അങ്കലാപ്പോടെ സിപിഎം... ശബരിമല പ്രതിഷേധ ഹര്ത്താലിന്റെ പേരില് കേസെടുത്തത് 32,720 പേര്ക്കെതിരെ; ഒക്ടോബര് വരെ അറസ്റ്റ് ചെയ്തത് 529 കേസിലായി 3505 പേരെ; തെരഞ്ഞെടുപ്പ് പരാജയത്തോടെ എല്ലാം മറക്കാന് ശ്രമിക്കവേ അന്വേഷണത്തിന് ഉത്തരവിട്ട് മനുഷ്യാവകാശ കമ്മീഷന്
ശബരമില വിഷയം ഒരിക്കല് കൂടി ചര്ച്ചയാകുകയാണ്. ലോക്സഭാ തെരഞ്ഞെടുപ്പ് പരാജയത്തിന്റെ കാരണമന്വേഷിച്ച സിപിഎം കണ്ടെത്തിയത് ഭക്തര് അകന്നതാണെന്നാണ്. അതിനാല് തന്നെ അകന്ന ഭക്തരെ വീട്ടില് പോയി കണ്ട് അടുപ്പിക്കണമെന്ന് പാര്ട്ടി തീരുമാനിച്ചു കഴിഞ്ഞു. ശബരിമല പ്രക്ഷോഭ കാലത്ത് പതിനായിരക്കണക്കിന് ആള്ക്കാര്ക്കെതിരായാണ് കേസെടുത്തത്. അതില് ബഹുഭൂരിപക്ഷവും കള്ളക്കേസാണെന്ന് ബിജെപിയും ശബരിമല കര്മ്മ സമിതിയും ആരോപിച്ചിരുന്നു. അതിനിടെ കഴിഞ്ഞ ദിവസം മനുഷ്യാവകാശ കമ്മീഷന്റെ ഉത്തരവ് സിപിഎമ്മിന് തലവേദനയായി .
ശബരിമല വിഷയത്തില് നടത്തിയ ഹര്ത്താലുമായി ബന്ധപ്പെട്ട് അച്ഛനോടുള്ള ശത്രുത തീര്ക്കാന് മകനെ കള്ളക്കേസില് കുരുക്കിയെന്ന ആരോപണം ജില്ലാ പോലീസ് സൂപ്രണ്ട് (കൊല്ലം റൂറല്) നിയമപരമായ വിധത്തില് അനേ്വഷിക്കണമെന്നാണ് സംസ്ഥാന മനുഷ്യാവകാശ കമ്മീഷന് ഉത്തരവിട്ടത്. ശാസ്താംകോട്ട ആലയില് കിഴക്കേതില് മണികണ്ഠന് നല്കിയ പരാതിയിലാണ് കമ്മീഷന് അംഗം ഡോ. കെ. മോഹന്കുമാറിന്റെ നിര്ദ്ദേശം. ശാസ്താംകോട്ട സര്ക്കിള് ഇന്സ്പെക്ടര് പ്രശാന്തിനെതിരെയാണ് പരാതി.
പരാതിക്കാരന്റെ മകനെതിരെ ക്രൈം 10/19, 11/19 നമ്പറുകളിലായി കേസുകള് രജിസ്റ്റര് ചെയ്തിട്ടുണ്ടെന്ന് ശാസ്താംകോട്ട സി ഐ അറിയിച്ചു. പരാതിക്കാരന്റെ മകന് കോടതിയില് നിന്നും ജാമ്യം ലഭിച്ചില്ല. താന് അനുകൂല റിപ്പോര്ട്ട് നല്കാത്തതിനാലാണ് ജാമ്യം ലഭിക്കാത്തതെന്ന് മനസിലാക്കിയാണ് പരാതിക്കാരന് കമ്മീഷനില് പരാതി നല്കിയതെന്ന് സി ഐ ആരോപിച്ചു. പരാതിക്കാരന് നിരവധി കേസുകളില് പ്രതിസ്ഥാനത്തുണ്ടെന്നും റിപ്പോര്ട്ടില് പറയുന്നു. എന്നാല് ശാസ്താംകോട്ട സ്റ്റേഷനിലെ മുന് സര്ക്കിള് ഇന്സ്പെക്ടറുടെ പ്രേരണയിലാണ് സി ഐ തനിക്കെതിരെ അനാവശ്യമായ കേസുകള് എടുത്തതെന്ന് പരാതിക്കാരന് പറഞ്ഞു.
