കഫേ കോഫി ഡേ സ്ഥാപകന്‍ വി.ജി.സിദ്ധാര്‍ഥയുടെ വിയോഗത്തില്‍ ജീവനക്കാര്‍ മൊത്തത്തില്‍ കേഴുകയാണ്. മുതലാളി സ്വയം ഉരുകിത്തീരുമ്പോഴും ജീവനക്കാര്‍ക്ക് കൃത്യമായ വേതനവും മറ്റാനുകൂല്യങ്ങളും നല്‍കിയിരുന്നത്രെ. നദിയില്‍ച്ചാടി മരിച്ച നിലയില്‍ കണ്ടെത്തിയതോടെ പലതരം കഥകളാണ് റ്പ്രചരിക്കുന്നത്. സര്‍ക്കാര്‍ കണക്കുകള്‍ പ്രകാരം 1000 കോടിയിലധികം രൂപയുടെ കടം ഉണ്ടായിരുന്നതായി കോര്‍പ്പറേറ്റ് മന്ത്രാലയത്തിലെ രേഖകള്‍.

കോഫി ഡേ എന്‍ര്‍െ്രെപസസിന് ഏറെ കടബാധ്യതകള്‍ ഉണ്ടെന്നു സൂചിപ്പിച്ച് സിദ്ധാര്‍ഥയുടേതെന്ന് പറയുന്ന കത്ത് നേരത്തെ പുറത്തുവന്നിരുന്നു. കാണാതാകുന്നതിന് മുന്‍പ് സിദ്ധാര്‍ഥ കോഫി ഡേ തൊഴിലാളികള്‍ക്ക് അയച്ചെന്നു കരുതുന്ന കത്തില്‍ ആദായനികുതി വകുപ്പില്‍ നിന്ന് ഏറെ സമ്മര്‍ദം നേരിടേണ്ടി വന്നെന്നും ഓഹരികള്‍ മടക്കി വാങ്ങാന്‍ ആവശ്യപ്പെട്ട് ഒരു ഓഹരി പങ്കാളി നടത്തുന്ന സമ്മര്‍ദ്ദം താങ്ങാനാകുന്നില്ലെന്നും പരാമര്‍ശമുണ്ട്.
വിശ്വാസമര്‍പ്പിച്ചവരോട് അത് പാലിക്കാനാക്കാത്തതില്‍ ക്ഷമിക്കുക. സംരംഭകനെന്ന നിലയില്‍ ഞാന്‍ പരാജിതനാണ്. ഏറെപോരാടി, എന്നാല്‍ ഇന്ന് ഞാന്‍ പിന്‍മാറുന്നു. ഓഹരികള്‍ മടക്കിവാങ്ങാന്‍ ആവശ്യപ്പെട്ട് എന്റെ ഒരു ഓഹരി പങ്കാളി നടത്തുന്ന സമ്മര്‍ദം താങ്ങാനാകുന്നില്ല. കടക്കാരില്‍ നിന്നുള്ള സമ്മര്‍ദവും ഏറെയാണ്.'' എന്നിങ്ങനെയാണ് സിദ്ധാര്‍ഥ കത്തില്‍ വിവരിക്കുന്നത്.

കോര്‍പ്പറേറ്റ് മന്ത്രാലയത്തിലെ വിവരങ്ങള്‍ പ്രകാരം സിദ്ധാര്‍ഥയ്ക്ക് ഓഹരിയുള്ള ദേവദര്‍ശിനി ഇന്‍ഫോ ടെക്‌നോളജീസ്, ഗോനിബേഡു കോഫി, കോഫി ഡേ കണ്‍സോളിഡേഷന്‍സ് എന്നിവയിലൂടെയാണ് കടം രേഖപ്പെടുത്തിയിരിക്കുന്നത്. 2014 സെപ്തംബറില്‍ മൗറീഷ്യസിലെ സ്റ്റാന്‍ഡേര്‍ഡ് ചാര്‍ട്ടേഡ്‌ ്രൈപവറ്റ് ഇക്വിറ്റി, മൗറീഷ്യസിലെ തന്നെ ക്രഡിറ്റ് ഓപ്പര്‍ച്യൂണിറ്റീസ് ഫണ്ട് ആന്‍ഡ് ഏഷ്യ ക്രഡിറ്റ് ഓപ്പര്‍ച്യൂണിറ്റീസ് എന്നിവയില്‍ നിന്ന് 471 കോടി രൂപയുടെ കടപ്പത്രങ്ങള്‍ ദേവദര്‍ശിനി വാങ്ങിയിരുന്നു.

