മലയാള ചെറുകഥ കൃത്തും സാഹിത്യ അക്കാദമി അവാര്‍ഡ് ജേതാവുമായ തോമസ് ജോസഫ് പത്തുമാസമായി മസ്തിഷ്‌കാഘാതത്തെ തുടര്‍ന്ന് അബോധാവസ്ഥയിലാണ്. അദ്ദേഹത്തെ സഹായിക്കണം എന്ന ആവശ്യവുമായി എഴുത്തുക്കാരൻ ബെന്യാമിൻ രംഗത്ത് വന്നിരിക്കുകയാണ്. ഫേസ്ബുക്ക് പേജിലൂടെയാണ് അദ്ദേഹം തോമസ് ജോസെഫിന്റെ ഇപ്പോഴത്തെ ദയനീയാവസ്ഥ പറഞ്ഞത്.

ചികിൽസയ്ക്കു ഒരുപാടു പണം ചിലവാകുന്നു. എന്നാൽ അത് താങ്ങാനുള്ള സ്ഥിതി അദ്ദേഹത്തിൻറെ കുടുംബത്തിന് ഇപ്പോൾ ഇല്ല. അതിനാൽ അദ്ദേഹത്തെ സഹായിക്കാൻ അഭ്യർത്ഥിച്ചിരിക്കുകയാണ്.തോമസ് ജോസെഫിന്റെ ഭാര്യക്ക് ഉണ്ടായിരുന്ന ജോലി നഷ്ടമായി. മകന്‍ ജെസ്സെയുടെ ചെറിയ വരുമാനമാണ് അവരുടെ ഏക ആശ്രയം. സുമനസുകളുടെ സഹായ ഹസ്തത്തിനായ് കാത്തിരിക്കുകയാണിവർ. ഉള്ള വീട് വിൽക്കേണ്ടുന്ന അവസ്ഥയിലാണ് അവർ എത്തിയിരിക്കുന്നതെന്നും ബെന്യാമിൻ തന്റെ ഫേസ് ബുക് പോസ്റ്റിലൂടെ വ്യക്തമാക്കി.

ഫേസ് ബുക്ക് പോസ്റ്റിന്റെ പൂർണ രൂപം ഇങ്ങനെ ;

അഭ്യര്‍ത്ഥന, മലയാള ചെറുകഥയ്ക്ക് ഉജ്ജ്വല സംഭാവനകള്‍ നല്‍കിയിട്ടുള്ള എഴുത്തുകാരനും സാഹിത്യ അക്കാദമി അവാര്‍ഡ് ജേതാവുമായ തോമസ് ജോസഫ് മസ്തിഷ്‌കാഘാതത്തെ തുടര്‍ന്ന് അബോധാവസ്ഥയില്‍ ആയിട്ട് പത്തുമാസം പിന്നിടുന്നു. അഞ്ചു മാസത്തോളം ആശുപത്രിയില്‍ ആയിരുന്നു. ഇപ്പോള്‍ സ്വന്തം വീട്ടില്‍, കഴുത്തിലും വയറ്റിലും ട്യൂബുകള്‍ ഘടിപ്പിച്ച നിലയിലാണ്. അദ്ദേഹത്തിന്റെ ഭാര്യയുടെ ജോലി ദീര്‍ഘകാലത്തെ അവധി കാരണം നഷ്ടപ്പെട്ടു. മകന്‍ ജെസ്സെയുടെ ചെറിയ വരുമാനം കൊണ്ടാണ് ചെലവുകള്‍ കഴിയുന്നത്.

ലോണടച്ചു തീരാത്ത ഒരു വീട് മാത്രമാണ് ഇവരുടെ സമ്ബാദ്യം. ആശുപത്രി ചികിത്സയ്ക്ക് വേണ്ടി വന്ന ഭീമമായ തുക സുഹൃത്തുക്കളുടെയും അഭ്യൂദയകാംക്ഷികളുടെയും സഹായത്തോടെയാണ് സമാഹരിച്ചത്. ഒരു നേഴ്‌സിന്റെ വിദഗ്ധപരിചരണം ഉള്‍പ്പെട്ടെ, അനശ്ചിതവും വമ്ബിച്ചതുമായ ഒരു തുടര്‍ച്ചെലവിനെയാണ് തോമസിന്റെ കുടുംബം ഇപ്പോള്‍ അഭിമുഖീകരിക്കുന്നത്. ആകെയുള്ള വീട് വില്‍ക്കുകയല്ലാതെ മറ്റൊരു മാര്‍ഗ്ഗവും അവര്‍ക്കില്ല.

മലയാള കഥയില്‍ പ്രതിഭയുടെ പാദമുദ്ര പതിപ്പിച്ച ഒരെഴുത്തുകാരന്റെ പ്രതിസന്ധിയില്‍ വായനക്കാരോടും സഹൃദയരോടും സഹായാഭ്യര്‍ത്ഥന നടത്താന്‍ സുഹൃത്തുക്കളായ ഞങ്ങള്‍ വീണ്ടും നിര്‍ബന്ധിതരവുകയാണ്. തോമസ് ജോസഫിനെ സഹായിക്കാന്‍ ആഗ്രഹമുള്ളവര്‍ക്ക് അദ്ദേഹത്തിന്റെ മകന്‍ ജെസ്സെയുടെ ബാങ്ക് അക്കൌണ്ടിലേക്ക് പണം അയയ്ക്കാവുന്നതാണ്.

സേതു, മുകുന്ദന്‍, സക്കറിയ, എന്‍.എസ്. മാധവന്‍, ബെന്യാമിന്‍, കെ.ആര്‍. മീര, റഫീഖ് അഹമ്മദ്, മധുപാല്‍, പി.എഫ്. മാത്യൂസ്, ആര്‍. ഉണ്ണി, സി.കെ ഹസ്സന്‍കോയ

Jesse, A/C no. 2921101008349
IFSCCNRB0005653, Canara Bank, Chunangamveli branch, Aluva