ഫാക്ടറിയിലെ സെപ്റ്റിക് ടാങ്ക് വൃത്തിയാക്കുന്നതിനിടെ വിഷവാതകം ശ്വസിച്ച് മൂന്നു തൊഴിലാളികള്‍ മരിച്ചു. ഡല്‍ഹിയിലെ മുണ്ട്ക വ്യവസായ മേഖലയില്‍ വെള്ളിയാഴ്ച ഉച്ചയോടെയാണ് അപകടമുണ്ടായത്. അരുണ്‍ (38), സന്ദീപ് (32), ചന്ദ് (42) എന്നിവരാണ് മരിച്ചത്. ഉച്ചയ്ക്ക് 12.03നാണ് അപകടം സംബന്ധിച്ച വിവരം ലഭിച്ചതെന്ന് ഡല്‍ഹി അഗ്‌നിരക്ഷാസേന പറഞ്ഞു.

മുണ്ട്കയിലെ ഫാക്ടറിയിലെ സെപ്റ്റിക് ടാങ്ക് വൃത്തിയാക്കാന്‍ എത്തിയതായിരുന്നു തൊഴിലാളികള്‍. ആദ്യം സെപ്റ്റിക് ടാങ്കില്‍ ഇറങ്ങിയ ഒരാള്‍ ബോധരഹിതനായി വീണതോടെ ഇയാളെ രക്ഷിക്കാനായാണ് മറ്റു രണ്ട് തൊഴിലാളികള്‍ ഇറങ്ങിയത്. എന്നാല്‍ ഇവരും വിഷവാതകം ശ്വസിച്ച് ബോധരഹിതരാകുകയായിരുന്നു.

രക്ഷാപ്രവര്‍ത്തനത്തിനായി അഗ്‌നിരക്ഷാസേനയുടെ രണ്ടു വാഹനങ്ങള്‍ പുറപ്പെട്ടെങ്കിലും ഗതാഗതക്കുരുക്ക് കാരണം സ്ഥലത്ത് എത്താനായില്ല. പിന്നീട് എതിര്‍ഭാഗത്തുനിന്ന് മറ്റൊരു വാഹനം എത്തിക്കുകയായിരുന്നെന്ന് അഗ്‌നിരക്ഷാസേനയിലെ മുതിര്‍ന്ന ഉദ്യോഗസ്ഥന്‍ പറഞ്ഞു. തുടര്‍ന്ന് ഉദ്യോഗസ്ഥര്‍ ടാങ്കില്‍നിന്ന് മൂവരെയും പുറത്തെത്തിച്ചപ്പോഴേക്കും മരണം സംഭവിച്ചിരുന്നു.