കോണ്‍ഗ്രസ് നേതാക്കള്‍ അടപടലം എതിര്‍ത്തിട്ടും ശശി തരൂര്‍ എം.പി പ്രധാനമന്ത്രി മോദി സ്തുതി നടത്തുന്നത് സ്വന്തം തടി തപ്പാനാണെന്ന് പലര്‍ക്കും അറിയാം. കോണ്‍ഗ്രസിന്റെ നെടുംതൂണുകളില്‍ ഒരാളായ പി.ചിദംബരത്തോട് ബി.ജെ.പി രാഷ്ട്രീയ പകപോക്കുമ്പോള്‍ ഇത്തരം പ്രസ്താവനകള്‍ നടത്തുന്നത് പാര്‍ട്ടിക്ക് വലിയ തിരിച്ചടിയാണെന്ന് നേതാക്കള്‍ തരൂരിനോട് പറഞ്ഞിരുന്നു. എന്നിട്ടും നിലപാട് മാറ്റാത്താത്തത് നിലനില്‍പ്പിന് വേണ്ടിയാണ്. മുന്‍ ഭാര്യ സുനന്ദ പുഷ്‌കര്‍ ആത്മഹത്യ ചെയ്ത കേസില്‍ ഡല്‍ഹി പൊലീസ് തരൂരിനെ മണിച്ചിത്രപൂട്ടിട്ട് തളച്ചിരിക്കുകയാണ്. അത് പൊളിക്കണമെങ്കില്‍ മോദി കനിയണം. ആ കനിവിന് വേണ്ടിയുള്ള കസര്‍ക്കാണ് നടക്കുന്നത്. ഇത് ഇന്നും ഇന്നലെയും തുടങ്ങിയതല്ല, മോദി അധികാരത്തിലേറിയ 2014ല്‍ ആരംഭിച്ചതാണ്. 

സുനന്ദപുഷ്‌കറെ ശശി തരൂര്‍ മാനസികമായി പീഡിപ്പിച്ചിരുന്നെന്നാണ് ഡല്‍ഹി പൊലീസ് കോടതിയില്‍ നല്‍കിയ റിപ്പോര്‍ട്ടില്‍ പറയുന്നത്. തരൂര്‍ ആത്മഹത്യയ്ക്ക് പ്രേരിപ്പിച്ചിരുന്നതായും പൊലീസ് കോടതിയില്‍ പറഞ്ഞു. തരൂരിനെതിരെ സ്ത്രീകള്‍ക്കെതിരായ അതിക്രമത്തിനും ആത്മഹത്യാപ്രേരണയ്ക്കും കേസെടുത്തിട്ടുണ്ട്. ഈ കേസില്‍ ജാമ്യം എടുത്തിട്ടുണ്ട്. വിഷം ഉള്ളില്‍ ചെന്നാണ് മരിച്ചതെന്നും ശരീരത്തിന്റെ വിവിധ ഭാഗങ്ങളില്‍ 15ഓളം പരിക്കുകള്‍ ഉണ്ടായിരുന്നതായും പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നുണ്ടെന്നും പൊലീസ് കോടതിയില്‍ വ്യക്തമാക്കിയിരുന്നു. പാക്കിസ്ഥാനി മാധ്യമപ്രവര്‍ത്തക മെഹര്‍ തരാറുമായി തരൂരിനുണ്ടായ ബന്ധം കാരണം സുനന്ദ കടുത്ത മാനസിക സമ്മര്‍ദ്ദത്തിലായിരുന്നെന്നും സ്പെഷ്യല്‍ പബ്ലിക് പ്രൊസിക്യൂട്ടര്‍ അതുല്‍ ശ്രീവാസ്തവ ഡല്‍ഹി കോടതിയില്‍ പറഞ്ഞു. കുറ്റപത്രത്തില്‍ സുനന്ദയുടെ സുഹൃത്ത് നളിനി സിങിന്റെ മൊഴിയും പ്രൊസിക്യൂട്ടര്‍ തെളിവായി ചൂണ്ടിക്കാട്ടി. കേസ് 31ന് വീണ്ടും പരിഗണിക്കാനിരിക്കെയാണ് തരൂര്‍ തന്റെ അടവുമായി കളത്തിലിറങ്ങിയത്. തരൂരിനെതിരെ ആത്മഹത്യാ പ്രേരണക്കുറ്റം ചുമത്തിയിട്ടുണ്ട്. ഇന്ത്യന്‍ ശിക്ഷ നിയമം 498 - അ, 306 വകുപ്പകള്‍ ചേര്‍ത്താണ് കേസ് രജിസ്റ്റര്‍ ചെയ്തിരിക്കുന്നത്. സുനന്ദ പുഷ്‌കര്‍ നിരന്തരമായി മര്‍ദ്ദനമേറ്റതിന് തെളിവുണ്ടെന്നും കോടതിയെ ബോധിപ്പിച്ചു.

