പ്രളയദുരിത ബാധിത മേഖലയിലുള്ളവര്‍ക്ക് നല്‍കാന്‍ തന്റെ കടയിലെ വസ്ത്രങ്ങള്‍ മുഴുവന്‍ നല്‍കിയ നൗഷാദിന് പിന്നാലെ മറ്റൊരു വ്യാപാരിയും കടയിലെ ലക്ഷങ്ങളുടെ തുണിത്തരങ്ങള്‍ പ്രളയമേഖലയിലുള്ളവര്‍ക്ക് നല്‍കി. ആലപ്പുഴ തൃക്കുന്നപ്പുഴ വ്യാപാരി വ്യവസായി ഏകോപന സമിതി യൂണീറ്റ് പ്രസിഡന്റും അണ്ടോളില്‍ ബ്യൂട്ടിക് എന്ന വസ്ത്രശാലയുടെ ഉടമയുമായ അബ്ദുല്ല അണ്ടോളില്‍ ആണ് സംഭാവന നല്‍കിയത്.

പരേതനായ മുസ്‌ലിംലീഗ് നേതാവായ അണ്ടോളില്‍ ഉസ്മാന്‍ കുട്ടിയുടെ മകനാണ് അബ്ദുല്ല. സ്വര്‍ണ്ണവ്യാപാര രംഗത്തും പ്രവര്‍ത്തിക്കുന്നു. വസ്ത്രങ്ങള്‍ അടക്കം ശേഖരിച്ച വിഭവങ്ങള്‍ ബുധനാഴ്ച മലബാറിലേക്ക് പുറപ്പെടുമെന്ന് അദ്ദേഹം അറിയിച്ചു. കഴിഞ്ഞതവണ പ്രളയം ആലപ്പുഴയെ വിഴുങ്ങിയപ്പോള്‍ ദുരിതത്തിന്റെ തീവ്രത അബ്ദുള്ള നേരിട്ട് മനസ്സിലാക്കിയതാണ്. അതിനാലാണ് ഇത്തവണ വടക്കന്‍ കേരളത്തില്‍ ദുരന്തം ഉണ്ടായപ്പോള്‍ സഹായിക്കാന്‍ തീരുമാനിച്ചത്. 

കൊച്ചി ബ്രോഡ് വേയിലെ വഴിയോര കച്ചവടക്കാരന്‍ നൗഷാദ് കണക്ക് നോക്കാതെ ചാക്ക് കണക്കിന് പുതിയ വസ്ത്രങ്ങളാണ് നിലമ്പൂരിലും വയനാട്ടിലും ദുരിതമനൂഭവിക്കുന്നവര്‍ക്ക് സൗജന്യമായി നല്‍കിയത്. എറണാകുളം വൈപ്പിന്‍ മാലിപ്പുറം സ്വദേശിയായ നൗഷാദ് 18 വര്‍ഷമായി ബ്രോഡ് വസ്ത്രവ്യാപാരം നടത്തുന്നു. കൊച്ചി ശാസ്ത്ര സാങ്കേതിക സര്‍വകലാശാലയിലെ വിദ്യാര്‍ഥികളും അധ്യാപകരും പ്രളയബാധിതര്‍ക്ക് നല്‍കാന്‍ വസ്ത്രങ്ങള്‍ ശേഖരിക്കുന്നതിന് ഞായറാഴ്ച ബ്രോഡ് വേയില്‍ എത്തിയിരുന്നു. ഓണവും പെരുന്നാളും ആയതിനാല്‍ പലരും നല്‍കിയില്ല. വിദ്യാര്‍ത്ഥികളില്‍ നിന്ന് ഈ വിവരം അറിഞ്ഞാണ് നൗഷാദ് ചാക്ക് കണക്കിന് വസ്ത്രങ്ങള്‍ സംഭാവന ചെയ്തത്. ഈ ലോകത്ത് നിന്ന് യാത്രയാകുമ്പോള്‍ ആരും ഒന്നും കൊണ്ടുപോകുന്നില്ല. അതിനാല്‍ ഇതൊന്നും നഷ്ടമല്ല. ഇതാണെന്റെ ലാഭം. എല്ലാവരും മനുഷ്യരാണ്. ദുരിത ബാധിതരെ സഹായിക്കുക ഓരോരുത്തരുടെയും കടമായണെന്ന് നൗഷാദ് പറഞ്ഞു. 

നൗഷാദിന് പിന്നാലെ ആസിഫ് അലി എന്ന പ്രവാസിയായ ചെറുപ്പക്കാരനും ദുരിതബാധിതരെ സഹായിക്കാന്‍ രംഗത്തെത്തിയിരുന്നു. തന്റെ പ്രയാസങ്ങള്‍ മറന്നായിരുന്നു ആസിഫിന്റെ കൈത്താങ്ങ്. ഉപ്പയും ഉമ്മയും ആറു പെങ്ങമ്മാരും അടങ്ങുന്നതാണ് ആസിഫിന്റെ കുടുംബം. അഞ്ചു പെങ്ങമ്മാരെ കെട്ടിച്ചയച്ചു. പ്രാരാബ്ധത്തിന്റെ പടു കുഴിയിലാണ്, നാല് വര്‍ഷമായി സൗദിയില്‍ മലയാളികളുടെ ഒരു റെസ്റ്റാറ്റാന്റില്‍ ജോലി ചെയ്യുന്നു. പെരുന്നാളിന് തനിക്ക് കിട്ടിയ ടിപ്പും പെരുന്നാളിന് മുതലാളി തന്ന പൈസയും കൂടി മുഖ്യമന്ത്രിയുടെ ദുതിരിതാശ്വാസ നിധിയിലേക്ക് കൈമാറി. കഴിഞ്ഞ തവണ കൊടുത്തതിലും കൂടുതലുണ്ടെന്നാണ് ആസിഫ് തന്റെ ഫെയിസ്ബുക്ക് പോസ്റ്റിലൂടെ അറിയിച്ചത്. ആസിഫിനെയും അബ്ദുള്ളയേയും നൗഷാദിനേയും പോലുള്ള നല്ല മനുഷ്യരുടെ സഹായങ്ങളാണ് ദുരന്തത്തില്‍ വിറങ്ങലിച്ച് നില്‍ക്കുന്ന കേരളത്തിന് പുതുജീവന്‍ പകരുന്നത്.