ചെറുതോണി അണക്കെട്ടിനു സമീപമുള്ള ടിക്കറ്റ് കൗണ്ടറിനു സമീപം പാറ അടര്‍ന്നുവീണു. സന്ദര്‍ശകരില്ലാത്ത ദിവസമായതിനാല്‍ ആളപായം ഉണ്ടായില്ല.ഇടുക്കി, ചെറുതോണി അണക്കെട്ടുകളുടെ സമീപ പ്രദേശങ്ങളില്‍ പാറ അടര്‍ന്നു വീഴുന്നത് തുടര്‍ക്കഥയാകുമ്പോഴും അധികൃതര്‍ക്ക് കുലുക്കമില്ല. ഇതിന് മുന്‍പ് 2014 ഓഗസ്റ്റ് 4-നാണ് ഇവിടെ പാറ അടര്‍ന്നു വീണത്. അന്നും ഡാമിലേക്കുള്ള റോഡിലാണ് പാറകള്‍ വന്നു വീണത്. 2010 സെപ്റ്റംബര്‍ 18-ന് ഡാം ടോപ്പില്‍ കുറത്തിമലയില്‍ നിന്നും കൂറ്റന്‍ പാറ അടര്‍ന്നു വീണിരുന്നു.

സമീപത്തെ കൃഷിയിടങ്ങളിലേക്ക് പതിച്ച പാറക്കഷണങ്ങള്‍ മൂലം നിരവധി പേരുടെ കൃഷിയിടങ്ങള്‍ നശിച്ചു. കൂറ്റന്‍ പാറ മലയുടെ വശങ്ങളില്‍ തട്ടി ചിതറിയാണ് താഴേക്ക് പതിച്ചത്. കുറത്തിമലയുടെ മുകള്‍ഭാഗത്ത് ഇളകിത്തുടങ്ങിയ പാറകള്‍ ധാരാളമുണ്ട് എന്ന് അന്ന് അന്വേഷണത്തിന് എത്തിയ വൈദ്യുതി ബോര്‍ഡിലെ സുരക്ഷാ വിഭാഗം കണ്ടെത്തിയിരുന്നു. മലയുടെ അടിവാരത്ത് നൂറോളം വീട്ടുകാര്‍ താമസിക്കുന്നുണ്ട്. 2004-ല്‍ രണ്ടു തവണ പാറ അടര്‍ന്നു വീണതു മൂലം നാല് വീട്ടുകാരെ റവന്യു അധികൃതര്‍ മാറ്റി പാര്‍പ്പിച്ചിരുന്നു.

നിരന്തരം ഉണ്ടാകുന്ന മലയിടിച്ചിലിനെ കുറിച്ച് വിദഗ്ധ പഠനം നടത്തണമെന്ന് വൈദ്യുതി ബോര്‍ഡ് അന്ന് ശുപാര്‍ശ ചെയ്തിരുന്നു. ഡാമിന്റെ 10 കിലോമീറ്റര്‍ ചുറ്റളവില്‍ വരുന്ന പ്രദേശങ്ങളില്‍ പാറകള്‍ക്കു വിള്ളലും മണ്ണിടിച്ചിലും തുടര്‍ച്ചയായി ഉണ്ടാകുന്നത് ഡാമിലെ വെള്ളത്തിന്റെ സമ്മര്‍ദം മൂലമാണെന്ന് ചൂണ്ടിക്കാണിക്കപ്പെടുന്നു. ഇതു സംബന്ധിച്ച് ഭൗമപഠന സംഘത്തെ നിയമിക്കണമെന്നും ശാസ്ത്രീയ പഠനങ്ങള്‍ നടത്തണം എന്നുമുള്ള ഡാം സുരക്ഷാ വിഭാഗത്തിന്റെ ശുപാര്‍ശ ഇനിയും നടപ്പാക്കിയിട്ടില്ല.

ഇടുക്കി അണക്കെട്ടിനെ ബന്ധിപ്പിച്ചിരിക്കുന്ന കുറവന്‍, കുറത്തി മലകളില്‍ നിന്നും അടര്‍ന്നു വീഴുന്ന പാറകള്‍ ജനവാസ മേഖലയില്‍ ഭീതി സൃഷ്ടിക്കാതിരിക്കാന്‍ പാറകള്‍ ബോള്‍ട്ട് ചെയ്ത് ഉറപ്പിക്കുകയോ,ഇരുമ്പ് നെറ്റ് കെട്ടി സുരക്ഷിതമാക്കുകയോ വേണമെന്ന് നിര്‍ദേശവും ഉണ്ടായിരുന്നു. എന്നാല്‍ വര്‍ഷങ്ങള്‍ കഴിഞ്ഞിട്ടും ഇക്കാര്യത്തിലും തീരുമാനം ഉണ്ടായിട്ടില്ല.