അതോടെ കാര്യങ്ങള്‍ കൈവിട്ടുപോകുമെന്ന അവസ്ഥയിലായി തരൂര്‍. ഡല്‍ഹി പൊലീസ് സമര്‍പ്പിച്ച കുറ്റപത്രം കോടതി അംഗീകരിച്ചാല്‍ തരൂരിനെ ഉടന്‍ അറസ്റ്റ് ചെയ്‌തേക്കും. ഡല്‍ഹിയില്‍ ഇത് സംബന്ധിച്ച നീക്കം നടക്കുന്നുണ്ടെന്ന് തരൂരിന് അറിയാമെന്നാണ് സൂചന. കുറ്റപത്രവുമായി ബന്ധപ്പെട്ട അടുത്ത വാദം ആഗസ്റ്റ് 31 ന് ഡല്‍ഹി പ്രത്യേക കോടതിയില്‍ നടക്കും. അതിന് മുമ്പ് എങ്ങനെയും കാര്യങ്ങള്‍ അനുകൂലമാക്കുകയാണ് ലക്ഷ്യം. ചിദംബരത്തിന് പിന്നാലെ ശശി തരൂരിനെയും അഴിക്കുള്ളിലാക്കിയാല്‍ ബി.ജെ.പിക്ക് രാഷ്ട്രീയമായി നേട്ടമാകും കോണ്‍ഗ്രസിന് വലിയ തിരിച്ചടിയും. മുമ്പ് കേസില്‍ തരൂരിനെ അറസ്റ്റ് ചെയ്യുമെന്ന സാഹചര്യം ഉണ്ടാകുന്നതിന് മുന്നോടിയായി അദ്ദേഹം നരേന്ദ്രമോദിയെ പ്രശംസിച്ച് സംസാരിച്ചിരുന്നു. അന്ന് തരൂര്‍ ബി.ജെ.പിയിലേക്ക് ആണെന്ന പ്രചരണങ്ങളും നടന്നു. ഒന്നും നടന്നില്ല. തെരഞ്ഞെടുപ്പ് കാലത്ത് മോദിക്കും ബി.ജെ.പിക്കും എതിരെ രൂക്ഷവിമര്‍ശനം നടത്തുകയും ചെയ്തു. മോദി വീണ്ടും അധികാരത്തിലെത്തിയാല്‍ ഇന്ത്യയെ ഹിന്ദു പാക്കിസ്ഥാനാക്കും എന്ന് പ്രസംഗിച്ചത് വിവാദമായി. തുടര്‍ന്ന് ബി.ജെ.പി പ്രവര്‍ത്തകന്‍ കൊടുത്ത കേസില്‍ കൊല്‍ക്കൊത്ത ഹൈക്കോടതി തരൂരിനെതിരെ അറസ്റ്റ് വാറനന്‍ഡ് പുറപ്പെടുവിച്ചിരുന്നു.

യു.എന്നില്‍ നിന്ന് ഇന്ത്യയില്‍ എത്തിയ തരൂര്‍ എം.പിയായ ശേഷമാണ് ബിസിനസ്സുകാരിയായ സുനന്ദ പുഷ്‌കറുമായി അടുത്തതും പ്രണയത്തിലായതും. ഐ.പി.എല്‍ ടീമിനായുള്ള വിയര്‍പ്പ് ഓഹരി വിവാദത്തെ തുടര്‍ന്നാണ് ഇരുവരും തമ്മിലുള്ള പ്രണയം പുറംലോകം അറിഞ്ഞത്. വിവാദങ്ങള്‍ ആളിപ്പടരുമ്പോഴും തരൂര്‍ തളര്‍ന്നില്ല. ഏറെ താമസിക്കാതെ സുനന്ദയെ വിവാഹം ചെയ്തു. മൂന്ന് വര്‍ഷവും നാല് മാസവും ആ ദാമ്പത്യം നീണ്ടു നിന്നു. രണ്ട് പേരുടേയും മൂന്നാം വിവാഹം ആയിരുന്നു. തരൂര്‍ വിദേശകാര്യ സഹമന്ത്രിയായിരിക്കുമ്പോഴാണ് ഡല്‍ഹിയിലെ ആഢംബര ഹോട്ടലില്‍ സുനന്ദയെ ആത്മഹത്യചെയ്ത നിലയില്‍ കണ്ടെത്തിയത്.