തനിക്കും മകനും പോലീസ് സംരക്ഷണം നല്കണമെന്ന ഹൈക്കോടതി ഉത്തരവ് പോലും സി ഐ അംഗീകരിച്ചില്ല. കോടതി ഉത്തരവ് ലഭിച്ചിട്ടും സംരക്ഷണം നല്കിയില്ലെന്ന ആരോപണം ജില്ലാ പോലീസ് മേധാവി വസ്തുനിഷ്ഠമായി നിരോധിക്കണമെന്ന് കമ്മീഷന് ആവശ്യപ്പെട്ടു. പക്ഷപാതപരമായ അനേ്വഷണം പോലീസ് നടത്തിയെങ്കില് അക്കാര്യം തെളിയിക്കാനുള്ള രേഖകള് പരാതിക്കാരന് ജില്ലാ പോലീസ് മേധാവിക്ക് നല്കണമെന്നും ഉത്തരവില് പറയുന്നു.
അതേസമയം ശബരിമലയില് രണ്ട് യുവതികള് ദര്ശനം നടത്തിയതില് പ്രതിഷേധിച്ച് ശബരിമല കര്മസമിതി ബിജെപി പിന്തുണയോടെ നടത്തിയ ഹര്ത്താലിനെ തുടര്ന്ന് 1320 പേരെ അറസ്റ്റു ചെയ്തിരുന്നു. മുന്കരുതല് കസ്റ്റഡി എന്നനിലയില് 843 പേരെയും കസ്റ്റഡിയില് എടുത്തിരുന്നു. വിവിധയിടങ്ങളില് നടന്ന 990 അക്രമ സംഭവങ്ങളിലായി 32720 പേര്ക്കെതിരെ കേസെടുത്തു.
അതേസമയം പ്രക്ഷോഭം നടന്ന ഒക്ടോബറില് 529 കേസിലായി 3505 പേരെ അറസ്റ്റ് ചെയ്തതായി സംസ്ഥാന പൊലീസ് തന്നെ അറിയിച്ചിരുന്നു. നിലയ്ക്കല് സംഘര്ഷത്തിലും ഹര്ത്താല് അക്രമങ്ങളിലും പ്രതികളായവരുടെ വാഹനങ്ങളും പിടിച്ചെടുത്തിരുന്നു. വിവിധ സംഘര്ഷങ്ങളുടെ പേരില് കണ്ടാലറിയാവുന്ന 4000 പേര്ക്കെതിരെയായിരുന്നു ആദ്യം കേസെടുത്തത്. ഗതാഗതം തടസ്സപ്പെടുത്തി നാമജപ ഘോഷയാത്രയില് പങ്കാളിയായ സ്ത്രീകള്ക്കെതിരെയടക്കം കേസ് എടുത്തെങ്കിലും സര്ക്കാര് നിര്ദേശപ്രകാരം അവരുടെ അറസ്റ്റ് ഒഴിവാക്കാന് ഡിജിപി നിര്ദേശിച്ചിരുന്നു. പിടികിട്ടാനുള്ളവരുടെ ചിത്രങ്ങള് വിമാനത്താവളം അധികൃതര്ക്ക് അയച്ചു കൊടുത്തിത്തിരുന്നു. എന്നാല് തെരഞ്ഞെടുപ്പോടെ എല്ലാം സമാധാനത്തിലേക്ക് പോയി. തെരഞ്ഞെടുപ്പിന് ശേഷം ശബരിമല കേള്ക്കാനേയില്ല. അതിനിടയ്ക്കാണ് മനുഷ്യാവകാശ കമ്മീഷന്റെ ഉത്തരവ്.
"
https://www.facebook.com/Malayalivartha