2018 നവംബറില്‍ എസ്എസ്ജി ഏഷ്യയില്‍ നിന്ന് 300 കോടിയോളം രൂപ വാങ്ങി ഇതില്‍ കുറച്ചു കടം വീട്ടിയെന്നും രേഖകളില്‍ പറയുന്നു. എന്നാല്‍ ഗോനിബേഡു കോഫിയുടെ പേരില്‍ വാങ്ങിയ 450 കോടി രൂപ തിരിച്ചടച്ചിട്ടുണ്ടോ എന്നത് രേഖകളില്‍ വ്യക്തമല്ല.

ബെംഗളൂരുവിലെ മൈസൂര്‍ റോഡില്‍ ഐടി പാര്‍ക്കിന്റെ നിയന്ത്രണമുള്ള സിദ്ധാര്‍ഥയുടെ റിയല്‍ എസ്‌റ്റേറ്റ് ഗ്രൂപ്പായ ടങ്ക്‌ലിന്‍ റീടെയില്‍ റിയല്‍ട്ടിയുടെ പത്ത് ലക്ഷം രൂപ വീതം വരെ മൂല്യമുള്ള 30,000 കടപ്പത്രങ്ങള്‍ സിംഗപ്പൂരിലെ സ്റ്റാന്‍ഡേര്‍ഡ് ചാര്‍ട്ടേഡ് ബാങ്കിന് മാര്‍ച്ച് 25 ന് നല്‍കിയതായി വ്യക്തമാക്കുന്നു. എന്നാല്‍ ഇതേക്കുറിച്ച് സ്റ്റാന്‍ഡേര്‍ഡ് ചാര്‍ട്ടേഡ് പ്രതികരിച്ചിട്ടില്ല. ഗോനിബേഡു കോഫി, ടാങ്ക്‌ലിന്‍, ദേവദര്‍ശിനി ഇന്‍ഫോ, കോഫി ഡേ ഗ്ലോബല്‍ എന്നിവയും ഈ വിവരങ്ങളില്‍ പ്രതികരിച്ചിട്ടില്ല.

2019 മാര്‍ച്ച് 31 വരെയുള്ള കണക്കുകള്‍ പ്രകാരം കഫേ കോഫി ഡേയ്ക്ക് 6,547.38 കോടി രൂപയാണ് കടബാധ്യത. ഇത് കഴിഞ്ഞ സാമ്ബത്തിക വര്‍ഷത്തേക്കാള്‍ 30 ശതമാനം കൂടുതലാണ്. സിദ്ധാര്‍ഥയ്ക്കും അദ്ദേഹത്തിന്റെ മറ്റു സ്ഥാപനങ്ങള്‍ക്കുമായി കമ്ബനിയില്‍ 53.93 ശതമാനം ഓഹരി ഉണ്ടായിരുന്നു. എന്നാല്‍ ഇതില്‍ 75.50 ശതമാനം ഓഹരികള്‍ ജൂണ്‍ 30 ന് പണയം വച്ചെന്നാണ് രേഖകള്‍. ആദിത്യ ബിര്‍ല ഫിനാന്‍സ്, കൊടക് മഹീന്ദ്രാ ബാങ്ക്, എകെ ക്യാപ്പിറ്റല്‍, എസ്ടിസിഐ ഫിനാന്‍സ്, എപിഎസി, ആര്‍ബിഎല്‍ ബാങ്ക്, എസ്എസ്ജി എഷ്യ എന്നിവയില്‍ നിന്നും സിദ്ധാര്‍ഥ കടമെടുത്തിരുന്നതായും രേഖകളില്‍ പറയുന്നു.