് വേണ്ടി ആറ്റിങ്ങലില്‍ തോറ്റെങ്കിലും രണ്ടര ലക്ഷം വോട്ട് നേടിയ ശോഭ സുരേന്ദ്രന്‍ കോന്നിയിലെത്തുമ്പോള്‍ തകര്‍ക്കും. ശബരിമല ആഞ്ഞടിക്കുന്ന കോന്നിയില്‍ ശോഭ സുരേന്ദ്രന്‍ ജയിക്കുമെന്നുള്ള റിപ്പോര്‍ട്ടുകള്‍ സിപിഎമ്മിനേയും ആശങ്കയിലാഴ്ത്തുന്നുണ്ട്.